ਐਮਰਜੈਂਸੀ ਰਿਸਪਾਂਸ: ਤਰਨ ਤਾਰਨ ਪੁਲੀਸ ਨੂੰ 28 ਨਵੀਆਂ ਗੱਡੀਆਂ ਮਿਲੀਆਂ

ਪੰਜਾਬ ਸਰਕਾਰ ਵੱਲੋਂ ਸਰਹੱਦੀ ਜ਼ਿਲ੍ਹੇ ਦੀ ਪੁਲੀਸ ਨੂੰ 28 ਨਵੀਆਂ ਗੱਡੀਆਂ ਦਿੱਤੀਆਂ ਗਈਆਂ ਹਨ। ਪੁਲੀਸ ਕੋਲ ਇਸ ਐਮਰਜੈਂਸੀ ਰਿਸਪਾਂਸ ਸਿਸਟਮ ਤਹਿਤ ਪਹਿਲਾਂ ਅਜਿਹੀਆਂ ਛੇ ਗੱਡੀਆਂ ਸਨ ਜੋ ਹੁਣ ਵਧ ਕੇ 34 ਹੋ ਗਈਆਂ ਹਨ। ਐੱਸ ਐੱਸ ਪੀ ਸੁਰਿੰਦਰ ਲਾਂਬਾ ਨੇ ਦੱਸਿਆ ਕਿ ਲੋਕਾਂ ਨੂੰ ਲੋੜ ਪੈਣ ’ਤੇ ਪੁਲੀਸ ਪਹਿਲਾਂ ਸਰਹੱਦੀ ਤੇ ਪੇਂਡੂ ਖੇਤਰ ਵਿੱਚ ਅੱਧੇ ਘੰਟੇ ਦੇ ਅੰਦਰ ਫੋਨ ਨੰਬਰ 112 ’ਤੇ ਡਾਇਲ ਕਰਨ ਉੱਤੇ ਪਹੁੰਚਦੀ ਸੀ ਜਦਕਿ ਸ਼ਹਿਰੀ ਖੇਤਰ ਵਿੱਚ 10 ਤੋਂ 12 ਮਿੰਟ ਤੱਕ ਪਹੁੰਚਿਆ ਜਾਂਦਾ ਸੀ ਉਨ੍ਹਾਂ ਕਿਹਾ ਕਿ ਇਹ ਟਾਈਮ ਹੁਣ ਘਟਾ ਕੇ ਪੇਂਡੂ ਖੇਤਰ ਅੰਦਰ ਕਿਸੇ ਮੁਸ਼ਕਲ ਦੇ ਆ ਜਾਣ ’ਤੇ ਪੁਲੀਸ ਟੀਮ 10 ਮਿੰਟ ਅਤੇ ਸ਼ਹਿਰੀ ਖੇਤਰ ਅੰਦਰ ਇਹ ਸਮਾਂ ਪੰਜ ਮਿੰਟ ਲੱਗਿਆ ਕਰੇਗਾ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਗੱਡੀਆਂ ਲਈ ਰਾਤ ਅਤੇ ਦਿਨ ਵੇਲੇ ਮੁਲਾਜ਼ਮਾਂ ਦੀ ਗਿਣਤੀ ਵਿੱਚ ਵੀ ਵਾਧਾ ਕਰ ਦਿੱਤਾ ਗਿਆ ਹੈ ਜਿਸ ਤਹਿਤ ਦਿਨ ਵੇਲੇ ਇਨ੍ਹਾਂ ਗੱਡੀਆਂ ਲਈ ਜਦੋਂ ਦੋ ਤੋਂ ਤਿੰਨ ਮੁਲਾਜ਼ਮ ਹੋਣਗੇ ਤਾਂ ਰਾਤ ਵੇਲੇ ਇਨ੍ਹਾਂ ਗੱਡੀਆਂ ਲਈ ਚਾਰ ਤੋਂ ਪੰਜ ਮੁਲਾਜ਼ਮ ਤਾਇਨਾਤ ਕੀਤੇ ਜਾਇਆ ਕਰਨਗੇ।