Haryana Transport: ਰੂਟ ਪਰਮਿਟ ਅਰਜ਼ੀਆਂ ਦਾ ਮਾਮਲਾ ਭਖਿਆ

ਡੱਬਵਾਲੀ, ਔਢਾਂ, ਕਾਲਾਂਵਾਲੀ ਅਤੇ ਰੋੜੀ ਦੀਆਂ 13 ਸਹਿਕਾਰੀ ਟਰਾਂਸਪੋਰਟ ਸੁਸਾਇਟੀਆਂ ਨੇ ਮੁੱਖ ਮੰਤਰੀ ਅਤੇ ਟਰਾਂਸਪੋਰਟ ਮੰਤਰੀ ਨੂੰ ਸਾਂਝਾ ਇਤਰਾਜ਼ ਪੱਤਰ ਭੇਜਿਆ ਹੈ। ਉਨ੍ਹਾਂ ਨਵੇਂ ਪਰਮਿਟਾਂ ਤੋਂ ਪਹਿਲਾਂ ਰੂਟਾਂ ਦੀਆਂ ਖਾਮੀਆਂ ਦੂਰ ਕਰਨ, ਸਵਾਰੀਆਂ ਦੀ ਗਿਣਤੀ ਦੇ ਆਧਾਰ ’ਤੇ ਆਰਥਿਕ ਸਰਵੇਖਣ ਕਰਵਾਉਣ ਅਤੇ ਰੋਡਵੇਜ਼ ਤੇ ਨਿੱਜੀ ਬੱਸਾਂ ਦੇ ਪੁਰਾਣੇ-ਨਵੇਂ ਪਰਮਿਟਾਂ ਦਾ ਅਨੁਪਾਤ ਜਨਤਕ ਕਰਨ ਦੀ ਮੰਗ ਕੀਤੀ ਹੈ।

ਟਰਾਂਸਪੋਰਟ ਸੁਸਾਇਟੀਆਂ ਮੁਤਾਬਕ ਉਨ੍ਹਾਂ ਵੱਲੋਂ ਸੀਡਬਲਿਊਪੀ 5975/2025 ਦੀ ਸੁਣਵਾਈ ਦੌਰਾਨ ਸਰਕਾਰ ਨੇ ਖਾਮੀਆਂ ਸੁਧਾਰ ਰੂਟ ਪਰਮਿਟ ਗਿਣਤੀ ਤੈਅ ਕਰਨ ਦਾ ਭਰੋਸਾ ਦਿੱਤਾ ਸੀ। ਇਸ ਦੇ ਬਾਵਜੂਦ ਸਿਰਸਾ ਜ਼ਿਲ੍ਹੇ ਦੇ 24 ਰੂਟਾਂ ’ਤੇ ਕਰੀਬ 180 ਪਰਮਿਟਾਂ ਲਈ ਅਰਜ਼ੀਆਂ ਮੰਗੀਆਂ ਗਈਆਂ ਹਨ। ਸਹਿਕਾਰੀ ਬੱਸ ਸੰਚਾਲਕਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਰੂਟਾਂ ’ਤੇ ਪਹਿਲਾਂ ਹੀ ਸਹਿਕਾਰੀ ਅਤੇ ਰੋਡਵੇਜ਼ ਦੀਆਂ ਬੱਸਾਂ ਚੱਲ ਰਹੀਆਂ ਹਨ।

ਗੁਰੂ ਨਾਨਕ ਟਰਾਂਸਪੋਰਟ ਸਹਿਕਾਰੀ ਸੁਸਾਇਟੀ ਦੇ ਚਮਨਦੀਪ ਕੁਲਾਰ ਤੇ ਬੂਟਾ ਸਿੰਘ ਸਿੱਧੂ ਨੇ ਕਿਹਾ ਕਿ ਬਿਨਾਂ ਜ਼ਮੀਨੀ ਜਾਂਚ ਵੱਧ ਪਰਮਿਟ ਜਾਰੀ ਹੋਣ ਨਾਲ ਪੁਰਾਣੇ ਅਤੇ ਨਵੇਂ ਅਪਰੇਟਰਾਂ ਲਈ ਸਮੁੱਚਾ ਕਾਰੋਬਾਰ ਘਾਟੇ ਦਾ ਸੌਦਾ ਬਣ ਸਕਦਾ ਹੈ। ਜਸਪ੍ਰੀਤ ਸਿੰਘ ਤੇ ਮਲਕੀਤ ਸਿੰਘ ਨੇ ਕਿਹਾ ਕਿ ਰੂਟ 236 ਹਟਣ ਨਾਲ ਡੱਬਵਾਲੀ-ਕਾਲਾਂਵਾਲੀ ਖੇਤਰ ਦੇ 21 ਪਿੰਡਾਂ ਦੀ ਬੱਸ ਸੇਵਾ ਪ੍ਰਭਾਵਿਤ ਹੋ ਸਕਦੀ ਹੈ। ਅਪਰੇਟਰਾਂ ਨੇ ਚਿਤਾਵਨੀ ਦਿੱਤੀ ਕਿ ਮਸਲਾ ਹੱਲ ਨਾ ਹੋਇਆ ਤਾਂ ਉਹ ਮੁੜ ਹਾਈ ਕੋਰਟ ਦਾ ਰੁਖ ਕਰਨਗੇ।