ਕਿਸਾਨੀ ਸਮੱਸਿਆਵਾਂ ਦੇ ਹੱਲ ਲਈ ਮਹਾਪੰਚਾਇਤ

ਆਗੂਆਂ ਨੇ ਮੰਗਾਂ ਦੇ ਜਲਦੀ ਹੱਲ ਦੀ ਮੰਗ ਕੀਤੀ

Jagtar Samlasar

ਏਲਨਾਬਾਦ/ ਸਿਰਸਾ, 06:37 AM Jun 04, 2026 IST

ਮਹਾਪੰਚਾਇਤ ਵਿੱਚ ਮੌਜੂਦ ਕਿਸਾਨ ਅਤੇ ਮਜ਼ਦੂਰ।

ਏਲਨਾਬਾਦ/ ਸਿਰਸਾ (ਜਗਤਾਰ ਸਮਾਲਸਰ/ਪ੍ਰਭੂ ਦਿਆਲ): ਓਟੂ ਹੈੱਡ ’ਤੇ ਕਿਸਾਨੀ ਸਮੱਸਿਆਵਾਂ ਦੇ ਹੱਲ ਲਈ ਕਿਸਾਨਾਂ ਅਤੇ ਮਜ਼ਦੂਰਾਂ ਦੀ ਮਹਾਪੰਚਾਇਤ ਹੋਈ। ਇਸ ਦੌਰਾਨ ਕਿਸਾਨ ਨੇਤਾਵਾਂ ਸੁਵਰਨ ਸਿੰਘ ਵਿਰਕ, ਸਰਬਜੀਤ ਸਿੰਘ ਸਿੱਧੂ, ਸੁਰਜੀਤ ਸਿੰਘ, ਵਿਧਾਇਕ ਅਰਜੁਨ ਚੌਟਾਲਾ, ਸੰਤੋਸ਼ ਬੈਨੀਵਾਲ, ਸਾਬਕਾ ਵਿਧਾਇਕ ਬਲਵਾਨ ਪੂਨੀਆ, ਸੰਦੀਪ ਧੀਰਨਵਾਸ, ਸੁਰਿੰਦਰ ਸਿੱਧੂ,ਪ੍ਰਕਾਸ਼ ਮੁਮੇਰਾ ਤੇ ਸੁਮਿਤ ਬੈਨੀਵਾਲ ਆਦਿ ਨੇ ਹਿਸਾਰ-ਸਿਰਸਾ ਬਹੁਮੰਤਵੀ ਘੱਗਰ ਡਰੇਨ ਨਾਲ ਚੌਪਟਾ ਖੇਤਰ ਵਿੱਚ ਹਰ ਸਾਲ ਹੁੰਦੇ ਨੁਕਸਾਨ ਦੇ ਸਥਾਈ ਹੱਲ, ਐੱਸ ਜੀ ਸੀ ਨਹਿਰ ਅਤੇ ਢਾਣੀ ਸ਼ੇਰਾ ਫਲੱਡੀ ਨਹਿਰ ਵਿੱਚ ਸੇਮ ਦਾ ਪਾਣੀ ਛੱਡਣ ਦੀ ਬਜਾਇ ਘੱਗਰ ਨਦੀ ਦਾ ਪਾਣੀ ਛੱਡਣ, ਹਿਸਾਰ-ਘੱਗਰ ਡਰੇਨ ਦੀ ਖੁਦਾਈ ਕਰ ਕੇ ਬੰਨ੍ਹਾਂ ਨੂੰ ਮਜ਼ਬੂਤ ਕਰਨ ਦੀ ਮੰਗ ਕੀਤੀ। ਉਨ੍ਹਾਂ ਡਰੇਨ ਦੇ ਪਾਣੀ ਨੂੰ ਘੱਗਰ ਨਦੀ ਵਿੱਚ ਪਾਉਣ ਲਈ ਓਟੂ ਹੈੱਡ ਤੇ ਲਿਫਟ ਸਿੰਜਾਈ ਪ੍ਰਣਾਲੀ ਸਥਾਪਤ ਕਰ ਕੇ ਪਾਣੀ ਨੂੰ ਰੀਟਰੀਟ ਕਰ ਕੇ ਘੱਗਰ ਨਦੀ ਵਿੱਚ ਪਾਉਣ, ਓਟੂ ਹੈੱਡ ਦੀ ਖੁਦਾਈ ਕਰਨ ਅਤੇ ਘੱਗਰ ਵਿੱਚੋਂ ਨਿਕਲਦੀਆਂ ਨਹਿਰਾਂ ਦੀ ਸਫਾਈ ਕਰਨ ਦੀ ਮੰਗ ਕੀਤੀ। ਕਿਸਾਨ ਨੇਤਾਵਾਂ ਨੇ ਕਿਹਾ ਕਿ ਸਰਕਾਰ 1,700 ਕਰੋੜ ਰੁਪਏ ਦੀ ਲਾਗਤ ਨਾਲ ਹਿਸਾਰ ਘੱਗਰ ਬਹੁ-ਮੰਤਵੀ ਡਰੇਨ ਨੂੰ ਪੱਕਾ ਕਰਨ ਦਾ ਦਾਅਵਾ ਕਰਦੀ ਹੈ ਪਰ ਬਰਸਾਤ ਦੇ ਮੌਸਮ ਵਿੱਚ ਕੇਵਲ ਮਹੀਨਾ ਬਾਕੀ ਹੈ ਪਰ ਅਜੇ ਤੱਕ ਕੁਝ ਨਹੀਂ ਕੀਤਾ ਗਿਆ। ਡਰੇਨ ਦੀ ਸਫਾਈ ਨਾ ਹੋਣ ਕਾਰਨ ਕਿਸਾਨਾਂ ਨੂੰ ਕਾਫ਼ੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਡਰੇਨ ਦੇ ਟੁੱਟਣ ਕਾਰਨ ਹਰ ਸਾਲ ਕਈ ਪਿੰਡਾਂ ਦੀਆਂ ਫਸਲਾਂ ਡੁੱਬ ਜਾਂਦੀਆਂ ਹਨ ਅਤੇ ਲੋਕ ਬੇਘਰ ਹੋ ਜਾਂਦੇ ਹਨ। ਅੱਜ ਵੀ ਬਹੁਤ ਸਾਰੇ ਖੇਤਾਂ ਵਿੱਚ ਪਾਣੀ ਖੜ੍ਹਾ ਹੈ। ਹਿਸਾਰ ਘੱਗਰ ਡਰੇਨ ਕਾਰਨ ਚੌਪਟਾ ਖੇਤਰ ਵਿੱਚ ਹਰ ਸਾਲ ਕਿਸਾਨਾਂ ਦਾ ਵੱਡਾ ਨੁਕਸਾਨ ਹੁੰਦਾ ਹੈ ਪਰ ਸਰਕਾਰ ਕੋਈ ਸੁਣਵਾਈ ਨਹੀਂ ਕਰ ਰਹੀ। ਕਿਸਾਨ ਆਗੂਆਂ ਨੇ ਚਿਤਾਵਨੀ ਦਿੱਤੀ ਕਿ ਉਨ੍ਹਾਂ ਦੀਆਂ ਮੰਗਾਂ ਪੂਰੀਆਂ ਨਾ ਹੋਣ ਤੱਕ ਵਿਰੋਧ ਜਾਰੀ ਰਹੇਗਾ। ਇਸ ਮੌਕੇ ਪੁਲੀਸ ਪ੍ਰਸ਼ਾਸਨ ਵੱਲੋਂ ਵੀ ਸੁਰੱਖਿਆ ਦੇ ਪੁਖਤਾ ਪ੍ਰਬੰਧ ਕੀਤੇ ਗਏ ਸਨ। ਇਸ ਮੌਕੇ ਪਾਲਾ ਸਿੰਘ ਚੀਮਾ, ਗੁਰਦੀਪ ਸਿੰਘ ਗੁਰਾਇਆ, ਸੇਵਾ ਸਿੰਘ, ਰਾਜ ਕੁਮਾਰ ਸ਼ੇਖੂਪੁਰੀਆ, ਰਾਜਿੰਦਰ ਬਾਲਾਸਰ, ਇੰਦਰਜੀਤ ਸਿੰਘ, ਜਸਵੀਰ ਸਿੰਘ ਭਾਟੀ, ਗੁਰਦਾਸ ਸਿੰਘ ਲੱਕੜਾਵਾਲੀ, ਡਾ. ਰਾਧੇ ਸ਼ਿਆਮ ਸਮੇਤ ਵੱਡੀ ਗਿਣਤੀ ਵਿੱਚ ਕਿਸਾਨ ਤੇ ਮਜ਼ਦੂਰ ਹਾਜ਼ਰ ਸਨ।

Tags :