ਐਨ.ਪੀ. ਧਵਨ
ਪਠਾਨਕੋਟ, 17 ਜਨਵਰੀ
ਪਿੰਡ ਘੋਹ ਦੀ ਪਲਾਈਵੁੱਡ ਫੈਕਟਰੀ ਵਿੱਚ ਬੀਤੀ ਦੇਰ ਰਾਤ ਅਚਾਨਕ ਅੱਗ ਲੱਗ ਗਈ ਜਿਸ ਨੇ ਮਿੰਟਾਂ ਵਿੱਚ ਭਿਆਨਕ ਰੂਪ ਧਾਰ ਲਿਆ। ਅੱਗ ਕਾਰਨ ਮਸ਼ੀਨਰੀ, ਲੱਕੜ, ਪਲਾਈਵੁੱਡ, ਕੈਮੀਕਲ ਤੇ ਹੋਰ ਸਾਮਾਨ ਸੜ ਕੇ ਸੁਆਹ ਹੋ ਗਿਆ। ਇਸੇ ਦੌਰਾਨ ਸ਼ੈੱਡ ਵੀ ਸੜ ਕੇ ਹੇਠਾਂ ਡਿੱਗ ਪਿਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਠਾਨਕੋਟ, ਸ਼ਾਹਪੁਰਕੰਡੀ ਤੇ ਉਚਾ ਥੜਾ ਰਣਜੀਤ ਸਾਗਰ ਡੈਮ ਦੀਆਂ ਦਰਜਨ ਤੋਂ ਵੱਧ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਸਾਰੀ ਰਾਤ ਅੱਗ ਬਝਾਉਣ ਵਿੱਚ ਲੱਗੀਆਂ ਰਹੀਆਂ ਤੇ ਅੱਜ ਸਵੇਰੇ ਅੱਗ ’ਤੇ ਕਾਬੂ ਪਾਇਆ ਗਿਆ। ਅੱਗ ਲੱਗਣ ਕਾਰਨ ਕਰੋੜਾਂ ਰੁਪਏ ਦਾ ਨੁਕਸਾਨ ਹੋ ਗਿਆ। ਅੱਗ ਲੱਗਣ ਦੇ ਸਹੀ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ ਤੇ ਸਮਝਿਆ ਜਾ ਰਿਹਾ ਹੈ ਕਿ ਅੱਗ ਬਿਜਲੀ ਦੇ ਸ਼ਾਰਟ ਸਰਕਟ ਕਾਰਨ ਲੱਗੀ। ਸ਼ਾਹਪੁਰਕੰਡੀ ਦੇ ਥਾਣਾ ਮੁਖੀ ਭਾਰਤ ਭੂਸ਼ਣ ਸੈਣੀ ਅਨੁਸਾਰ ਅੱਗ ਲੱਗਣ ਦੇ ਮਾਮਲੇ ਦੀ ਪੜਤਾਲ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਸ ਅੱਗ ਕਾਰਨ ਜਾਨੀ ਨੁਕਸਾਨ ਤੋਂ ਬਚਾਅ ਰਿਹਾ ਪਰ ਫੈਕਟਰੀ ਮਾਲਕ ਨੂੰ ਵੱਡਾ ਮਾਲੀ ਨੁਕਸਾਨ ਹੋਇਆ।
ਅੱਗ ਲੱਗਣ ਬਾਰੇ ਰਾਤ 1.30 ਵਜੇ ਆਇਆ ਮਾਲਕ ਨੂੰ ਫੋਨ
ਫੈਕਟਰੀ ਦੇ ਮਾਲਕ ਰਾਕੇਸ਼ ਨੇ ਦੱਸਿਆ ਕਿ ਉਸ ਨੂੰ ਰਾਤ 1:30 ਵਜੇ ਦੇ ਕਰੀਬ ਚੌਕੀਦਾਰ ਦਾ ਫੋਨ ਆਇਆ ਕਿ ਫੈਕਟਰੀ ਵਿੱਚ ਅੱਗ ਲੱਗ ਗਈ ਹੈ। ਸੂਚਨਾ ਮਿਲਦੇ ਸਾਰ ਉਹ ਤੁਰੰਤ ਫੈਕਟਰੀ ਵਿੱਚ ਪੁੱਜੇ ਤਾਂ 2 ਏਕੜ ਵਿੱਚ ਬਣੀ ਹੋਈ ਫੈਕਟਰੀ ਵਿੱਚ ਅੱਗ ਚਾਰੇ ਪਾਸੇ ਫੈਲੀ ਹੋਈ ਸੀ। ਫਾਇਰ ਬ੍ਰਿਗੇਡ ਦਾ ਅਮਲਾ ਵੀ ਪੁੱਜ ਚੁੱਕਾ ਸੀ ਤੇ ਉਹ ਅੱਗ ਬੁਝਾਉਣ ਵਿੱਚ ਮਸ਼ਰੂਫ ਸੀ।