ਪੱਤਰ ਪ੍ਰੇਰਕ
ਮਾਨਸਾ, 8 ਦਸੰਬਰ
ਮਾਲਵਾ ਖੇਤਰ ਦੇ ਜਿਹੜੇ ਕਾਂਗਰਸੀ ਨੇਤਾ ਵਿਧਾਨ ਸਭਾ ਤੋਂ ਪਹਿਲਾਂ ਤੇ ਪਿੱਛੋਂ ਭਾਜਪਾ ਵਿੱਚ ਸ਼ਾਮਲ ਹੋਏ ਹਨ, ਉਨ੍ਹਾਂ ਨੂੰ ਹੁਣ ਭਗਵੇਂ ਰੰਗ ‘ਚੋਂ ਸਿਆਸੀ ਚੜ੍ਹਤ ਦਿਖਾਈ ਦੇਣ ਲੱਗੀ ਹੈ। ਭਾਜਪਾ ਵੱਲੋਂ ਹਾਲ ਹੀ ‘ਚ ਪੰਜਾਬ ਇਕਾਈ ਦੀ ਬਣਾਈ ਨਵੀਂ ਟੀਮ ਵਿੱਚ ਸਭ ਤੋਂ ਵੱਧ ਅਹੁਦੇਦਾਰੀਆਂ ਦਿੱਤੀਆਂ ਗਈਆਂ ਹਨ। ਇਸ ਖੇਤਰ ਦੇ ਦਿੱਗਜ਼ ਸਿਆਸੀ ਨੇਤਾ ਜਗਦੀਪ ਸਿੰਘ ਨਕੱਈ ਸੂਬਾਈ ਮੀਤ ਪ੍ਰਧਾਨ ਲਾਉਣ ਤੋਂ ਉਨ੍ਹਾਂ ਦੀਆਂ ਇਸ ਖੇਤਰ ‘ਚ ਸਰਗਰਮੀਆਂ ਵਧ ਗਈਆਂ ਹਨ, ਹਾਲਾਂਕਿ ਉਨ੍ਹਾਂ ਦੇ ਪੁੱਤਰ ਦਾ ਵਿਆਹ ਹੋਣ ਕਾਰਨ ਹੋਰ ਰੁਝਵੇਂ ਵੀ ਬਣੇ ਹੋਏ ਹਨ, ਪਰ ਉਹ ਬਾਕੀ ਸਭ ਰੁਝੇਵਿਆਂ ਨੂੰ ਛੱਡ ਕੇ ਕਾਂਗਰਸ ਤੇ ਸ੍ਰੋਮਣੀ ਅਕਾਲੀ ਦਲ ‘ਚੋਂ ਵਰਕਰਾਂ ਨੂੰ ਭਾਜਪਾ ਦਾ ਰਾਹ ਵਿਖਾਉਣ ਲਈ ਸਰਗਰਮੀਆਂ ਕਰਨ ‘ਚ ਜੁਟੇ ਹੋਏ ਹਨ। ਭਾਜਪਾ ਵੱਲੋਂ ਮਾਲਵਾ ਖੇਤਰ ‘ਚ ਆਪਣਾ ਆਧਾਰ ਕਾਇਮ ਕਰਨ ਲਈ ਉਪਰਾਲਾ ਕਰਨਾ ਆਰੰਭ ਕਰ ਦਿੱਤਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਨਾਲ ਜਿਹੜੇ ਕਾਂਗਰਸੀ ਲੀਡਰ ਭਾਜਪਾ ‘ਚ ਸ਼ਾਮਲ ਹੋਏ ਹਨ, ਉਨ੍ਹਾਂ ਵਿੱਚੋਂ ਬਹੁਤੇ ਮਾਲਵਾ ਖੇਤਰ ਨਾਲ ਜੁੜੇ ਹੋਏ ਹਨ, ਜਦੋਂਕਿ ਕੈਪਟਨ ਦੇ ਮਾਲਵਾ ਖੇਤਰ ‘ਚ ਵਿਚਲੇ ਬਹੁਤੇ ਸਾਥੀ ਪਹਿਲਾਂ ਹੀ ‘ਕਮਲ ਦਾ ਫੁੱਲ’ ਫੜ੍ਹ ਚੁੱਕੇ ਹਨ। ਮਾਲਵਾ ਖੇਤਰ ਪੰਜਾਬ ਦਾ ਇੱਕ ਪੇਂਡੂ ਇਲਾਕਾ ਮੰਨਿਆ ਜਾਂਦਾ ਹੈ, ਜਿਸ ਦੀਆਂ ਸਭ ਤੋਂ ਵੱਧ ਵਿਧਾਨ ਸਭਾ ਦੀਆਂ ਸੀਟਾਂ ਹਨ ਤੇ ਇਸ ਖੇਤਰ ‘ਚੋਂ ਹੀ ਬਹੁਤੇ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਬਣੇ ਹਨ। ਇਸ ਖੇਤਰ ‘ਚ ਭਾਜਪਾ ਦਾ ਕਦੇ ਵੀ ਖਾਸ ਸਮਰਥਨ ਨਹੀਂ ਰਿਹਾ। ਭਾਜਪਾ ਦੀ ਲੰਬਾ ਸਮਾਂ ਅਕਾਲੀ ਦਲ ਨਾਲ ਸਾਂਝ ਰਹਿਣ ਵੇਲੇ ਵੀ ਇਸ ਖੇਤਰ ‘ਚ ਭਾਜਪਾ ਦੀ ਕਦੇ ਬੱਲੇ-ਬੱਲੇ ਨਹੀਂ ਹੋਈ।