ਦਲਬੀਰ ਸੱਖੋਵਾਲੀਆ
ਬਟਾਲਾ, 27 ਨਵੰਬਰ
ਨੇੜਲੇ ਪਿੰਡ ਪੁਰੀਆ ਖੁਰਦ ਦੇ 60 ਲੋੜਵੰਦ ਪਰਿਵਾਰਾਂ ਦੇ ਰਾਸ਼ਨ ਕਾਰਡ ਕੱਟੇ ਜਾਣ ਕਾਰਨ ਲੰਘੇ ਡੇਢ ਸਾਲ ਤੋਂ ਗਰੀਬ ਲੋਕ ਰਾਸ਼ਨ ਲੈਣ ਨੂੰ ਤਰਸ ਰਹੇ ਹਨ। ਉਹ ਦਿਹਾੜੀਦਾਰ ਹੋਣ ਦੇ ਬਾਵਜੂਦ ਆਟਾ ਦਾਲ ਸਕੀਮ ਤੋਂ ਵਾਂਝੇ ਹਨ। ਰੋਹ ਵਿੱਚ ਆਏ ਲੋਕਾਂ ਨੇ ਪੰਜਾਬ ਸਰਕਾਰ ਵਿਰੁੱਧ ਨਾਅਰੇਬਾਜ਼ੀ ਕਰਦਿਆਂ ਮੁੱਖ ਮੰਤਰੀ, ਸਬੰਧਤ ਵਿਭਾਗ ਦੇ ਮੰਤਰੀ ਅਤੇ ਹਲਕਾ ਸ਼੍ਰੀਹਰਗੋਬਿੰਦਪੁਰ ਦੇ ਵਿਧਾਇਕ ਬਲਵਿੰਦਰ ਸਿੰਘ ਲਾਡੀ ਤੋਂ ਮੰਗ ਕੀਤੀ ਕਿ ਉਨ੍ਹਾਂ ਦੇ ਰਾਸ਼ਨ ਕਾਰਡ ਬਣਾ ਕੇ ਫਿਰ ਤੋਂ ਆਟਾ ਦਾਲ ਮੁਹੱਈਆਂ ਕੀਤੀ ਜਾਵੇ। ਜਾਣਕਾਰੀ ਅਨੁਸਾਰ, ਪੰਚ ਸਤਨਾਮ ਸਿੰਘ ਖਰਾਸੀਆਂ, ਪੰਚ ਕੰਵਲਜੀਤ ਕੌਰ , ਬਲਵਿੰਦਰ ਕੌਰ ਸਮੇਤ ਹੋਰਾਂ ਨੇ ਦੱਸਿਆ ਕਿ ਪਿੰਡ ’ਚ ਕੁੱਲ 78 ਰਾਸ਼ਨ ਕਾਰਡ ਬਣੇ ਸਨ ਪਰ ਇਨ੍ਹਾਂ ’ਚ 60 ਕਾਰਡ ਲੰਘੇ ਡੇਢ ਸਾਲ ਤੋਂ ਕੱਟੇ ਗਏ ਹਨ। ਦੱਸਿਆ ਕਿ ਸਾਲ ਭਰ ਤੋਂ ਫੂਡ ਸਪਲਾਈ ਅਧਿਕਾਰੀਆਂ ਦੇ ਦਫ਼ਤਰਾਂ ਦੇ ਚੱਕਰ ਕੱਟ ਰਹੇ ਹਨ , ਪਰ ਉਨ੍ਹਾਂ ਦੀ ਕਿਧਰੇ ਵੀ ਕੋਈ ਸੁਣਵਾਈ ਨਹੀਂ ਹੋ ਰਹੀ।
ਏਐੱਫਐੱਸਓ ਨੇ ਜਲਦੀ ਕਾਰਡ ਬਣਾਉਣ ਦਾ ਦਿੱਤਾ ਭਰੋਸਾ
ਇਸ ਸਬੰਧੀ ਏਐੱਸਐੱਫਓ ਰਾਜੇਸ਼ ਕੁਮਾਰ ਨੇ ਸੰਪਰਕ ਕਰਨ ’ਤੇ ਦੱਸਿਆ ਕਿ ਇਨ੍ਹਾਂ ਦੇ ਰਾਸ਼ਨ ਕਾਰਡ ਬਣਾਉਣ ਲਈ ਫਾਰਮ ਭਰੇ ਗਏ ਹਨ। ਉਨ੍ਹਾਂ ਜਲਦ ਕਾਰਡ ਬਣਾਉਣ ਦਾ ਧਰਵਾਸ ਦਿੰਦਿਆ ਦੱਸਿਆ ਕਿ ਕੁੱਝ ਸਮਾਂ ਪਹਿਲਾਂ ਹੋਏ ਸਰਵੇ ਦੌਰਾਨ ਇਨ੍ਹਾਂ ਦੇ ਰਾਸ਼ਨ ਕਾਰਡ ਕੱਟ ਦਿੱਤੇ ਗਏ ਸਨ।