ਸ਼ਗਨ ਕਟਾਰੀਆ/ਗੁਰਸੇਵਕ ਸਿੰਘ ਪ੍ਰੀਤ
ਬਠਿੰਡਾ/ਸ੍ਰੀ ਮੁਕਤਸਰ ਸਾਹਿਬ, 4 ਅਗਸਤ
ਪਾਣੀ ਦੀ ਵਾਰੀ ਅਤੇ ਨਵੇਂ ਨੱਕੇ ਲਵਾਉਣ ਦੇ ਬਦਲੇ 13 ਹਜ਼ਾਰ ਰੁਪਏ ਦੀ ਕਥਿਤ ਰਿਸ਼ਵਤ ਵਜੋਂ ਪਹਿਲੀ ਕਿਸ਼ਤ ਵਸੂਲ ਕਰਦੇ ਹੋਏ ਨਹਿਰੀ ਵਿਭਾਗ ਕੋਟਕਪੂਰਾ ਦੇ ਜ਼ਿਲ੍ਹੇਦਾਰ ਤੇ ਪਟਵਾਰੀ ਨੂੰ ਚੌਕਸੀ ਵਿਭਾਗ ਮੁਕਤਸਰ ਨੇ ਰੰਗੇ ਹੱਥੀਂ ਕਾਬੂ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਡੀ. ਐੱਸ. ਵੀ. ਵਿਜੀਲੈਂਸ (ਮੁਕਤਸਰ) ਗੁਰਿੰਦਰਜੀਤ ਸਿੰਘ ਸੰਧੂ ਨੇ ਦੱਸਿਆ ਕਿ ਪਿੰਡ ਹਰੀ ਕੇ ਕਲਾਂ ਦੇ ਕਿਸਾਨ ਗੁਰਵਿੰਦਰ ਸਿੰਘ ਦੀ 20 ਕਿਲੇ ਜ਼ਮੀਨ ਨੂੰ ਨਵੇਂ ਮੋਘੇ ਤੋਂ ਪਾਣੀ ਲੱਗਦਾ ਸੀ ਪਰ ਇਸ ਦੀ ਕੋਈ ਪੱਕੀ ਵਾਰੀ ਨਹੀਂ ਸੀ। ਇਸ ਕਰਕੇ ਗੁਰਵਿੰਦਰ ਸਿੰਘ ਨੇ ਆਪਣੀ ਜ਼ਮੀਨ ਲਈ ਪੱਕੀ ਵਾਰੀ ਬਨਾਉਣ ਅਤੇ ਦੂਸਰੇ ਖਾਲ ਵਿੱਚ ਤਿੰਨ ਨੱਕੇ ਲਵਾਉਣ ਲਈ ਜ਼ਿਲ੍ਹੇਦਾਰ ਪ੍ਰਸ਼ੋਤਮ ਦਾਸ ਅਤੇ ਪਟਵਾਰੀ ਸੁਖਮੰਦਰ ਕੁਮਾਰ ਨੂੰ ਮਿਲਿਆ ਤਾਂ ਦੋਹਾਂ ਕਰਮਚਾਰੀਆਂ ਨੇ ਉਸ ਕੋਲੋਂ 7 ਹਜ਼ਾਰ ਰੁਪਏ ਕਥਿਤ ਰਿਸ਼ਵਤ ਵਜੋਂ ਲੈ ਲਏ ਪਰ ਬਾਅਦ ਵਿੱਚ ਹੋਰ ਪੈਸੇ ਨਾ ਦੇਣ ’ਤੇ ਗੁਰਵਿੰਦਰ ਸਿੰਘ ਦਾ ਕੇਸ ਡਿਸਮਿਸ ਕਰ ਦਿੱਤਾ ਅਤੇ ਦੁਬਾਰਾ ਕੇਸ ਪਾਸ ਕਰਨ ਲਈ ਦੋਹਾਂ ਜਣਿਆਂ ਨੇ ਕਥਿਤ ਤੌਰ ’ਤੇ 30 ਹਜ਼ਾਰ ਰੁਪਏ ਰਿਸ਼ਵਤ ਦੀ ਮੰਗ ਕੀਤੀ। ਮਜ਼ਬੂਰੀ ਵਿੱਚ ਗੁਰਵਿੰਦਰ ਸਿੰਘ ਨੇ 26 ਹਜ਼ਾਰ ਰੁਪਏ ’ਚ ਸੌਦਾ ਤੈਅ ਕਰ ਲਿਆ ਅਤੇ ਇਸ ਦੀਆਂ 13-13 ਹਜ਼ਾਰ ਰੁਪਏ ਦੀਆਂ ਦੋ ਕਿਸ਼ਤਾਂ ਤੈਅ ਕਰ ਲਈਆਂ। ਮੁਲਜ਼ਮਾਂ ਨੇ ਮੰਗਲਵਾਰ ਨੂੰ ਪਹਿਲੀ ਕਿਸ਼ਤ ਰੇਲਵੇ ਸਟੇਸ਼ਨ ਕੋਟਕਪੂਰਾ ਨੇੜੇ ਲੈਣੀ ਸੀ ਕਿ ਗੁਰਵਿੰਦਰ ਸਿੰਘ ਨੇ ਇਸ ਮਾਮਲੇ ਸਬੰਧੀ ਚੌਕਸੀ ਵਿਭਾਗ ਮੁਕਤਸਰ ਨੂੰ ਸੂਚਨਾ ਦੇ ਦਿੱਤੀ ਜਿਸ ’ਤੇ ਕਾਰਵਾਈ ਕਰਦਿਆਂ ਚੌਕਸੀ ਵਿਭਾਗ ਨੇ ਦੋਹਾਂ ਮੁਲਜ਼ਮਾਂ ਨੂੰ ਰੰਗੇ ਹੱਥੀਂ ਕਾਬੂ ਕਰ ਲਿਆ। ਇਸ ਸਬੰਧੀ ਚੌਕਸੀ ਥਾਣਾ ਬਠਿੰਡਾ ਵਿਖੇ ਦੋਹਾਂ ਮੁਲਜ਼ਮਾਂ ਦੇ ਖਿਲਾਫ ਕੇਸ ਦਰਜ ਕਰ ਲਿਆ ਗਿਆ ਹੈ। ਵਿਜੀਲੈਂਸ ਵਿਭਾਗ ਨੇ ਸਰਕਾਰੀ ਗਵਾਹਾਂ ਦੀ ਹਾਜ਼ਰੀ ਵਿੱਚ ਮੁਲਜ਼ਮਾਂ ਤੋਂ ਰਾਸ਼ੀ ਬਰਾਮਦ ਕਰ ਲਈ ਹੈ।