ਸੰਜੀਵ ਹਾਂਡਾ
ਫ਼ਿਰੋਜ਼ਪੁਰ, 25 ਜੂਨ
ਸੇਵਾਮੁਕਤੀ ਤੋਂ ਸਿਰਫ਼ ਇੱਕ ਦਿਨ ਪਹਿਲਾਂ ਪੰਜਾਬ ਪੁਲੀਸ ਦੇ ਇੱਕ ਸਹਾਇਕ ਥਾਣੇਦਾਰ ਨੂੰ ਝੂਠੇ ਜਬਰ-ਜਨਾਹ ਦੇ ਕੇਸ ਵਿੱਚ ਫਸਾਉਣ ਵਾਲੀ ਔਰਤ ਦਾ ਭੇਤ ਖੁੱਲ੍ਹ ਗਿਆ ਹੈ। ਪੁਲੀਸ ਨੇ ਪੜਤਾਲ ਮਗਰੋਂ ਪੰਜ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਇਨ੍ਹਾਂ ਮੁਲਜ਼ਮਾਂ ਵਿੱਚ ਚਾਰ ਔਰਤਾਂ ਵੀ ਸ਼ਾਮਲ ਹਨ। ਪੜਤਾਲ ’ਚ ਸਪੱਸ਼ਟ ਹੋ ਗਿਆ ਕਿ ਇਹ ਸਾਰਾ ਤਾਣਾ ਬਾਣਾ ਇਸ ਸਹਾਇਕ ਥਾਣੇਦਾਰ ਨੂੰ ਸੇਵਾਮੁਕਤੀ ਤੋਂ ਬਾਅਦ ਮਿਲਣ ਵਾਲੀ ਰਕਮ ਨੂੰ ਹੜੱਪਣ ਲਈ ਇੱਕ ਔਰਤ ਵੱਲੋਂ ਬੁਣਿਆ ਗਿਆ ਸੀ, ਜਿਸ ਵਿੱਚ ਉਸ ਦੀ ਮਾਂ ਸਣੇ ਚਾਰ ਹੋਰਨਾਂ ਨੇ ਮਦਦ ਕੀਤੀ ਸੀ। ਜਾਣਕਾਰੀ ਮੁਤਾਬਕ ਪੀੜਤ ਸਹਾਇਕ ਥਾਣੇਦਾਰ ਦੇਵੀ ਲਾਲ ਦੀ ਨਿਯੁਕਤੀ ਸਾਲ 1989 ਵਿੱਚ ਹੋਈ ਸੀ। ਪਿਛਲੇ ਸਾਲ 30 ਅਪਰੈਲ ਨੂੰ ਉਹ ਸੇਵਾਮੁਕਤ ਹੋਇਆ ਸੀ ਪਰ ਸੇਵਾਮੁਕਤੀ ਤੋਂ ਸਿਰਫ਼ ਇੱਕ ਦਿਨ ਪਹਿਲਾਂ ਜਲਾਲਾਬਾਦ ਵਾਸੀ ਅਨੀਤਾ ਰਾਣੀ ਦੀ ਸ਼ਿਕਾਇਤ ’ਤੇ ਉਸ ਖ਼ਿਲਾਫ਼ ਜਬਰ-ਜਨਾਹ ਦਾ ਕੇਸ ਥਾਣਾ ਛਾਉਣੀ ਵਿੱਚ ਦਰਜ ਹੋ ਗਿਆ। ਪਰਿਵਾਰ ਨੇ ਡੀਆਈਜੀ ਅੱਗੇ ਪੇਸ਼ ਹੋ ਕੇ ਕੇਸ ਦੀ ਪੜਤਾਲ ਕਰਵਾਉਣ ਦੀ ਮੰਗ ਕੀਤੀ। ਉੱਚ ਅਧਿਕਾਰੀਆਂ ਨੇ ਮਾਮਲੇ ਦੀ ਪੜਤਾਲ ਇੱਕ ਡੀਐੱਸਪੀ ਪੱਧਰ ਦੇ ਅਫ਼ਸਰ ਨੂੰ ਸੌਂਪੀ। ਪੜਤਾਲ ਵਿੱਚ ਇਹ ਗੱਲ ਸਾਹਮਣੇ ਆਈ ਕਿ ਅਨੀਤਾ ਰਾਣੀ ਨੇ ਆਪਣੀ ਮਾਂ ਹਰਮੀਤ ਕੌਰ ਸਮੇਤ ਦੋ ਹੋਰ ਔਰਤਾਂ ਸੀਮਾ ਰਾਣੀ, ਸ਼ੀਲੋ ਬਾਈ ਅਤੇ ਇੱਕ ਵਿਅਕਤੀ ਕ੍ਰਿਸ਼ਨ ਸਿੰਘ ਨਾਲ ਮਿਲ ਕੇ ਦੇਵੀ ਲਾਲ ਨੂੰ ਝੂਠੇ ਕੇਸ ਵਿੱਚ ਫ਼ਸਾਇਆ ਸੀ। ਮਗਰੋਂ ਸਾਰੇ ਮੁਲਜ਼ਮ ਦੇਵੀ ਲਾਲ ਨੂੰ ਖੂਬ ਬਲੈਕਮੇਲ ਕਰਦੇ ਰਹੇ। ਪੁਲੀਸ ਟੀਮ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇ ਮਾਰ ਰਹੀ ਹੈ।