ਪੱਤਰ ਪ੍ਰੇਰਕ
ਤਰਨ ਤਾਰਨ, 28 ਨਵੰਬਰ
ਚਾਰ ਦਿਨ ਪਹਿਲਾਂ ਮਾਝਾ ਕਾਲਜ ਨੇੜੇ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਵੱਲੋਂ ਕੀਤੇ ਗਏ ਹਮਲੇ ਵਿੱਚ ਇੱਕ ਪੱਤਰਕਾਰ ਸਮੇਤ ਤਿੰਨ ਜਣਿਆਂ ਨੂੰ ਜ਼ਖ਼ਮੀ ਕਰ ਦੇਣ ਖ਼ਿਲਾਫ਼ ਸਥਾਨਕ ਥਾਣਾ ਸਦਰ ਦੀ ਪੁਲੀਸ ਨੇ ‘ਆਪ’ ਦੇ 13 ਵਰਕਰਾਂ ਖਿਲਾਫ਼ ਕੇਸ ਦਰਜ ਕੀਤਾ ਹੈ। ਇਸ ਹਮਲੇ ਵਿੱਚ ਪੱਟੀ ਦੇ ਪੱਤਰਕਾਰ ਲਵਪ੍ਰੀਤ ਕੁਮਾਰ ਤੋਂ ਇਲਾਵਾ ਉਸ ਦੇ ਸਾਥੀ ਯਸ਼ ਬਧਵਾਰ ਅਤੇ ਨੀਰਜ ਕੁਮਾਰ ਨੂੰ ਸੱਟਾਂ ਲੱਗੀਆਂ ਸਨ। ਪੱਤਰਕਾਰਾਂ ਦੀ ਕਾਰ ‘ਆਪ’ ਆਗੂ ਰਹਿਮਤ ਸੰਧੂ ਦੀ ਕਾਰ ਨਾਲ ਖਹਿ ਗਈ ਅਤੇ ਇਸੇ ਗੱਲ ਤੋਂ ਤੈਸ਼ ਵਿੱਚ ਆਏ ਰਹਿਮਤ ਸੰਧੂ ਅਤੇ ਹੋਰ ਪਾਰਟੀ ਵਰਕਰਾਂ ਨੇ ਪੱਤਰਕਾਰ ਅਤੇ ਉਸ ਦੇ ਸਾਥੀਆਂ ’ਤੇ ਹਮਲਾ ਕਰ ਦਿੱਤਾ। ਏਐੱਸਆਈ ਕੰਵਲਜੀਤ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮਾਂ ਵਿੱਚੋਂ ਰਹਿਮਤ ਸੰਧੂ ਦੀ ਹੀ ਸ਼ਨਾਖਤ ਕੀਤੀ ਜਾ ਸਕੀ ਹੈ, ਜਦਕਿ ਬਾਕੀ 12 ਅਣਪਛਾਤੇ ਵਿਅਕਤੀਆਂ ਦਾ ਪਤਾ ਲਗਾਇਆ ਜਾ ਰਿਹਾ ਹੈ।