ਸਰਕਾਰ ਨੂੰ ਬਦਨਾਮ ਕਰ ਰਿਹੈ ਰਾਜ ਭਵਨ: ਉਮਰ

ਜੰਮੂ ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਅੱਜ ਉਪ ਰਾਜਪਾਲ ਪ੍ਰਸ਼ਾਸਨ ਨੂੰ ਨਿਸ਼ਾਨੇ ’ਤੇ ਲੈਂਦਿਆਂ ਦਾਅਵਾ ਕੀਤਾ ਕਿ ਰਾਜ ਭਵਨ ਵੱਲੋਂ ਮਨਮਰਜ਼ੀ ਵਾਲੇ ਤਬਾਦਲੇ ਅਤੇ ਬੁਲਡੋਜ਼ਰ ਦੀ ਵਰਤੋਂ ਕੇਂਦਰ ਸ਼ਾਸਿਤ ਪ੍ਰਦੇਸ਼ ’ਚ ਚੁਣੀ ਸਰਕਾਰ ਨੂੰ ‘ਬਦਨਾਮ’ ਕਰਨ ਦੀ ‘ਸਾਜ਼ਿਸ਼’ ਹੈ। ਅਬਦੁੱਲਾ ਬੀਤੇ ਦਿਨ ਜੰਮੂ ਵਿਕਾਸ ਅਥਾਰਿਟੀ (ਜੇ ਡੀ ਏ) ਵੱਲੋਂ ਪੱਤਰਕਾਰ ਦੇ ਮਕਾਨ ਸਮੇਤ ਕਈ ਢਾਂਚੇ ਢਾਹੇ ਜਾਣ ’ਤੇ ਪ੍ਰਤੀਕਿਰਿਆ ਦੇ ਰਹੇ ਸਨ। ਇਸ ਭੰਨ-ਤੋੜ ਦੀ ਵੱਡੇ ਪੱਧਰ ’ਤੇ ਆਲੋਚਨਾ ਹੋ ਰਹੀ ਹੈ। ਅਬਦੁੱਲਾ ਨੇ ਇੱਥੇ ਪੱਤਰਕਾਰਾਂ ਨੂੰ ਕਿਹਾ, ‘‘ਰਾਜ ਭਵਨ ’ਚ ਤਾਇਨਾਤ ਅਧਿਕਾਰੀ ਚੁਣੀ ਸਰਕਾਰ ਦੀ ਇਜਾਜ਼ਤ ਅਤੇ ਸਬੰਧਤ ਮੰਤਰੀ ਨਾਲ ਸਲਾਹ ਕੀਤੇ ਬਿਨਾਂ ਆਜ਼ਾਦ ਢੰਗ ਨਾਲ ਬੁਲਡੋਜ਼ਰ ਦੀ ਵਰਤੋਂ ਕਰਦੇ ਹਨ। ਇਹ ਚੁਣੀ ਸਰਕਾਰ ਦਾ ਅਕਸ ਖ਼ਰਾਬ ਕਰਨ ਦੀ ਸਪੱਸ਼ਟ ਸਾਜ਼ਿਸ਼ ਦਾ ਸੰਕੇਤ ਹੈ।’’ ਮੁੱਖ ਮੰਤਰੀ ਨੇ ਕਿਹਾ ਕਿ ਇਹੀ ਕਾਰਨ ਹੈ ਕਿ ਉਨ੍ਹਾਂ ਦੀ ਸਰਕਾਰ ਆਪਣੇ ਵਿਭਾਗਾਂ ’ਚ ਖੇਤਰੀ ਕਰਮਚਾਰੀ ਨਿਯੁਕਤ ਕਰਨ ਦੇ ਅਧਿਕਾਰ ਦੀ ਲੋੜ ’ਤੇ ਜ਼ੋਰ ਦੇ ਰਹੀ ਹੈ।