Faridkot Central Jail ’ਚ ਤਲਾਸ਼ੀ ਦੌਰਾਨ 20 ਮੋਬਾਈਲ ਬਰਾਮਦ, 10 ਹਵਾਲਾਤੀਆਂ ਵਿਰੁੱਧ ਕੇਸ ਦਰਜ
ਸਹਾਇਕ ਜੇਲ੍ਹ ਸੁਪਰਡੈਂਟ ਦੀ ਸ਼ਿਕਾਇਤ ’ਤੇ ਪੁਲੀਸ ਦੀ ਕਾਰਵਾਈ; ਮੋਬਾਈਲ ਨੈੱਟਵਰਕ ਤੇ ਤਸਕਰੀ ਦੇ ਸਰੋਤਾਂ ਦੀ ਜਾਂਚ ’ਚ ਜੁੱਟੀ ਪੁਲੀਸ
ਫਰੀਦਕੋਟ ਦੀ ਕੇਂਦਰੀ ਮਾਡਰਨ ਜੇਲ੍ਹ ਵਿੱਚ ਸੁਰੱਖਿਆ ਇੰਤਜ਼ਾਮਾਂ ’ਤੇ ਇੱਕ ਵਾਰ ਫਿਰ ਗੰਭੀਰ ਸਵਾਲ ਖੜ੍ਹੇ ਹੋ ਗਏ ਹਨ। ਜੇਲ੍ਹ ਪ੍ਰਸ਼ਾਸਨ ਵੱਲੋਂ ਵੱਖ-ਵੱਖ ਬੈਰਕਾਂ ਵਿੱਚ ਚਲਾਈ ਗਈ ਅਚਾਨਕ ਤਲਾਸ਼ੀ ਮੁਹਿੰਮ ਦੌਰਾਨ 20 ਮੋਬਾਈਲ ਫੋਨ ਬਰਾਮਦ ਕੀਤੇ ਗਏ ਹਨ। ਇਹ ਕਾਰਵਾਈ ਫਰੀਦਕੋਟ ਕੇਂਦਰੀ ਜੇਲ੍ਹ ਦੇ ਸਹਾਇਕ ਸੁਪਰਡੈਂਟ ਜਸਵੰਤ ਸਿੰਘ ਵੱਲੋਂ ਦਿੱਤੀ ਗਈ ਅਧਿਕਾਰਤ ਸ਼ਿਕਾਇਤ ਤੋਂ ਬਾਅਦ ਅਮਲ ਵਿੱਚ ਲਿਆਂਦੀ ਗਈ। ਜੇਲ੍ਹ ਪ੍ਰਸ਼ਾਸਨ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਸਥਾਨਕ ਪੁਲੀਸ ਨੇ ਕਾਰਵਾਈ ਕਰਦਿਆਂ ਜੇਲ੍ਹ ਅੰਦਰ ਗੈਰ-ਕਾਨੂੰਨੀ ਸੰਚਾਰ ਸਾਧਨ ਰੱਖਣ ਅਤੇ ਤਸਕਰੀ ਕਰਨ ਦੇ ਦੋਸ਼ ਹੇਠ 10 ਹਵਾਲਾਤੀਆਂ ਵਿਰੁੱਧ ਰਸਮੀ ਮਾਮਲਾ ਦਰਜ ਕਰ ਲਿਆ ਹੈ।
ਨਾਮਜ਼ਦ ਕੀਤੇ ਗਏ ਮੁਲਜ਼ਮਾਂ ਵਿੱਚ ਗੁਰਭੇਜਾ ਸਿੰਘ (ਸੰਜੇ ਨਗਰ, ਫਰੀਦਕੋਟ), ਮੰਗਲਦੀਪ ਸਿੰਘ (ਅਰਨੀਵਾਲਾ, ਫਾਜ਼ਿਲਕਾ), ਲਵਪ੍ਰੀਤ ਸਿੰਘ ਉਰਫ਼ ਕਰਨ (ਗੋਨਿਆਣਾ ਰੋਡ, ਮੁਕਤਸਰ), ਜਸਵਿੰਦਰ ਸਿੰਘ (ਸ਼ੇਰਪੁਰ ਤਾਇਬਾ, ਦੱਖਣੀ ਮੋਗਾ), ਅਮਨਦੀਪ ਸਿੰਘ (ਸੋਹਣਗੜ੍ਹ, ਫਾਜ਼ਿਲਕਾ), ਗੋਲਡੀ ਉਰਫ਼ ਗੋਵਿੰਦ (ਫੱਕਰਸਰ ਝੁੱਗੇ, ਫਾਜ਼ਿਲਕਾ), ਤੀਰਥ ਸਿੰਘ ਉਰਫ਼ ਗੁਰੂ (ਅੰਗੜ੍ਹ-ਮੁਬਾਰਕਪੁਰ, ਦੱਖਣੀ ਮੋਗਾ), ਹਰਮਿੰਦਰ ਹਿੰਦ ਸਿੰਘ (ਜੈ ਸਿੰਘ ਵਾਲਾ, ਮੋਗਾ), ਜਸਕਰਨ ਸਿੰਘ (ਬਾਬਾ ਪਾਲਾ ਸਿੰਘ ਰੋਡ, ਧਰਮਕੋਟ, ਮੋਗਾ) ਅਤੇ ਪ੍ਰੀਤਪਾਲ ਸਿੰਘ (ਅਰਨੀਵਾਲਾ, ਫਾਜ਼ਿਲਕਾ) ਸ਼ਾਮਲ ਹਨ।
ਫਿਲਹਾਲ ਇਹਨਾਂ ਨਵੇਂ ਦਰਜ ਮਾਮਲਿਆਂ ਦੇ ਸਬੰਧ ਵਿੱਚ ਅਜੇ ਕੋਈ ਰਸਮੀ ਗ੍ਰਿਫ਼ਤਾਰੀ ਨਹੀਂ ਪਾਈ ਗਈ ਹੈ। ਮਾਮਲੇ ਦੀ ਪੁਸ਼ਟੀ ਕਰਦਿਆਂ ਡਿਪਟੀ ਸੁਪਰਡੈਂਟ ਆਫ਼ ਪੁਲੀਸ (ਡੀ.ਐੱਸ.ਪੀ.) ਗੁਰਚਰਨ ਸਿੰਘ ਨੇ ਦੱਸਿਆ ਕਿ ਪੱਕੀ ਇਤਲਾਹ ਦੇ ਆਧਾਰ ’ਤੇ ਜੇਲ੍ਹ ਦੀਆਂ ਬੈਰਕਾਂ 'ਚ ਤਲਾਸ਼ੀ ਮੁਹਿੰਮ ਚਲਾਈ ਗਈ ਸੀ। ਪੁਲੀਸ ਨੇ ਹੁਣ ਇਸ ਗੱਲ ਦੀ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਕਿ ਸਖ਼ਤ ਪਹਿਰੇਦਾਰੀ ਵਾਲੀ ਜੇਲ੍ਹ ਅੰਦਰ ਇਹ ਨਿਸ਼ੇਧ ਵਸਤੂਆਂ ਕਿਸ ਮਾਧਿਅਮ ਰਾਹੀਂ ਅਤੇ ਕਿਸ ਦੀ ਮਦਦ ਨਾਲ ਪਹੁੰਚਾਈਆਂ ਜਾ ਰਹੀਆਂ ਸਨ।
