punjab news: ਮਾਨ ਸਰਕਾਰ ਨੂੰ ਝੋਨੇ ਦੀ ਖ਼ਰੀਦ ਦਾ ਪਿਆ ਫ਼ਿਕਰ

ਦਿਲਚਸਪ ਗੱਲ ਹੈ ਕਿ ਇਸ ਵਾਰ ਮਾਲਵਾ ਖੇਤਰ ਵਿਚ ਨਰਮੇ ਦੀ ਫਸਲ ਹੇਠੋਂ ਰਕਬਾ ਨਿਕਲ ਕੇ ਵੱਡੀ ਪੱਧਰ ’ਤੇ ਝੋਨੇ ਥੱਲੇ ਚਲਾ ਗਿਆ ਹੈ, ਜਿਸ ਕਾਰਨ ਸਰਕਾਰ ਨੂੰ ਸਭ ਤੋਂ ਵੱਡੀ ਸਮੱਸਿਆ ਮਲਵਈ ਮੰਡੀਆਂ ਵਿਚ ਝੋਨੇ ਦੀ ਖਰੀਦ ਅਤੇ ਚੱਕ-ਚੁਕਾਈ ਤੋਂ ਹੋਣੀ ਹੈ। ਵਪਾਰੀਆਂ ਦਾ ਕਹਿਣਾ ਹੈ ਕਿ ਜਿਸ ਤਰ੍ਹਾਂ ਸਰਕਾਰੀ ਅਦਾਇਗੀਆਂ ਕਣਕ ਵੇਲੇ ਲਮਕ ਗਈਆਂ ਸਨ ਅਤੇ ਜੇਕਰ ਅਦਾਇਗੀਆਂ ਸਬੰਧੀ ਹੁਣ ਵੀ ਉਹੀ ਹਾਲ ਰਿਹਾ ਤਾਂ ਝੋਨੇ ਦੇ ਸੀਜ਼ਨ ਵਿਚ ਸਰਕਾਰ ਦਾ ਜਲੂਸ ਨਿਕਲ ਸਕਦਾ ਹੈ। ਵਪਾਰੀਆਂ ਅਤੇ ਹੋਰਨਾਂ ਲੋਕਾਂ ਤੋਂ ਸਰਕਾਰ ਪਾਸ ਪੁੱਜੀਆਂ ਰਿਪੋਰਟਾਂ ਮਗਰੋਂ ਹੀ ਸਰਕਾਰ ਇਸ ਖਰੀਦ ਲਈ ਗੰਭੀਰ ਹੋਣ ਲੱਗੀ ਹੈ। ਸਰਕਾਰ ਲਈ ਸੈਲਰਾਂ ’ਚ ਪਏ ਚੌਲ ਅਜੇ ਤੱਕ ਨਾ ਚੁੱਕੇ ਜਾਣ ਦਾ ਵੀ ਵੱਡਾ ਫ਼ਿਕਰ ਲੱਗਿਆ ਹੋਇਆ ਹੈ।

ਮਾਨਸਾ ਦੇ ਡਿਪਟੀ ਕਮਿਸ਼ਨਰ ਨਵਜੋਤ ਕੌਰ ਨੇ ਇਥੇ ਬੱਚਤ ਭਵਨ ਵਿੱਚ ਝੋਨੇ ਦੇ ਸੀਜਨ ਸਬੰਧੀ ਸੁਚੱਜੇ ਤੇ ਪੁਖਤਾ ਪ੍ਰਬੰਧਾਂ ਲਈ ਕੀਤੀ ਮੀਟਿੰਗ ਵਿਚ ਕਿਹਾ ਕਿ ਜ਼ਿਲ੍ਹੇ ਦੇ ਖਰੀਦ ਕੇਂਦਰਾਂ ਵਿਚ ਝੋਨੇ ਦੀ ਖਰੀਦ 1 ਅਕਤੂਬਰ ਤੋਂ ਸ਼ੁਰੂ ਕਰ ਦਿੱਤੀ ਜਾਵੇਗੀ।

ਇਸੇ ਦੌਰਾਨ ਪੰਜਾਬ ਮੰਡੀ ਬੋਰਡ ਦੇ ਮਾਨਸਾ ਸਥਿਤ ਉਪ ਮੰਡੀ ਜ਼ਿਲ੍ਹਾ ਅਫ਼ਸਰ ਜੈ ਸਿੰਘ ਸਿੱਧੂ ਨੇ ਦੱਸਿਆ ਕਿ ਝੋਨੇ ਦੀ ਖਰੀਦ ਸਬੰਧੀ ਮਾਨਸਾ ਜ਼ਿਲ੍ਹੇ ਦੀਆਂ ਸਾਰੀਆਂ ਮੰਡੀਆਂ ਅਤੇ ਖਰੀਦ ਕੇਂਦਰਾਂ ਵਿੱਚ ਬੰਦੋਬਸ਼ਤ ਮੁਕੰਮਲ ਕਰ ਲਏ ਗਏ ਹਨ। ਉਨ੍ਹਾਂ ਕਿਹਾ ਕਿ ਕਿਸਾਨਾਂ ਖਰੀਦ ਸਮੇਂ ਕਿਸੇ ਕਿਸਮ ਦੀ ਕੋਈ ਦਿੱਕਤ ਨਹੀਂ ਆਉਣ ਦਿੱਤੀ ਜਾਵੇਗੀ।