ਗੁਰਬਖਸ਼ਪੁਰੀ
ਤਰਨ ਤਾਰਨ, 1 ਜੁਲਾਈ
ਪਿੰਡ ਪੱਧਰੀ ਕਲਾਂ ਦੇ ਇਜਲਾਸ ਦੌਰਾਨ ਪਿੰਡ ਦੀਆਂ ਦੋ ਧਿਰਾਂ ਦਰਮਿਆਨ ਜੰਮ ਕੇ ਹੋਈ ਲੜਾਈ ਵਿੱਚ ਦੋਹਾਂ ਧਿਰਾਂ ਦੇ ਛੇ ਜਣੇ ਗੰਭੀਰ ਜ਼ਖਮੀ ਹੋ ਗਏ ਜਦ ਕਿ ਅਨੇਕਾਂ ਹੋਰਨਾਂ ਨੂੰ ਸੱਟਾਂ ਲੱਗੀਆਂ| ਇਹ ਲੜਾਈ ਪਿੰਡ ਦੀ ਕਾਂਗਰਸ ਪਾਰਟੀ ਵਲੋਂ ਬਣੀ ਸਰਪੰਚ ਰਛਪਾਲ ਕੌਰ ਅਤੇ ਆਮ ਆਦਮੀ ਪਾਰਟੀ ਦੇ ਆਗੂ ਸਲਵਿੰਦਰ ਸਿੰਘ ਦੇ ਧੜਿਆਂ ਦਰਮਿਆਨ ਹੋਈ| ਲੜਾਈ ਵਿੱਚ ਇਕ ਧਿਰ ਦੇ ਸਲਵਿੰਦਰ ਸਿੰਘ ਅਤੇ ਉਸ ਦਾ ਭਤੀਜਾ ਦਿਲਬਾਗ ਸਿੰਘ ਜ਼ਖਮੀ ਹੋਇਆ ਹੈ| ਦੂਸਰੀ ਧਿਰ ਵਲੋਂ ਗੰਭੀਰ ਜ਼ਖਮੀ ਹੋਏ ਸਰਪੰਚ ਦੇ ਪਤੀ ਦਿਲਬਾਗ ਸਿੰਘ ਮੁੱਢਲਾ ਸਿਹਤ ਕੇਂਦਰ ਝਬਾਲ ਤੋਂ ਹਾਲਤ ਦੇ ਗੰਭੀਰ ਹੋਣ ਕਰਕੇ ਗੁਰੂ ਨਾਨਕ ਦੇਵ ਹਸਪਤਾਲ ਅੰਮ੍ਰਿਤਸਰ ਦਾਖਲ ਕਰਵਾਇਆ ਗਿਆ ਹੈ| ਇਸ ਧਿਰ ਦੇ ਹੋਰਨਾਂ ਜ਼ਖਮੀਆਂ ਵਿੱਚ ਦਿਲਬਾਗ ਸਿੰਘ ਦਾ ਭਤੀਜਾ ਸੁਰਜੀਤ ਸਿੰਘ, ਭਰਜਾਈ ਪਰਮਜੀਤ ਕੌਰ ਅਤੇ ਇਕ ਹਮਾਇਤੀ ਮੰਗਲ ਸਿੰਘ ਰਾਜਾ ਦਾ ਨਾਮ ਸ਼ਾਮਲ ਹੈ| ਉਹ ਝਬਾਲ ਦੇ ਮੁੱਢਲਾ ਸਿਹਤ ਕੇਂਦਰ ਵਿੱਚ ਜ਼ੇਰੇ ਇਲਾਜ ਹਨ| ਸਰਪੰਚ ਰਛਪਾਲ ਕੌਰ ਦੀ ਅਗਵਾਈ ਵਿੱਚ ਪਿੰਡ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਦੀ ਗਰਾਉੂਂਡ ਵਿੱਚ ਪੰਚਾਇਤ ਸੈਕਟਰੀ ਹਰਪ੍ਰੀਤ ਸਿੰਘ ਦੀ ਨਿਗਰਾਨੀ ਅਧੀਨ ਇਜਲਾਸ ਦੇ ਚਲਦਿਆਂ ਹੀ ਦੋਹਾਂ ਧਿਰਾਂ ਦਰਮਿਆਨ ਪਿੰਡ ਦੇ ਵਿਕਾਸ ਲਈ ਪਹਿਲੀ ਸਰਕਾਰ ਵਲੋਂ ਜਾਰੀ ਕੀਤੀਆਂ ਗਰਾਂਟਾਂ ਦੇ ਹਿਸਾਬ ਨੂੰ ਲੈ ਕੇ ਤਕਰਾਰ ਹੋ ਗਿਆ ਸੀ| ਜਿਸ ਤੋਂ ਦੋਹਾਂ ਧਿਰਾਂ ਦੇ ਹਮਾਇਤੀਆਂ ਵਲੋਂ ਇੱਟਾਂ-ਵੱਟੇ ਤੋਂ ਇਲਾਵਾ ਡਾਂਗਾਂ-ਸੋਟਿਆਂ, ਬੇਸਬਾਲਾਂ ਆਦਿ ਦੀ ਖੁੱਲ੍ਹ ਕੇ ਵਰਤੋਂ ਕੀਤੀ ਗਈ| ਪੁਲੀਸ ਨੇ ਸਲਵਿੰਦਰ ਸਿੰਘ ਦੇ ਭਰਾ ਨਰਵਿੰਦਰ ਸਿੰਘ ਦੇ ਬਿਆਨਾਂ ’ਤੇ ਸਰਪੰਚ ਰਛਪਾਲ ਕੌਰ, ਉਸ ਦੇ ਪਤੀ ਦਿਲਬਾਗ ਸਿੰਘ, ਦਿਲਬਾਗ ਸਿੰਘ ਦੇ ਭਰਾ ਰਛਪਾਲ ਸਿੰਘ ਸਮੇਤ ਕੁੱਲ 21 ਜਣਿਆਂ ਖਿਲਾਫ਼ ਕੇਸ ਦਰਜ ਕੀਤਾ ਹੈ|