ਪੁਨੀਤ ਸ਼ਰਮਾ
ਧਨੌਲਾ, 28 ਨਵੰਬਰ
ਇੱਥੋਂ ਦੀ ਪੱਤੀ ਬੰਗੇਹਰ ਦਾ ਵਸਨੀਕ ਮਲਕੀਤ ਸਿੰਘ ਦੀਵਾਲੀ ਮੌਕੇ ਪਟਾਕਿਆਂ ਕਾਰਨ ਝੁਲਸੇ ਪੁੱਤਰ ਦਾ ਇਲਾਜ ਹੁਣ ਤੱਕ ਨਹੀਂ ਕਰਵਾ ਸਕਿਆ ਕਿਉਂਕਿ ਉਸ ਕੋਲ ਪੈਸੇ ਨਹੀਂ ਹਨ। ਮਲਕੀਤ ਸਿੰਘ ਨੇ ਦੱਸਿਆ ਕਿ ਉਸਦਾ ਪੁੱੱਤਰ ਦੀਵਾਲੀ ਮੌਕੇ ਪਟਾਕਿਆਂ ਦੀ ਲਪੇਟ ਵਿੱਚ ਆਉਣ ਕਾਰਨ ਪੇਟ ਤੋਂ ਝੁਲਸ ਗਿਆ, ਜਿਸ ਉਪਰੰਤ ਉਸਨੂੰ ਮੁੱਢਲੇ ਇਲਾਜ ਲਈ ਹਸਪਤਾਲ ਵਿੱਚ ਲਿਜਾਇਆ ਗਿਆ। ਉਸ ਨੇ ਦੱਸਿਆ ਕਿ ਮੌਕੇ ’ਤੇ ਡਾਕਟਰਾਂ ਨੇ ਬੱਚੇ ਨੂੰ ਇਲਾਜ ਲਈ ਪਟਿਆਲਾ ਵਿੱਚ ਲਿਜਾਣ ਲਈ ਕਿਹਾ ਪਰ ਉਸ ਕੋਲ ਪੈਸੇ ਨਾ ਹੋਣ ਕਾਰਨ ਲੰਬੇ ਸਮੇਂ ਤੋਂ ਘਰ ਵਿੱਚ ਹੀ ਰੱਖਿਆ ਹੈ। ਮਲਕੀਤ ਸਿੰਘ ਨੇ ਦੱਸਿਆ ਕਿ ਉਹ ਇੱਕ ਸਾਈਕਲ ਰਿਪੇਅਰ ਦੁਕਾਨ ’ਤੇ ਕੰਮ ਕਰਦਾ ਹੈ ਪਰ ਬੱਚੇ ਦੀ ਸੰਭਾਲ ਕਾਰਨ ਉਹ ਕੰਮ ’ਤੇ ਵੀ ਨਹੀਂ ਜਾ ਸਕਦਾ। ਬੱਚੇ ਦੀ ਸਿਹਤ ਦਿਨੋਂ-ਦਿਨ ਵਿਗੜਦੀ ਜਾ ਰਹੀ ਹੈ। ਇਸ ਸਬੰਧੀ ਵੀਡੀਓ ਵਾਇਰਲ ਹੋਣ ’ਤੇ ਉੱਥੋਂ ਦੀ ਆਂਗਣਵਾੜੀ ਕਰਮਚਾਰੀ ਸੁਖਵੀਰ ਕੌਰ ਨੇ ਮੌਕੇ ’ਤੇ ਪਹੁੰਚ ਕੇ ਪਰਿਵਾਰ ਦੀ ਮਾਲੀ ਸਹਾਇਤਾ ਕੀਤੀ ਹੈ। ਸਮਾਜ ਸੇਵੀ ਬੱਚੇ ਦੇ ਪਿਤਾ ਮਲਕੀਤ ਸਿੰਘ ਦੇ ਨੰਬਰ 73800-67097 ’ਤੇ ਸੰਪਰਕ ਕਰ ਸਕਦੇ ਹਨ।