Sports Ground Maintenance: ਕੌਮਾਂਤਰੀ ਖਿਡਾਰੀ ਦੇਣ ਵਾਲੇ ਮੈਦਾਨ ਦੀ ਹਾਲਤ ਖਸਤਾ
ਚਾਰ ਮਹੀਨਿਆਂ ਤੋਂ ਪੁੱਟੇ ਟੋਇਆਂ ਕਾਰਨ ਖਿਡਾਰੀ ਅਭਿਆਸ ਤੋਂ ਵਾਂਝੇ
ਪਿੰਡ ਤਖਾਣਵੱਧ ਦੇ ਮੁੱਖ ਮੰਤਰੀ ਸਰਕਾਰੀ ਖੇਡ ਮੈਦਾਨ ਵਿੱਚ ਪੰਚਾਇਤੀ ਵਿਭਾਗ ਵੱਲੋਂ ਕਰੀਬ ਚਾਰ ਮਹੀਨੇ ਪਹਿਲਾਂ ਪੁੱਟੇ ਟੋਏ ਅਜੇ ਤੱਕ ਮਿੱਟੀ ਪਾ ਕੇ ਠੀਕ ਨਹੀਂ ਕੀਤੇ ਗਏ। ਖੇਡ ਮੈਦਾਨ ਦੀ ਖਰਾਬ ਹਾਲਤ ਕਾਰਨ ਰੋਜ਼ਾਨਾ ਅਭਿਆਸ ਕਰਨ ਵਾਲੇ ਖਿਡਾਰੀਆਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪਿੰਡ ਵਾਸੀਆਂ ਅਤੇ ਖਿਡਾਰੀਆਂ ਨੇ ਦੱਸਿਆ ਕਿ ਪੰਚਾਇਤੀ ਵਿਭਾਗ ਵੱਲੋਂ ਕਈ ਮਹੀਨੇ ਪਹਿਲਾਂ ਪਾਈਪਾਂ ਪਾਉਣ ਲਈ ਖੇਡ ਮੈਦਾਨ ਨੂੰ ਪੁੱਟਿਆ ਗਿਆ ਸੀ। ਖੇਡ ਮੈਦਾਨ ਵਿੱਚ ਪਏ ਟੋਇਆਂ ਕਾਰਨ ਦੌੜ ਅਤੇ ਹੋਰ ਖੇਡ ਗਤੀਵਿਧੀਆਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਸਬੰਧੀ ਕਈ ਵਾਰ ਸਬੰਧਤ ਅਧਿਕਾਰੀਆਂ ਨੂੰ ਦੱਸਿਆ ਗਿਆ, ਪਰ ਅਜੇ ਤੱਕ ਮੈਦਾਨ ਨੂੰ ਪਹਿਲਾਂ ਵਾਂਗ ਸਮਤਲ ਨਹੀਂ ਕੀਤਾ ਗਿਆ।
ਖਿਡਾਰੀਆਂ ਨੇ ਚਿੰਤਾ ਪ੍ਰਗਟਾਉਂਦਿਆਂ ਕਿਹਾ ਕਿ ਬਰਸਾਤ ਦੇ ਮੌਸਮ ਦੌਰਾਨ ਟੋਇਆਂ ਵਿੱਚ ਪਾਣੀ ਭਰਨ ਨਾਲ ਹਾਦਸਿਆਂ ਦਾ ਖ਼ਤਰਾ ਵਧ ਗਿਆ ਹੈ।
ਪਿੰਡ ਵਾਸੀਆਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਖੇਡ ਮੈਦਾਨ ਦੀ ਤੁਰੰਤ ਮੁਰੰਮਤ ਕਰਵਾਈ ਜਾਵੇ । ਜ਼ਿਕਰਯੋਗ ਹੈ ਕਿ ਇਸ ਖੇਡ ਮੈਦਾਨ ਵੱਲੋਂ ਕਈ ਅੰਤਰਰਾਸ਼ਟਰੀ ਖਿਡਾਰੀ ਪੈਦਾ ਕੀਤੇ ਹਨ। ਭਾਰਤ ਅਤੇ ਉਜ਼ਬੇਕਿਸਤਾਨ ਵਿਚਕਾਰ ਜੂਨੀਅਰ ਹਾਕੀ ਏਸ਼ੀਆ ਕੱਪ ਦਾ ਇੱਕ ਰੋਜ਼ਾ ਮੈਚ ਅਤੇ ਪੰਜਾਬ ਸਰਕਾਰ ਵੱਲੋਂ 63ਵੀਆਂ ਪੰਜਾਬ ਰਾਜ ਸਕੂਲ ਖੇਡਾਂ ਦੇ ਹਾਕੀ ਮੁਕਾਬਲੇ ਵੀ ਇਸ ਖੇਡ ਮੈਦਾਨ ਵਿਚ ਕਰਵਾਏ ਗਏ ਸਨ।
ਪੰਚਾਇਤੀ ਵਿਭਾਗ ਦੇ ਜੇ ਈ ਸੂਰਜ ਕੁਮਾਰ ਨੇ ਕਿਹਾ ਕਿ ਪੁੱਟੇ ਹੋਏ ਟੋਇਆਂ ਨੂੰ ਜਲਦੀ ਭਰਵਾ ਦਿੱਤਾ ਜਾਵੇਗਾ।
