ਟ੍ਰਿਬਿਊਨ ਨਿਊਜ਼ ਸਰਵਿਸ
ਕੋਟਕਪੂਰਾ, 3 ਦਸੰਬਰ
ਵਿਧਾਨ ਸਭਾ ਚੋਣਾਂ ਦੇ ਮੱਦੇਨਜ਼ਰ ਸ਼ਹਿਰ ਦੇ ਵਾਰਡ 5 ਦੇ ਵਸਨੀਕਾਂ ਨੇ ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਵੋਟ ਦੇਣ ਤੋਂ ਇਨਕਾਰ ਕਰਦਿਆਂ ਆਪਣੇ ਮੁਹੱਲੇ ਅੰਦਰ ‘ਵਿਕਾਸ ਨਹੀਂ ਵੋਟ ਨਹੀਂ’ ਦੇ ਬੈਨਰ ਟੰਗ ਦਿੱਤੇ ਹਨ। ਮੁਹੱਲਾ ਵਾਸੀਆਂ ਅੰਦਰ ਇਸ ਗੱਲ ਦਾ ਭਾਰੀ ਰੋਸ ਹੈ ਲੰਘੀਆਂ ਨਗਰ ਕੌਂਸਲ ਚੋਣਾਂ ਮੌਕੇ ਸਿਆਸੀ ਆਗੂ ਉਨ੍ਹਾਂ ਨਾਲ ਝੂਠ ਬੋਲ ਕੇ ਵੋਟ ਲੈ ਗਏ ਸੀ ਮਗਰੋਂ ਉਨ੍ਹਾਂ ਨੇ ਬਾਤ ਨਹੀਂ ਪੁੱਛੀ। ਸਮਸਿੱਆਵਾਂ ਨਾਲ ਘਿਰੇ ਬਾਬਾ ਦੀਪ ਸਿੰਘ ਇਲਾਕੇ ’ਚ ਕੱਚੀਆਂ ਗਲੀਆਂ, ਕੱਚੀਆਂ ਨਾਲੀਆਂ ਹੋਣ ਕਰਕੇ ਹਰ ਸਮੇਂ ਚਿੱਕੜ ਰਹਿੰਦਾ ਹੈ। ਲੋਕਾਂ ਨੂੰ ਇਸੇ ਚਿੱਕੜ ’ਚੋਂ ਲੰਘ ਕੇ ਆਪੋ-ਆਪਣੇ ਕੰਮਾਂ ’ਤੇ ਜਾਣਾ ਪੈਂਦਾ ਹੈ। ਕਈ ਵਾਰ ਇਥੋਂ ਲੰਘਣ ਵਾਲੇ ਵਾਹਨ ਹਾਦਸਾਗ੍ਰਸਤ ਹੋ ਜਾਂਦੇ ਹਨ। ਬੱਚੇ ਤਿਲਕ ਕੇ ਡਿੱਗ ਪੈਂਦੇ ਹਨ ਤੇ ਸੱਟਾਂ ਖਾ ਲੈਂਦੇ ਹਨ। ਮੁਹੱਲਾ ਦੇ ਵਸਨੀਕਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਮੁਹੱਲੇ ਦੇ ਵਿਕਾਸ ਲਈ ਕਈ ਵਾਰ ਨਗਰ ਕੌਂਸਲ ਅਧਿਕਾਰੀਆਂ ਕੋਲ ਪਹੁੰਚ ਕੀਤੀ ਪ੍ਰੰਤੂ ਉਨ੍ਹਾਂ ਦੀ ਸੁਣਵਾਈ ਨਹੀਂ ਹੋਈ। ਹਾਲਾਂਕਿ ਕਾਂਗਰਸੀ ਆਗੂ ਵਿਕਾਸ ਦੇ ਦਾਅਵੇ ਕਰਦੇ ਨਹੀਂ ਥੱਕਦੇ। ਉਨ੍ਹਾਂ ਮੰਗ ਕੀਤੀ ਕਿ ਉਨ੍ਹਾਂ ਮੁਹੱਲੇ ਦੀਆਂ ਗਲੀਆਂ ਵਿਚ ਇੰਟਰਲਾਕਿੰਗ ਟਾਈਲਾਂ ਵਿਛਾਈਆਂ ਜਾਣ ਤੇ ਨਾਲੀਆਂ ਬਣਾਈਆਂ ਜਾਣ ਤਾਂ ਜੋ ਪਾਣੀ ਦੀ ਨਿਕਾਸੀ ਹੋ ਸਕੇ। ਜੇ ਉਨ੍ਹਾਂ ਦੇ ਮੁਹੱਲੇ ਦਾ ਵਿਕਾਸ ਨਹੀਂ ਹੋਇਆ ਤਾਂ ‘ਵਿਕਾਸ ਨਹੀਂ ਵੋਟ ਨਹੀਂ’ ਸਾਡਾ ਨਾਅਰਾ ਪੱਕਾ ਹੈ।