ਬੈਂਕ ਦੀਆਂ ਕਿਸ਼ਤਾਂ ਨਾ ਭਰਨ ’ਤੇ ਮਕਾਨ ਸੀਲ

ਪੱਤਰ ਪ੍ਰੇਰਕ

ਅਬੋਹਰ, 20 ਜੂਨ

ਇਥੋਂ ਦੇ ਭਗਵਾਨਪੁਰਾ ਮੁਹੱਲੇ ਵਿੱਚ ਇੰਡੀਅਨ ਬੈਂਕ ਨੇ ਇੱਕ ਵਿਅਕਤੀ ਦੇ ਘਰ ਨੂੰ ਸੀਲ ਕਰ ਦਿੱਤਾ ਹੈ ਅਤੇ ਬੈਂਕ ਦਾ ਕਰਜ਼ਾ ਨਾ ਚੁਕਾਉਣ ’ਤੇ ਨੋਟਿਸ ਲਾ ਦਿੱਤੇ ਹਨ। ਜ਼ਿਕਰਯੋਗ ਹੈ ਕਿ ਉਕਤ ਵਿਅਕਤੀ ਲਗਪਗ 9 ਮਹੀਨੇ ਪਹਿਲਾਂ ਇੱਥੋਂ ਦੇ ਲੋਕਾਂ ਦੇ ਲੱਖਾਂ ਰੁਪਏ ਦੇ ਕਮੇਟੀ ਦੇ ਪੈਸੇ ਲੈ ਕੇ ਫਰਾਰ ਹੋ ਗਿਆ ਸੀ। ਜਾਣਕਾਰੀ ਮੁਤਾਬਕ ਭਗਵਾਨਪੁਰਾ ਮੁਹੱਲੇ ਦੀ ਗਲੀ ਨੰਬਰ 0 ਦਾ ਰਹਿਣ ਵਾਲਾ ਰਮਨ ਕੁਮਾਰ ਲਗਪਗ 9 ਮਹੀਨੇ ਪਹਿਲਾਂ ਕਈ ਲੋਕਾਂ ਦੇ ਕਮੇਟੀ ਦੇ ਲੱਖਾਂ ਰੁਪਏ ਲੈ ਕੇ ਰਾਤੋ-ਰਾਤ ਆਪਣੇ ਪਰਿਵਾਰ ਸਮੇਤ ਫਰਾਰ ਹੋ ਗਿਆ ਸੀ। ਰਮਨ ਨੇ ਆਪਣੇ ਘਰ ’ਤੇ ਇੰਡੀਅਨ ਬੈਂਕ ਤੋਂ ਕਰਜ਼ਾ ਵੀ ਲਿਆ ਹੋਇਆ ਸੀ। ਬੈਂਕ ਦੀਆਂ ਕਿਸ਼ਤਾਂ ਪਿੱਛਲੇ 9 ਮਹੀਨਿਆਂ ਤੋਂ ਨਾ ਭਰਨ ’ਤੇ ਅੱਜ ਬੈਂਕ ਅਧਿਕਾਰੀਆਂ ਨੇ ਘਰ ਨੂੰ ਸੀਲ ਕਰ ਦਿੱਤਾ ਅਤੇ ਉਸ ’ਤੇ ਨੋਟਿਸ ਵੀ ਚਿਪਕਾ ਦਿੱਤੇ। ਇਹ ਘਰ ਰਮਨ ਦੀ ਪਤਨੀ ਸੋਨੀਆ ਰਾਣੀ ਦੇ ਨਾਮ ’ਤੇ ਰਜਿਸਟਰਡ ਦੱਸਿਆ ਜਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਕਈ ਲੋਕਾਂ ਨੇ ਰਮਨ ਕੁਮਾਰ ਕੋਲ ਲੱਖਾਂ ਰੁਪਏ ਜਮ੍ਹਾਂ ਕਰਵਾਏ ਹੋਏ ਸਨ, ਪਰ ਉਹ ਰਾਤੋ-ਰਾਤ ਇੱਥੋਂ ਸਾਰਿਆਂ ਦੇ ਪੈਸੇ ਲੈ ਕੇ ਫਰਾਰ ਹੋ ਗਿਆ।