ਗੁਰਵਿੰਦਰ ਸਿੰਘ
ਰਾਮਪੁਰਾ ਫੂਲ, 18 ਜਨਵਰੀ
ਰਾਮਪੁਰਾ ਫੂਲ ਦਾ ਰੇਲ ਮੋਰਚਾ ਅੱਜ ਔਰਤ ਦਿਵਸ ਨੂੰ ਸਮਰਪਿਤ ਰਿਹਾ, ਜਿਸ ਕਾਰਨ ਸਾਰੇ ਭਾਸ਼ਣ ਔਰਤਾਂ ਨੇ ਹੀ ਦਿੱਤੇ। ਇੱਥੋਂ ਤੱਕ ਕਿ ਪ੍ਰਧਾਨਗੀ ਮੰਡਲ ਦੇ ਸਾਰੇ ਭਾਸ਼ਣ ਵਿਚ ਵੀ ਔਰਤਾਂ ਹੀ ਮੋਹਰੀ ਹੋਈਆਂ ਤੇ ਸਟੇਜ ਸੰਚਾਲਨ ਵੀ ਬੀਕੇਯੂ ਡਕੌਂਦਾ ਦੀ ਔਰਤ ਆਗੂ ਬਲਜੀਤ ਕੌਰ ਸੇਮਾ ਨੇ ਕੀਤਾ। ਮੋਰਚੇ ਨੂੰ ਸੰਬੋਧਨ ਕਰਦਿਆਂ ਔਰਤ ਆਗੂ ਕ੍ਰਮਵਾਰ ਜਸਵੀਰ ਕੌਰ ਢਪਾਲੀ, ਮਨਜੀਤ ਕੌਰ ਕਰਾੜਵਾਲਾ ਤੇ ਮਹਿਕਦੀਪ ਕੌਰ ਕਰਾੜਵਾਲਾ ਨੇ ਕਿਹਾ ਕਿ ਕੇਂਦਰ ਸਰਕਾਰ ਨੂੰ ਸਮਝ ਜਾਣਾ ਚਾਹੀਦਾ ਹੈ ਕਿ ਔਰਤਾਂ ਸਿਰਫ਼ ਘਰ ਦੇ ਕੰਮਾਂ ਤੱਕ ਸੀਮਤ ਨਹੀਂ ਹਨ ਉਹ ਰਣ ਖੇਤਰ ਵਿਚ ਵੀ ਕੁੱਦਣਾ ਜਾਣਦੀਆਂ ਹਨ ਕਿਉਂਕਿ ਉਨ੍ਹਾਂ ਨੂੰ ਅਜਿਹੀ ਗੁੜ੍ਹਤੀ ਇਨਕਲਾਬੀ ਵਿਰਸੇ ਤੇ ਸਿੱਖ ਇਤਿਹਾਸ ਵਿੱਚੋਂ ਮਿਲੀ ਹੈ। ਇਸ ਮੌਕੇ ਮੋਰਚੇ ਵਿੱਚ ਸ਼ਾਮਲ ਔਰਤਾਂ ਨੇ ਖੇਤੀ ਕਾਨੂੰਨਾਂ ਕਾਰਨ ਕੇਂਦਰ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ।