ਮੀਂਹ ਮਗਰੋਂ Interlocking Tiles ਉੱਖੜੀਆਂ

ਹੁੱਡਾ ਕਲੋਨੀ ਵਿੱਚ ਹਾਲ ਹੀ ਵਿੱਚ ਮੀਂਹ ਦੇ ਪਾਣੀ ਦੀ ਨਿਕਾਸੀ ਵਾਸਤੇ ਬਣਾਏ ਚੈਂਬਰ ਦੀ ਉਸਾਰੀ ’ਤੇ ਸਵਾਲ ਖੜ੍ਹੇ ਹੋ ਗਏ ਹਨ। ਇਲਾਕਾ ਨਿਵਾਸੀਆਂ ਨੇ ਚੈਂਬਰ ਦੀ ਗੁਣਵੱਤਾ ਬਹੁਤ ਮਾੜੀ ਹੋਣ ਦੇ ਦੋਸ਼ ਲਾਏ ਹੈ। ਉਨ੍ਹਾਂ ਅਨੁਸਾਰ ਮੌਨਸੂਨ ਦੇ ਪਹਿਲੇ ਹਲਕੇ ਮੀਂਹ ਨਾਲ ਹੀ ਚੈਂਬਰ ਧਸ ਗਿਆ ਹੈ ਅਤੇ ਇੰਟਰਲੌਕਿੰਗ ਉੱਖੜ ਗਈ ਹੈ। ਸੁਰੱਖਿਆ ਲਈ ਲਾਇਆ ਲੋਹੇ ਦਾ ਜਾਲ ਵੀ ਇੱਕ ਪਾਸੇ ਝੁਕ ਗਿਆ ਹੈ।

ਕਲੋਨੀ ਵਾਸੀ ਨਰੇਸ਼ ਸਰਦਾਨਾ, ਆਜ਼ਾਦੀ ਘੁਲਾਟੀਏ ਰਾਮ ਲਾਲ ਮਹਿਤਾ ਅਤੇ ਸਮਾਜ ਸੇਵੀ ਬੱਬਲੂ ਸ਼ੇਖਾਵਤ ਨੇ ਦੱਸਿਆ ਕਿ ਮੀਂਹ ਦਾ ਮੌਸਮ ਅਜੇ ਪੂਰੀ ਤਰ੍ਹਾਂ ਸ਼ੁਰੂ ਨਹੀਂ ਹੋਇਆ ਪਰ ਹਲਕੇ ਮੀਂਹ ਨੇ ਹੀ ਅਸਲੀਅਤ ਸਾਹਮਣੇ ਲਿਆ ਦਿੱਤੀ ਹੈ। ਉਨ੍ਹਾਂ ਖਦਸ਼ਾ ਪ੍ਰਗਟਾਇਆ ਕਿ ਭਾਰੀ ਮੀਂਹ ਪੈਣ ਉੱਤੇ ਸਥਿਤੀ ਹੋਰ ਵਿਗੜ ਸਕਦੀ ਹੈ। ਚੈਂਬਰ ਦੇ ਆਲੇ ਦੁਆਲੇ ਪਏ ਟੋਏ ਲੋਕਾਂ ਲਈ ਹਾਦਸਿਆਂ ਦਾ ਕਾਰਨ ਬਣ ਸਕਦੇ ਹਨ।

ਕਲੋਨੀ ਵਾਸੀਆਂ ਨੇ ਦੋਸ਼ ਲਾਇਆ ਕਿ ਨਿਰਮਾਣ ਦੌਰਾਨ ਤੈਅ ਮਾਪਦੰਡਾਂ ਵੱਲ ਧਿਆਨ ਨਹੀਂ ਦਿੱਤਾ ਗਿਆ। ਇਸ ਨਾਲ ਸਰਕਾਰੀ ਫੰਡਾਂ ਦੀ ਬਰਬਾਦੀ ਹੋਈ ਹੈ ਅਤੇ ਲੋਕਾਂ ਦੀ ਸੁਰੱਖਿਆ ਨੂੰ ਖ਼ਤਰੇ ਵਿੱਚ ਪਾਇਆ ਗਿਆ ਹੈ। ਲੋਕਾਂ ਨੇ ਮੰਗ ਕੀਤੀ ਹੈ ਕਿ ਅਧਿਕਾਰੀ ਮੌਕੇ ਦਾ ਮੁਆਇਨਾ ਕਰਨ ਅਤੇ ਨਿਰਪੱਖ ਜਾਂਚ ਕੀਤੀ ਜਾਵੇ। ਦੋਸ਼ੀ ਠੇਕੇਦਾਰ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ ਅਤੇ ਆਗਾਮੀ ਮੀਂਹ ਤੋਂ ਪਹਿਲਾਂ ਚੈਂਬਰ ਦੀ ਮੁਰੰਮਤ ਤੈਅ ਮਿਆਰਾਂ ਅਨੁਸਾਰ ਕੀਤੀ ਜਾਵੇ।