ਪੱਤਰ ਪ੍ਰੇਰਕ
ਪਠਾਨਕੋਟ, 29 ਜੂਨ
ਪਿੰਡ ਤਰੇਹਟੀ ਦੇ ਲਗਪਗ 50 ਘਰਾਂ ਨੂੰ ਪਿਛਲੇ 1 ਮਹੀਨੇ ਤੋਂ ਪੀਣ ਦਾ ਪਾਣੀ ਨਹੀਂ ਮਿਲ ਰਿਹਾ ਅਤੇ ਉਨ੍ਹਾਂ ਦੇ ਪਾਣੀ ਦੀ ਸਪਲਾਈ ਬੰਦ ਪਈ ਹੈ ਜਿਸ ਕਾਰਨ ਹਰੀਜਨ ਮੁਹੱਲੇ ਦੇ ਲੋਕਾਂ ਨੇ ਜਲ ਸਪਲਾਈ ਵਿਭਾਗ ਖਿਲਾਫ ਰੋਸ ਪ੍ਰਦਰਸ਼ਨ ਕੀਤਾ। ਇਸ ਦੌਰਾਨ ਸੁਭਾਸ਼ ਸਿੰਘ, ਧਰਮ ਪਾਲ, ਸਰਵਨ ਸਿੰਘ, ਅਰਜੁਨ ਸਿੰਘ, ਰਿਸ਼ੀ, ਅਸ਼ੋਕ, ਸ਼ਕੁੰਤਲਾ, ਤਾਰਾ, ਸਪਨਾ, ਰੇਖਾ ਆਦਿ ਨੇ ਦੱਸਿਆ ਕਿ ਉਹ ਪਿੰਡ ਤਰੇਹਟੀ ਦੀ ਦੂਸਰੀ ਸਪਲਾਈ ਤੋਂ ਪਾਣੀ ਢੋਅ ਕੇ ਗੁਜ਼ਾਰਾ ਕਰ ਰਹੇ ਹਨ ਪਰ ਵਾਟਰ ਸਪਲਾਈ ਵਿਭਾਗ ਉਨ੍ਹਾਂ ਦੀ ਸਮੱਸਿਆ ਨੂੰ ਹੱਲ ਕਰਨ ਦੀ ਬਜਾਏ ਮਹਿਜ਼ ਭਰੋਸਾ ਹੀ ਦੇ ਰਿਹਾ ਹੈ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਜੇ ਜਲਦੀ ਉਨ੍ਹਾਂ ਨੂੰ ਪੀਣ ਵਾਲਾ ਪਾਣੀ ਨਾ ਮਿਲਿਆ ਤਾਂ ਉਹ ਪਠਾਨਕੋਟ- ਸ਼ਾਹਪੁਰਕੰਡੀ ਮਾਰਗ ’ਤੇ ਧਰਨਾ ਲਗਾ ਕੇ ਆਵਾਜਾਈ ਠੱਪ ਕਰ ਦੇਣਗੇ।
ਇਸ ਸਬੰਧੀ ਜਦ ਜਲ ਸਪਲਾਈ ਵਿਭਾਗ ਦੇ ਜੇਈ ਬਲਵੀਰ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਪਿੰਡ ਤਰੇਹਟੀ ਦੀ ਇੱਕ ਸਪਲਾਈ ਦੀ ਸਫਾਈ ਕਰਵਾਈ ਗਈ ਸੀ। ਜਿਸ ਕਾਰਨ ਪਾਣੀ ਦਾ ਜਲ ਪੱਧਰ ਕਾਫੀ ਥੱਲੇ ਚਲਾ ਗਿਆ। ਉਸ ਸਪਲਾਈ ਤੋਂ ਪਾਣੀ ਪੰਪ ਰਾਹੀਂ ਨਹੀਂ ਉਠਾਇਆ ਜਾ ਰਿਹਾ। ਉਨ੍ਹਾਂ ਕਿਹਾ ਕਿ ਜਲਦੀ ਹੀ ਉੱਚ ਅਧਿਕਾਰੀਆਂ ਨੂੰ ਯੋਗ ਕਾਰਵਾਈ ਕਰਨ ਲਈ ਸਿਫਾਰਸ਼ ਕੀਤੀ ਜਾਵੇਗੀ।
ਕਾਰਜਕਾਰੀ ਇੰਜਨੀਅਰ ਮਹੇਸ਼ ਰਾਜ ਨਾਲ ਜਦ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦੱਸਿਆ ਕਿ ਖੇਤਰ ਦੇ ਲੋਕਾਂ ਨੂੰ ਪੀਣ ਦਾ ਪਾਣੀ ਉਪਲਭਧ ਕਰਵਾਉਣਾ ਉਨ੍ਹਾਂ ਦਾ ਫਰਜ਼ ਹੈ। ਜਲਦੀ ਹੀ ਸਾਰੀ ਕਾਰਵਾਈ ਕਰਕੇ ਉਨ੍ਹਾਂ ਨੂੰ ਪਿੰਡ ਤਰੇਹਟੀ ਦੀ ਦੂਸਰੀ ਸਪਲਾਈ ਨਾਲ ਜੋੜ ਦਿੱਤਾ ਜਾਵੇਗਾ।