ਬਠਿੰਡਾ (ਨਿੱਜੀ ਪੱਤਰ ਪ੍ਰੇਰਕ): ਮਾਲਵਾ ਖਿੱਤਾ ਅੱਜ ਸਰਦ ਹਵਾਵਾਂ ਅਤੇ ਸੰਘਣੀ ਧੁੰਦ ਦੀ ਲਪੇਟ ’ਚ ਜਕੜਿਆ ਰਿਹਾ। ਇਹ ਸਥਿਤੀ ਰਾਤ ਤੋਂ ਬਣੀ ਹੋਈ ਸੀ। ਧੁੰਦ ਕਾਰਨ ਸੜਕੀ ਅਤੇ ਰੇਲ ਆਵਾਜਾਈ ਦੀ ਰਫ਼ਤਾਰ ਪ੍ਰਭਾਵਿਤ ਹੋਈ। ਬਰਸਾਤੀ ਭੂਰ ਵਾਂਗ ਅਸਮਾਨ ਤੋਂ ਡਿੱਗੀ ਤ੍ਰੇਲ ਕਾਰਨ ਵਾਤਾਵਰਨ ਨਮ ਹੋ ਗਿਆ। ਸਵੇਰੇ 11 ਕੁ ਵਜੇ ਧੁੰਦ ਛਣਨ ’ਤੇ ਦਿਖਾਈ ਦਿੱਤੇ ਸੂਰਜ ਨੇ ਠੰਢ ਦੀ ਮਾਰ ਝੱਲ ਰਹੇ ਲੋਕਾਂ ਨੂੰ ਕੋਸੀ ਧੁੱਪ ਨਾਲ ਥੋੜਾ ਸਕੂਨ ਬਖ਼ਸ਼ਿਆ। ਵੱਖ-ਵੱਖ ਥਾਈਂ ਸਵੇਰ ਦੇ ਤਾਪਮਾਨ ਦਾ ਪਾਰਾ 3 ਤੋਂ 5 ਡਿਗਰੀ ਅਤੇ ਵੱਧ ਤੋਂ ਵੱਧ ਤਾਪਮਾਨ 13.6 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਮੌਸਮ ਮਾਹਿਰਾਂ ਅਨੁਸਾਰ ਠੰਢ ਦੀ ਸਥਿਤੀ 17 ਜਨਵਰੀ ਤੱਕ ਇਸੇ ਤਰ੍ਹਾਂ ਬਣੀ ਰਹਿਣ ਦੀ ਉਮੀਦ ਹੈ।