dabwali ਵਿੱਚ ਕੂੜਾ ਚੁੱਕਣ ਖਿਲਾਫ਼ ਸਫ਼ਾਈ ਮੁਲਾਜ਼਼ਮ ਢੇਰ ’ਤੇ ਲੇਟੇ

ਅੱਜ ਸਵੇਰੇ ਨਗਰ ਪਰਿਸ਼ਦ ਪ੍ਰਸ਼ਾਸਨ ਨੇ ਇੰਪਰੂਵਮੈਂਟ ਟਰੱਸਟ ਪਾਰਕ ਅੱਗੋਂ ਕੂੜਾ ਚੁਕਵਾਇਆ, ਜਦਕਿ ਕਬੀਰ ਬਸਤੀ ਨੇੜੇ ਹੜਤਾਲੀ ਮੁਲਾਜ਼ਮਾਂ ਨੇ ਜੇ ਸੀ ਬੀ ਨੂੰ ਵਿਰੋਧ ਕਰ ਕੇ ਵਾਪਸ ਭੇਜ ਦਿੱਤਾ। ਪੂਜਾ ਵੇਸਟ ਮੈਨੇਜਮੈਂਟ ਦੇ ਠੇਕੇਦਾਰ ਨੇ ਦੁਪਹਿਰ 3 ਵਜੇ ਤੱਕ ਕੰਮ ’ਤੇ ਪਰਤਣ ਜਾਂ ਨਵੇਂ ਮੁਲਾਜ਼ਮ ਰੱਖਣ ਦਾ ਅਲਟੀਮੇਟਮ ਦਿੱਤਾ।

ਦੁਪਹਿਰ ਕਰੀਬ 2.45 ਵਜੇ ਰਾਮਲੀਲਾ ਗਰਾਊਂਡ ਨੇੜੇ ਜੇਸੀਬੀ ਨਾਲ ਕੂੜਾ ਚੁੱਕਣ ਦੀ ਕੋਸ਼ਿਸ਼ ਦੌਰਾਨ ਮੁਲਾਜ਼ਮ ਕੂੜੇ ਦੇ ਢੇਰਾਂ ਅਤੇ ਜੇ ਸੀ ਬੀ ਸਾਹਮਣੇ ਲੇਟ ਗਏ। ਇਸ ਤੋਂ ਬਾਅਦ ਪੁਲੀਸ ਸੂਰਜ ਕੁਮਾਰ ਸਮੇਤ ਹੋਰ ਮੁਲਾਜ਼ਮਾਂ ਨੂੰ ਪੁਲੀਸ ਲਾਈਨ ਲੈ ਗਈ।

ਪੁਰਸ਼ ਮੁਲਾਜ਼ਮਾਂ ਨੂੰ ਕਥਿਤ ਤੌਰ ’ਤੇ ਹਿਰਾਸਤ ਵਿੱਚ ਲਏ ਜਾਣ ਮਗਰੋਂ ਉਨ੍ਹਾਂ ਦੇ ਔਰਤ ਪਰਿਵਾਰਕ ਮੈਂਬਰਾਂ ਨੇ ਨਗਰ ਪਰਿਸ਼ਦ ਕੰਪਲੈਕਸ ਵਿੱਚ ਖੜ੍ਹੀਆਂ ਡੋਰ-ਟੂ-ਡੋਰ ਕੂੜਾ ਪ੍ਰਬੰਧਨ ਗੱਡੀਆਂ ਅੱਗੇ ਧਰਨਾ ਲਾ ਦਿੱਤਾ। ਉਨ੍ਹਾਂ ਦੋਸ਼ ਲਾਇਆ ਕਿ ਕਰੋਨਾ ਮਹਾਮਾਰੀ ਦੌਰਾਨ ਸੇਵਾਵਾਂ ਦੇਣ ਵਾਲੇ ਮੁਲਾਜ਼ਮਾਂ ਨੂੰ ਪੱਕਾ ਕਰਨ ਦੀ ਬਜਾਏ ਨਵੀਂ ਲੇਬਰ ਲਾਈ ਜਾ ਰਹੀ ਹੈ।

ਮੁਲਾਜ਼ਮ ਗੱਲਬਾਤ ਲਈ ਪੁਲੀਸ ਲਾਈਨ ਲਿਜਾਏ ਗਏ: ਪੁਲੀਸ ਬੁਲਾਰਾ

ਪੁਲੀਸ ਬੁਲਾਰੇ ਆਨੰਦ ਕੁਮਾਰ ਨੇ ਦੱਸਿਆ ਕਿ ਡਿਊਟੀ ਮੈਜਿਸਟਰੇਟ ਦੀਪਕ ਕੁਮਾਰ ਦੀ ਨਿਗਰਾਨੀ ਹੇਠ ਕੂੜਾ ਚੁਕਵਾਉਣ ਲਈ ਮੁਹਿੰਮ ਚਲਾਈ ਗਈ ਅਤੇ ਹੜਤਾਲੀ ਮੁਲਾਜ਼ਮਾਂ ਨੂੰ ਗੱਲਬਾਤ ਲਈ ਪਿੰਡ ਡੱਬਵਾਲੀ ਸਥਿਤ ਪੁਲੀਸ ਲਾਈਨ ਲਿਜਾਇਆ ਗਿਆ।

ਡੋਰ-ਟੂ-ਡੋਰ ਗੱਡੀਆਂ ਰੋਕਣ ਦਾ ਦੋਸ਼

ਈ ਓ ਸੁਰਿੰਦਰ ਕੁਮਾਰ ਨੇ ਦੱਸਿਆ ਕਿ ਸਫ਼ਾਈ ਮੁਲਾਜ਼ਮਾਂ ਨੇ ਡੋਰ-ਟੂ-ਡੋਰ ਕੂੜਾ ਪ੍ਰਬੰਧਨ ਗੱਡੀਆਂ ਰੋਕ ਕੇ ਰੱਖਿਆ ਹੈ। ਅੱਜ ਗੱਡੀਆਂ ਲਿਜਾਣ ਸਮੇਂ ਔਰਤਾਂ ਨੇ ਧਰਨਾ ਲਾ ਦਿੱਤਾ। ਕਰੀਬ ਤਿੰਨ ਦਿਨ ਪਹਿਲਾਂ ਸਫ਼ਾਈ ਮੁਲਾਜ਼ਮ ਕੂੜੇ ਨਾਲ ਭਰੀਆਂ ਗੱਡੀਆਂ ਨਗਰ ਪਰਿਸ਼ਦ ਦਫ਼ਤਰ ਵਿੱਚ ਲੈ ਆਏ ਸਨ।