ਅਵਤਾਰ ਸਿੰਘ ਧਾਲੀਵਾਲ
ਭਾਈਰੂਪਾ, 4 ਮਈ
ਕੋਆਪਰੇਟਿਵ ਸੁਸਾਇਟੀ ਸੇਲਬਰਾਹ ਵਿੱਚ ਸਕੱਤਰ ਅਤੇ ਸੇਲਜ਼ਮੈਨ ਦੀ ਖਾਲੀ ਪੋਸਟ ਕਾਰਨ ਵਸੂਲੀ ਅਤੇ ਖਾਦ ਸਬੰਧੀ ਆ ਰਹੀਆਂ ਮੁਸ਼ਕਲਾਂ ਹੱਲ ਕਰਵਾਉਣ ਲਈ ਸਭਾ ਦੇ ਖਾਤਾਧਾਰਕ ਮੈਂਬਰਾਂ ਨੇ ਸੁਸਾਇਟੀ ਅੰਦਰ ਧਰਨਾ ਦਿੱਤਾ। ਇਸ ਮੌਕੇ ਬਰਜਿੰਦਰ ਸਿੰਘ ਰਿੰਪੀ, ਜਤਿੰਦਰ ਸਿੰਘ ਵਿੱਕੀ, ਗੁਰਲਾਭ ਸਿੰਘ ਨੇ ਕਿਹਾ ਕਿ ਇਸ ਵੇਲੇ ਸਭਾ ਵਿੱਚ ਕੋਈ ਵੀ ਰੈਗੂਲਰ ਜਾਂ ਸਭਾ ਦੀ ਪ੍ਰਬੰਧਕੀ ਕਮੇਟੀ ਅਧੀਨ ਕੋਈ ਆਰਜ਼ੀ ਡਿਊਟੀ ਕਰਨ ਵਾਲਾ ਸੇਲਜ਼ਮੈਨ, ਸੈਕਟਰੀ ਨਹੀਂ ਹੈ, ਜਿਸ ਕਾਰਨ ਸੁਸਾਇਟੀ ਨਾਲ ਲੈਣ ਦੇਣ ਕਰਨ ਵਾਲੇ ਕਿਸਾਨਾਂ ਨੂੰ ਸਮੱਸਿਆਵਾਂ ਆ ਰਹੀਆਂ ਹਨ। ਉਪਰੋਕਤ ਵਿਅਕਤੀਆਂ ਨੇ ਸਭਾ ਦੀ ਪ੍ਰਬੰਧਕੀ ਕਮੇਟੀ ਦੇ ਨਾਮ ਮੰਗ ਪੱਤਰ ਦਿੱਤਾ ’ਤੇ ਕਿਹਾ ਕਿ ਪ੍ਰਬੰਧਕ ਕਮੇਟੀ ਬੁੱਧਵਾਰ ਸਵੇਰ 9:30 ਵਜੇ ਤੱਕ ਲਿਖਤੀ ਮਤਾ ਪਾ ਕੇ ਜਵਾਬ ਦਿੱਤਾ ਜਾਵੇ। ਸਭਾ ਦੇ ਪ੍ਰਧਾਨ ਨਿਰਮਲ ਸਿੰਘ ਨੇ ਕਿਹਾ ਕਿ ਸੁਸਾਇਟੀ ਪਹਿਲਾਂ ਹੀ ਘਾਟੇ ਵਿੱਚ ਚੱਲ ਰਹੀ ਹੈ ਅਤੇ ਦੋ ਸੇਵਾਮੁਕਤ ਮੁਲਾਜ਼ਮਾਂ ਦੀ 22 ਮਹੀਨਿਆਂ ਦੀ ਤਨਖਾਹ ਸਭਾ ਵੱਲੋਂ ਹਾਲੇ ਤੱਕ ਨਹੀਂ ਦਿੱਤੀ ਗਈ, ਪਰ ਆਰਜ਼ੀ ਪ੍ਰਬੰਧ ਕਰਨ ਲੱਗੇ ਹੋਏ ਹਨ।