ਘੁਬਾਇਆ, ਪਿੰਕੀ ਅਤੇ ਬੰਗੜ ਨੇ ਹਸਪਤਾਲ ’ਚ ਦਾਖ਼ਲ ਬੱਚਿਆਂ ਦਾ ਹਾਲ ਜਾਣਿਆ

ਦੱਸਣਯੋਗ ਹੈ ਕਿ ਪਿੰਡ ਹਜ਼ਾਰਾ ਸਿੰਘ ਵਿੱਚ ਦੂਸ਼ਿਤ ਪਾਣੀ ਦੀ ਸਪਲਾਈ ਕਾਰਨ ਇੱਕ ਲੜਕੀ ਦੀ ਮੌਤ ਹੋ ਗਈ ਸੀ ਅਤੇ 16 ਬੱਚੇ ਪੀਲੀਆ ਤੋਂ ਪੀੜਤ ਹਨ। ਪਿੰਡ ਵਿੱਚ ਲੈਪਟੋਸਪਾਇਰੋਸਿਸ ਦੇ 19 ਨਵੇਂ ਮਾਮਲੇ ਸਾਹਮਣੇ ਆਏ ਹਨ, ਜੋ ਚੂਹੇ, ਕੁੱਤੇ ਅਤੇ ਪਸ਼ੂਆਂ ਦੇ ਮਲ ਦੇ ਪਾਣੀ ਵਿੱਚ ਮਿਲਣ ਨਾਲ ਫੈਲਣ ਵਾਲੀ ਬਿਮਾਰੀ ਹੈ। ਪਾਣੀ ਦੇ 12 ਨਮੂਨੇ ਜਾਂਚ ਲਈ ਭੇਜੇ ਗਏ ਸਨ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਫੇਲ੍ਹ ਹੋ ਗਏ ਹਨ।

ਪਿੰਡ ਵਾਸੀਆਂ ਨੇ ਦੋਸ਼ ਲਾਇਆ ਕਿ ਪਿੰਡ ਵਿੱਚ ਪਿਛਲੇ 15 ਦਿਨਾਂ ਤੋਂ ਦੂਸ਼ਿਤ ਪਾਣੀ ਆ ਰਿਹਾ ਹੈ, ਪਰ ਸ਼ਿਕਾਇਤਾਂ ਦੇ ਬਾਵਜੂਦ ਸਮੱਸਿਆ ਦਾ ਹੱਲ ਨਹੀਂ ਹੋਇਆ। ਪਿੰਡ ਵਾਸੀ ਮਨਜੀਤ ਸਿੰਘ ਦੀ 13 ਸਾਲਾ ਧੀ ਸੇਜਲ ਦੀ ਇਸ ਦੂਸ਼ਿਤ ਪਾਣੀ ਨੂੰ ਪੀਣ ਕਾਰਨ ਮੌਤ ਹੋ ਗਈ ਹੈ ਜਦਕਿ ਕਈ ਹੋਰ ਬੱਚੇ ਬਿਮਾਰ ਹੋਣ ਤੋਂ ਬਾਅਦ ਹਸਪਤਾਲ ਵਿੱਚ ਦਾਖ਼ਲ ਹਨ। ਪਿੰਡ ਵਾਸੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਕੋਈ ਸਥਾਈ ਹੱਲ ਨਾ ਲੱਭਿਆ ਗਿਆ ਤਾਂ ਵੱਡਾ ਪ੍ਰਦਰਸ਼ਨ ਸ਼ੁਰੂ ਕੀਤਾ ਜਾਵੇਗਾ। ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਪਿੰਡ ਵਿੱਚ ਤਕਰੀਬਨ 45 ਸਾਲ ਪੁਰਾਣੀ ਪਾਈਪਲਾਈਨ ਨੂੰ ਅਜੇ ਤੱਕ ਬਦਲਿਆ ਨਹੀਂ ਗਿਆ। ਪਾਈਪਲਾਈਨ ਦੇ ਖਰਾਬ ਹੋਣ ਕਾਰਨ ਇਹ ਲੀਕ ਹੋ ਰਹੀ ਹੈ, ਜਿਸ ਕਾਰਨ ਸੀਵਰੇਜ ਦਾ ਪਾਣੀ ਪੀਣ ਵਾਲੇ ਪਾਣੀ ਦੀ ਸਪਲਾਈ ਵਿੱਚ ਰਲ ਜਾਂਦਾ ਹੈ। ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਵਿਰੋਧ ਉਦੋਂ ਤੱਕ ਜਾਰੀ ਰਹੇਗਾ ਜਦੋਂ ਤੱਕ ਪਿੰਡ ਵਿੱਚ ਨਵੀਂ ਪਾਈਪਲਾਈਨ ਨਹੀਂ ਵਿਛਾਈ ਜਾਂਦੀ ਅਤੇ ਸਾਫ਼ ਪਾਣੀ ਦੀ ਸਥਾਈ ਸਪਲਾਈ ਸਥਾਪਤ ਨਹੀਂ ਹੋ ਜਾਂਦੀ।