ਉਸਾਰੀ ਰੋਕਣ ’ਤੇ ਕਿਸਾਨ ਜਥੇਬੰਦੀ ਨੇ ਥਾਣਾ ਘੇਰਿਆ

ਉਨ੍ਹਾਂ ਕਿਹਾ ਕਿ ਪਿੰਡ ਵਰਪਾਲ ਦੇ ਕਿਸਾਨ ਲਖਵਿੰਦਰ ਸਿੰਘ ਤੇ ਉਸ ਦੀ ਪਤਨੀ ਸਰਬਜੀਤ ਕੌਰ ਨੇ ਬੈਂਕ ਵੱਲੋਂ ਕਰਵਾਈ ਬੋਲੀ ਸਮੇਂ 31 ਲੱਖ ਰੁਪਏ ਦੀ ਕੀਮਤ ਨਾਲ 7 ਅਪਰੈਲ, 2003 ਨੂੰ ਇਕ ਪਲਾਟ ਖ਼ਰੀਦਿਆ ਸੀ, ਜਿਨ੍ਹਾਂ ਨੂੰ ਪਿਛਲੇ 22 ਸਾਲਾ ਤੋਂ ਪਲਾਟ ’ਤੇ ਉਸਾਰੀ ਕਰਨ ਤੋਂ ਲਗਾਤਾਰ ਰੋਕਿਆ ਜਾ ਰਿਹਾ ਹੈ।

ਪੀੜਤ ਪਰਿਵਾਰ ਨੇ ਦੱਸਿਆ ਕਿ ਜਦੋਂ ਵੀ ਉਹ ਉਸਾਰੀ ਕਰਨ ਜਾਂਦੇ ਹਨ ਤਾਂ ਪੁਲੀਸ ਅਜਿਹਾ ਨਹੀਂ ਕਰਨ ਦਿੰਦੀ ਕਿਉਂਕਿ ਬੈਂਕ ਨੇ ਜਿਨ੍ਹਾਂ ਦੇ ਪਲਾਟ ਦੀ ਬੋਲੀ ਕਰਵਾਈ ਹੈ, ਉਹ ਧਿਰ ਪ੍ਰਭਾਵਸ਼ਾਲੀ ਹੈ। ਉਨ੍ਹਾਂ ਦੱਸਿਆ ਕਿ ਅੱਜ ਵੀ ਜਦੋਂ ਉਹ ਆਪਣੇ ਸਕੇ-ਸਬੰਧੀਆਂ ਅਤੇ ਕਿਸਾਨ ਜਥੇਬੰਦੀਆਂ ਦੀ ਹਾਜ਼ਰੀ ’ਚ ਪਲਾਟ ਦੀਆਂ ਨੀਂਹ ਭਰਨ ਲੱਗੇ ਤਾਂ ਪੁਲੀਸ ਨੇ ਕੰਮ ਰੁਕਵਾ ਦਿੱਤਾ ਅਤੇ ਉਸਾਰੀ ਦਾ ਸਾਮਾਨ ਕਬਜ਼ੇ ’ਚ ਲੈ ਲਿਆ।

ਉਨ੍ਹਾਂ ਦੋਸ਼ ਲਾਇਆ ਕਿ ਪੁਲੀਸ ਪੀੜਤ ਲਖਵਿੰਦਰ ਸਿੰਘ ਨੂੰ ਆਪਣੇ ਨਾਲ ਥਾਣੇ ਲੈ ਗਈ, ਜਿਸ ਮਗਰੋਂ ਧੱਕੇਸ਼ਾਹੀ ਖ਼ਿਲਾਫ਼ ਪੁਲੀਸ ਥਾਣੇ ਦਾ ਘਿਰਾਓ ਕੀਤਾ ਗਿਆ। ਧਰਨਾਕਾਰੀਆਂ ਨੇ ਚਿਤਾਵਨੀ ਦਿਤੀ ਕਿ ਜੇਕਰ ਇਨਸਾਫ਼ ਨਾ ਮਿਲਿਆ ਤਾਂ ਇਹ ਧਰਨਾ ਰਾਤ-ਦਿਨ ਚੱਲੇਗਾ। ਪੀੜਤ ਪਰਿਵਾਰ ਨੇ ਕਿਹਾ ਕਿ ਉਹ ਇਹ ਮਾਮਲਾ ਅੰਮ੍ਰਿਤਸਰ ਪੁਲੀਸ ਕਮਿਸ਼ਨਰ ਅਤੇ ਹੋਰ ਅਧਿਕਾਰੀਆਂ ਦੇ ਧਿਆਨ ’ਚ ਲਿਆ ਚੁੱਕੇ ਹਨ।

ਕਿਸਾਨ ਆਗੂਆਂ ਨੇ ਦੱਸਿਆ ਕਿ ਦੇਰ ਸ਼ਾਮ ਪੁਲੀਸ ਅਧਿਕਾਰੀ ਨੇ ਧਰਨੇ ਵਿੱਚ ਪੁੱਜ ਕੇ ਧਰਨਾਕਾਰੀਆਂ ਨਾਲ ਗੱਲਬਾਤ ਕੀਤੀ ਅਤੇ ਪਲਾਟ ਨਾਲ ਸਬੰਧਿਤ ਰਿਕਾਰਡ ਦੀ ਜਾਂਚ ਕੀਤੀ। ਇਸ ਮਗਰੋਂ ਪੁਲੀਸ ਅਧਿਕਾਰੀ ਸ਼ਿਵਦਰਸ਼ਨ ਸਿੰਘ ਨੇ ਯਕੀਨ ਦਿਵਾਇਆ ਕਿ ਪਰਿਵਾਰ ਨਾਲ ਇਨਸਾਫ਼ ਹੋਵੇਗਾ। ਇਸ ਮਗਰੋਂ ਹਿਰਾਸਤ ਵਿਚ ਰੱਖੇ ਲਖਵਿੰਦਰ ਸਿੰਘ ਨੂੰ ਰਿਹਾਅ ਕਰ ਦਿੱਤਾ ਗਿਆ, ਜਿਸ ਮਗਰੋਂ ਦੇਰ ਸ਼ਾਮ ਨੂੰ ਧਰਨਾ ਸਮਾਪਤ ਕੀਤਾ ਗਿਆ। ਧਰਨਾਕਾਰੀਆਂ ਨੇ ਕਿਹਾ ਕਿ ਜੇਕਰ ਪੂਰਨ ਇਨਸਾਫ਼ ਨਾ ਮਿਲਿਆ ਤਾਂ ਉਹ ਦੁਬਾਰਾ ਧਰਨਾ ਲਾਉਣ ਲਈ ਮਜਬੂਰ ਹੋਣਗੇ।

ਧਰਨੇ ਨੂੰ ਔਰਤ ਮੁਕਤੀ ਮੋਰਚਾ ਦੀ ਆਗੂ ਸਰਬਜੀਤ ਕੌਰ, ਕਿਸਾਨ ਸਭਾ ਦੇ ਆਗੂ ਦੇਸਾ ਸਿੰਘ ਭਿੰਡੀ ਔਲਖ, ਸ਼ਹੀਦ ਭਗਤ ਸਿੰਘ ਨੌਜਵਾਨ ਸਭਾ ਦੇ ਪ੍ਰਧਾਨ ਜੱਗਾ ਸਿੰਘ ਤੇ ਗੁਰਪਾਲ ਗਿੱਲ ਸੈਦਪੁਰ, ਪ੍ਰੋ. ਮਾਲਕ ਸਿੰਘ, ਚਰਨ ਸਿੰਘ ਭਿੰਡੀ ਔਲਖ, ਪ੍ਰਭਜੋਤ ਸਿੰਘ ਲੋਪੋਕੇ ਅਤੇ ਪੀੜਤਾਂ ਵੱਲੋਂ ਸਵਿੰਦਰ ਸਿੰਘ ਤੇ ਕੁਲਵੰਤ ਕੌਰ ਵੇਰਕਾ, ਵਿਪਨ ਸ਼ਾਹ, ਅਸ਼ੋਕ ਸ਼ਰਮਾ, ਵਿੱਕੀ ਕਸ਼ਮੀਰ ਐਵੀਨਿਊ, ਬਾਂਸਲ ਗ੍ਰੀਨ ਐਵੇਨਿਊ, ਰਵੀ ਰਾਜਪੂਤ, ਰਣਜੀਤ ਸਿੰਘ ਵਰਪਾਲ ਅਤੇ ਕੁਲਵੰਤ ਰਿਸ਼ੀ ਵੇਰਕਾ ਨੇ ਸੰਬੋਧਨ ਕੀਤਾ।