ਬਲਜੀਤ ਸਿੰਘ
ਸਰਦੂਲਗੜ੍ਹ, 11 ਅਗਸਤ
ਇਥੇ ਚੌੜਾ ਬਾਜ਼ਾਰ ਦੇ ਪਿੱਛੇ ਗੋਲ ਮਾਰਕੀਟ ਦੇ ਗੁਦਾਮ ਉੱਪਰ ਚੁਬਾਰੇ ਵਿੱਚ ਗਲੀ ਸੜੀ ਲਾਸ਼ ਮਿਲੀ ਹੈ। ਇਹ ਗੋਲ ਮਾਰਕੀਟ ਦੀਆਂ ਦੁਕਾਨਾਂ ਤਕਰੀਬਨ ਬੰਦ ਹੀ ਹਨ ਰਹਿੰਦੀਆਂ ਹਨ ਅਤੇ ਜ਼ਿਆਦਾਤਰ ਇੱਥੇ ਗੋਦਾਮ ਹਨ। ਕਈ ਦਿਨਾਂ ਤੋਂ ਨੇੜੇ ਰਹਿੰਦੇ ਲੋਕਾਂ ਨੂੰ ਬਦਬੂ ਆ ਰਹੀ ਸੀ। ਬਦਬੂ ਜ਼ਿਆਦਾ ਆਉਣ ਕਰਕੇ ਜਦੋਂ ਲੋਕਾਂ ਨੇ ਵੱਖ-ਵੱਖ ਗੁਦਾਮ ਵੇਖੇ ਤਾਂ ਗੁਦਾਮ ਦੇ ਚੁਬਾਰੇ ਦਾ ਜਦੋਂ ਸ਼ਟਰ ਚੁੱਕਿਆ ਗਿਆ ਤਾਂ ਅੰਦਰ ਪੱਖੇ ਨਾਲ ਲਾਸ਼ ਲਟਕ ਰਹੀ ਸੀ, ਜਿਸ ਦੇ ਚਿਹਰੇ ਅਤੇ ਸਰੀਰ ਉਪਰ ਭਾਰੀ ਮਾਤਰਾ ਵਿੱਚ ਸੁੰਡ ਚੱਲ ਰਹੇ ਸਨ। ਲੋਕਾਂ ਵੱਲੋਂ ਪੁਲੀਸ ਨੂੰ ਸੂਚਨਾ ਦੇਣ ਤੇ ਡੀਐਸਪੀ ਸਰਦੂਲਗੜ੍ਹ ਸੰਜੀਵ ਗੋਇਲ ਅਤੇ ਥਾਣਾ ਮੁਖੀ ਗੁਰਦੀਪ ਸਿੰਘ ਮੌਕੇ ’ਤੇ ਪਹੁੰਚੇ। ਇਹ ਲਾਸ਼ ਕਿਸੇ 40-45 ਸਾਲ ਦੇ ਵਿਅਕਤੀ ਦੀ ਹੈ। ਲਾਸ਼ ਦੀ ਅਜੇ ਤੱਕ ਕੋਈ ਸਨਾਖਤ ਨਹੀਂ ਹੋ ਸਕੀ।