ਭਾਅ ’ਚ ਮੰਦੀ ਨੇ ਆਲੂ ਉਤਪਾਦਕਾਂ ਦਾ ਲੱਕ ਤੋੜਿਆ

ਪਿੰਡ ਸੁਖਪੁਰਾ ਦੇ ਸਰਜੀਤ ਸਿੰਘ ਅਤੇ ਪਿੰਡ ਜਗਜੀਤਪੁਰਾ ਦੇ ਜਸਵੀਰ ਸਿੰਘ ਨੇ ਦੱਸਿਆ ਕਿ ਆਲੂਆਂ ਦੀ ਖਰੀਦ ਲਈ ਵਪਾਰੀ ਫਿਲਹਾਲ ਘੱਟ ਆ ਰਹੇ ਹਨ। ਕਿਸਾਨਾਂ ਨੇ ਇਹ ਵੀ ਦੱਸਿਆ ਕਿ ਜਿਉਂ ਹੀ ਕੱਚੇ ਆਲੂਆਂ ਦੀ ਪੁਟਾਈ ਦਾ ਕੰਮ ਸ਼ੁਰੂ ਹੋਇਆ, ਉਦੋਂ ਤੋਂ ਦਿਨੋਂ-ਦਿਨ ਭਾਅ ਘਟਣ ਲੱਗ ਪਿਆ ਹੈ। ਅਨਾਜ ਮੰਡੀ ਵਿੱਚ ਆਲੂਆਂ ਦੇ ਅੰਬਾਰ ਲੱਗਣੇ ਸ਼ੁਰੂ ਹੋ ਗਏ ਹਨ। ਜਿਹੜੇ ਵਪਾਰੀਆਂ ਨੇ ਸ਼ੁਰੂਆਤੀ ਦੌਰ ਵਿੱਚ ਆਲੂਆਂ ਦੇ ਪੁਟਾਈ ਦੇ ਸੌਦੇ ਕੀਤੇ ਸਨ, ਉਨ੍ਹਾਂ ਨੂੰ ਘਾਟੇ ਦਾ ਸ਼ਿਕਾਰ ਹੋਣਾ ਪੈ ਰਿਹਾ ਹੈ।

ਕਿਸਾਨ ਆਗੂ ਗੁਰਵਿੰਦਰ ਸਿੰਘ ਨੇ ਕਿਹਾ ਕਿ ਆਲੂਆਂ ਦੀ ਖੇਤੀ ਤੇ ਕਿਸੇ ਵੀ ਸਰਕਾਰ ਵੱਲੋਂ ਐੱਮ ਐੱਸ ਪੀ ਨਾ ਦੇਣ ਕਾਰਨ ਆਲੂਆਂ ਦੀ ਖੇਤੀ ਉਤਪਾਦਕਾਂ ਲਈ ਘਾਟੇ ਦਾ ਸੌਦਾ ਬਣਦੀ ਜਾ ਰਹੀ ਹੈ। ਵਪਾਰੀ ਖੇਤਾਂ ਵਿੱਚ ਆਲੂਆਂ ਦੀ ਖੜ੍ਹੀ ਫ਼ਸਲ ਦਾ ਸੌਦਾ ਕਰਨ ਤੋਂ ਕੰਨੀ ਕਤਰਾ ਰਹੇ ਹਨ।

ਘੱਟੋ-ਘੱਟ 500 ਰੁਪਏ ਪ੍ਰਤੀ ਗੱਟਾ ਸਮਰਥਨ ਮੁੱਲ ਦੇਣ ਦੀ ਮੰਗ

ਬਲਾਕ ਸ਼ਹਿਣਾ ਦੇ ਪਿੰਡ ਬੁਰਜ ਫਤਿਹਗੜ੍ਹ, ਨੈਣੇਵਾਲ, ਮੌੜ ਮਕਸੂਥਾ, ਚੂੰਘਾਂ ਤੇ ਦੀਪਗੜ੍ਹ ਆਦਿ ਵਿੱਚ ਆਲੂਆਂ ਦੀ ਪੁਟਾਈ ਦਾ ਕੰਮ ਜ਼ੋਰਾਂ ’ਤੇ ਹੈ। ਇਸ ਦੌਰਾਨ ਕਿਸਾਨ ਜਰਨੈਲ ਸਿੰਘ, ਸੁਰਜੀਤ ਸਿੰਘ, ਰੂਪ ਸਿੰਘ ਅਤੇ ਜਸਵੀਰ ਸਿੰਘ ਨੇ ਮੰਗ ਕੀਤੀ ਕਿ ‘ਆਪ’ ਸਰਕਾਰ ਜੇਕਰ ਸੱਚਮੁੱਚ ਕਿਸਾਨ ਪੱਖੀ ਹੈ ਤਾਂ ਆਲੂ ਉਤਪਾਦਕਾਂ ਨੂੰ ਘੱਟੋ-ਘੱਟ 500 ਰੁਪਏ ਪ੍ਰਤੀ ਗੱਟਾ ਸਮਰਥਨ ਮੁੱਲ ਦੇਵੇ।