ਡੇਢ ਘੰਟੇ ’ਚ ਸੜਕ ਦਾ ਦੋ ਵਾਰ ਉਦਘਾਟਨ
ਵਿਧਾਇਕ ਕਿਸ਼ਨਕੋਟ ਦੇ ਭਰਾ ਅਤੇ ਸਾਬਕਾ ਵਿਧਾਇਕ ਨੇ ਵੱਖੋ-ਵੱਖਰੇ ਤੌਰ ’ਤੇ ਰਿਬਨ ਕੱਟੇ
ਵਿਧਾਇਕ ਐਡਵੋਕੇਟ ਅਮਰਪਾਲ ਸਿੰਘ ਕਿਸ਼ਨਕੋਟ ਦੇ ਭਰਾ ਤੇ ਜ਼ਿਲ੍ਹਾ ਪਰਿਸ਼ਦ ਮੈਂਬਰ ਅਮਰੀਕ ਸਿੰਘ ਅਤੇ ‘ਆਪ’ ਆਗੂ ਤੇ ਸਾਬਕਾ ਵਿਧਾਇਕ ਬਲਵਿੰਦਰ ਸਿੰਘ ਲਾਡੀ ਨੇ ਪ੍ਰਧਾਨ ਮੰਤਰੀ ਗ੍ਰਾਮ ਸੜਕ ਯੋਜਨਾ ਤਹਿਤ ਬਣੀ ਸੜਕ ਦਾ ਉਦਘਾਟਨ ਕਰੀਬ ਡੇਢ ਘੰਟੇ ਦੇ ਫ਼ਰਕ ਨਾਲ ਆਪੋ-ਆਪਣੇ ਅੰਦਾਜ਼ ’ਚ ਕੀਤਾ। ਰਾਜਨੀਤੀ ’ਚ ਦਿਲਚਸਪੀ ਰੱਖਦੇ ਲੋਕ ਇਸ ਨੂੰ ਵਿਕਾਸ ਕਾਰਜਾਂ ਦਾ ਰਾਜਸੀ ਲਾਭ ਲੈਣ ਦੀ ‘ਦੌੜ’ ਨਾਲ ਜੋੜ ਰਹੇ ਹਨ। ਉੱਧਰ, ਵਿਧਾਇਕ ਦੇ ਭਰਾ ਤੇ ਜ਼ਿਲ੍ਹਾ ਪਰਿਸ਼ਦ ਮੈਂਬਰ ਅਮਰੀਕ ਸਿੰਘ ਕਿਸ਼ਨਕੋਟ ਨੇ ਦੱਸਿਆ ਕਿ ਇਹ ਸੜਕ ਉਨ੍ਹਾਂ ਦੇ ਭਰਾ ਤੇ ਵਿਧਾਇਕ ਐਡਵੋਕੇਟ ਕਿਸ਼ਨਕੋਟ ਦੇ ਯਤਨਾਂ ਸਦਕਾ ਬਣੀ ਹੈ, ਜਿਸ ਲਈ ਉਸ ਨੇ ਇਸ ਸੜਕ ਦਾ ਉਦਘਾਟਨ ਕੀਤਾ ਹੈ ਜਦੋਂਕਿ ‘ਆਪ’ ਆਗੂ ਲਾਡੀ ਨੇ ਕਿਹਾ ਕਿ ਇਹ ਸੜਕ ਸੰਸਦ ਮੈਂਬਰ ਡਾ. ਰਾਜ ਕੁਮਾਰ ਚੱਬੇਵਾਲ ਵੱਲੋਂ ਉਨ੍ਹਾਂ ਦੇ ਯਤਨਾਂ ਸਦਕਾ ‘ਪਾਸ’ ਕਰਵਾਈ ਗਈ ਹੈ, ਜਿਸ ਕਾਰਨ ਉਨ੍ਹਾਂ ਸੜਕ ਦਾ ਉਦਘਾਟਨ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਸਥਾਨਕ ਲੋਕਾਂ ਦੀ ਮੰਗ ਦੇ ਮੱਦੇਨਜ਼ਰ ਇਸ ਸੜਕ ਦਾ ਨਿਰਮਾਣ ਕਰਵਾਇਆ ਗਿਆ ਹੈ।
ਲੋਕ ਨਿਰਮਾਣ ਵਿਭਾਗ ਦੇ ਐੱਸ ਡੀ ਓ ਕੰਵਲਜੀਤ ਸਿੰਘ ਇੰਨਾ ਹੀ ਕਿਹਾ ਕਿ ਸੜਕ ਬਣ ਗਈ ਹੈ ਤੇ ਜਲਦ ਹੀ ਸੰਸਦ ਮੈਂਬਰ ਡਾ. ਚੱਬੇਵਾਲ ਵੱਲੋਂ ਉਦਘਾਟਨ ਕੀਤਾ ਜਾਵੇਗਾ। ਉਨ੍ਹਾਂ ਹੋਰ ਕੁਝ ਕਹਿਣ ਤੋਂ ਇਨਕਾਰ ਕਰ ਦਿੱਤਾ।
ਜ਼ਿਕਰਯੋਗ ਹੈ ਕਿ ਪਿੰਡ ਮਾੜੀ ਪੰਨਵਾਂ ਤੋਂ ਬਹਾਦਰਪੁਰ ਰਜੋਆ ਤੱਕ 8 ਕਿਲੋਮੀਟਰ ਸੜਕ ਜੋ 7 ਕਰੋੜ 25 ਲੱਖ ਰੁਪਏ ਵਿੱਚ ਬਣੀ ਹੈ। ਸੜਕ ਨਾ ਬਣਨ ਕਾਰਨ ਪਹਿਲਾਂ ਅੱਧੀ ਦਰਜਨ ਤੋਂ ਵੱਧ ਇਨ੍ਹਾਂ ਪਿੰਡਾਂ ਦੇ ਲੋਕਾਂ ਨੂੰ ਵੱਡੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪੈਂਦਾ ਸੀ।
