ਜੈਵ ਵਿਭਿੰਨਤਾ ਦਿਵਸ ਨੂੰ ਸਮਰਪਿਤ ਸਮਾਗਮ

ਖੇਤੀ ਵਿਰਾਸਤ ਮਿਸ਼ਨ ਦੇ ਮੀਡੀਆ ਇੰਚਾਰਜ ਹਰਮੇਲ ਪਰੀਤ ਨੇ ਜੈਵ ਵਿਭਿੰਨਤਾ, ਖੇਤੀ, ਭੋਜਨ, ਚੌਗਿਰਦੇ ਅਤੇ ਜੀਵਨ ਜਾਚ ਵਿੱਚ ਵਿਭਿੰਨਤਾ ਦੀ ਅਹਿਮੀਅਤ ਬਾਰੇ ਜਾਣਕਾਰੀ ਦਿੱਤੀ। ਇਸ ਮੌਕੇ ਜੈਵ ਵਿਭਿੰਨਤਾ ਅਤੇ ਤ੍ਰਿੰਝਣ ਸਫ਼ਰ ਨਾਲ ਸਬੰਧਤ ਦਸਤਾਵੇਜ਼ੀ ਫ਼ਿਲਮਾਂ ਵੀ ਦਿਖਾਈਆਂ ਗਈਆਂ।

ਕੇ ਵੀ ਐੱਮ ਦੀ ਟੀਮ ਵੱਲੋਂ ਪੇਸ਼ ਨੁੱਕੜ ਨਾਟਕ ‘ਬੇਬੇ ਦੀ ਰਸੋਈ’ ਨੇ ਦੇਸੀ ਖੁਰਾਕਾਂ ਅਤੇ ਜੈਵ ਵਿਭਿੰਨਤਾ ਦੇ ਮਹੱਤਵ ਨੂੰ ਉਭਾਰਿਆ। ਨਾਟਕ ਵਿੱਚ ਰਮੇਸ਼ ਮਾਂਡੀਆ, ਸੁਖਵਿੰਦਰ ਸਿੰਘ ਹੈਪੀ, ਰਾਣੀ, ਕਰੀਨਾ ਬਾਂਸਲ, ਸੌਰਭ ਸੈਣੀ ਅਤੇ ਮਾਸਟਰ ਸ਼ਿਵਮ ਮਾਂਡੀਆ ਨੇ ਭੂਮਿਕਾਵਾਂ ਨਿਭਾਈਆਂ। ਰਾਣੀ ਅਤੇ ਮਨਦੀਪ ਕੌਰ ਨੇ ਲਘੂ ਨਾਟਕ ਪੇਸ਼ ਕੀਤਾ। ਸਰਬਜੀਤ ਕੌਰ ਅਤੇ ਜਸਵੀਰ ਕੌਰ ਨੇ ਰਵਾਇਤੀ ਚਟਨੀਆਂ ਅਤੇ ਸ਼ਰਬਤਾਂ ਦੇ ਸਿਹਤ ਲਾਭਾਂ ਬਾਰੇ ਜਾਣਕਾਰੀ ਦਿੱਤੀ ਜਦਕਿ ਰੂਪਸੀ ਗਰਗ ਨੇ ਤ੍ਰਿੰਝਣ ਯਾਤਰਾ ਦੇ ਅਨੁਭਵ ਸਾਂਝੇ ਕੀਤੇ।

ਗੁਰਪ੍ਰੀਤ ਕੌਰ, ਮਨਦੀਪ ਕੌਰ, ਰਜਨੀ ਅਤੇ ਰਵਿੰਦਰ ਦੀ ਕੋਰੀਓਗ੍ਰਾਫੀ ‘ਜ਼ਹਿਰਾਂ ਮੁਕਤ ਪੰਜਾਬ’ ਨੇ ਕੁਦਰਤੀ ਖੇਤੀ ਦਾ ਸੰਦੇਸ਼ ਦਿੱਤਾ। ਉਮੇਂਦਰ ਦੱਤ ਨੇ ਖੇਤੀ, ਭੋਜਨ ਅਤੇ ਚੌਗਿਰਦੇ ਵਿੱਚ ਘਟ ਰਹੀ ਵਿਭਿੰਨਤਾ ਬਾਰੇ ਚਿੰਤਾ ਪ੍ਰਗਟ ਕੀਤੀ। ਗੋਰਾ ਸਿੰਘ ਨੇ ਗੀਤ ਰਾਹੀਂ ਗੁੰਮ ਹੋ ਰਹੀਆਂ ਖੇਤੀ ਰਵਾਇਤਾਂ ਨੂੰ ਉਜਾਗਰ ਕੀਤਾ। ਸਕੂਲੀ ਵਿਦਿਆਰਥਣਾਂ ਨੇ ਤ੍ਰਿੰਝਣ ਅਤੇ ਗਿੱਧੇ ਨਾਲ ਦਰਸ਼ਕਾਂ ਦਾ ਮਨ ਮੋਹ ਲਿਆ। ਅੰਤ ਵਿੱਚ ਬੁਣਕਰਾਂ, ਕਲਾਕਾਰਾਂ ਅਤੇ ਸਹਿਯੋਗੀਆਂ ਨੂੰ ਸਨਮਾਨਿਤ ਕੀਤਾ ਗਿਆ। ਮੰਚ ਸੰਚਾਲਨ ਸੌਰਭ ਸੈਣੀ ਨੇ ਕੀਤਾ।