WorldMilkDay: ਵੈਟਰਨਰੀ ਯੂਨੀਵਰਸਿਟੀ ਨੇ ਵਿਸ਼ਵ ਦੁੱਧ ਦਿਹਾੜਾ ਮਨਾਇਆ

ਪ੍ਰੋਗਰਾਮ ਦੀ ਸ਼ੁਰੂਆਤ ‘ਵਿਸ਼ਵ ਦੁੱਧ ਦਿਵਸ ਸਹੁੰ’ ਚੁੱਕਣ ਦੀ ਰਸਮ ਨਾਲ ਹੋਈ। ਪ੍ਰਤੀਭਾਗੀਆਂ ਨੇ ਦੁੱਧ ਦੀ ਵਰਤੋਂ, ਡੇਅਰੀ ਸਫ਼ਾਈ ਅਤੇ ਭੋਜਨ ਸੁਰੱਖਿਆ ਨੂੰ ਹੁਲਾਰਾ ਦੇਣ ਦੇ ਨਾਲ ਡੇਅਰੀ ਕਿਸਾਨਾਂ ਦੇ ਸਹਿਯੋਗ ਲਈ ਵਚਬੱਧਤਾ ਪ੍ਰਗਟਾਈ। ਇਸ ਮੌਕੇ ਵਿਦਿਆਰਥੀਆਂ ਨੇ ਵੱਖ ਵੱਖ ਗਤੀਵਿਧੀਆਂ ਰਾਹੀਂ ਦੁੱਧ ਦੀ ਮਹੱਤਤਾ ਬਾਰੇ ਦੱਸਿਆ। ਇਸ ਦੇ ਨਾਲ ‘ਮਿਲਕ ਕੁਇਜ਼ ਮੁਕਾਬਲਾ’, ‘60 ਸਕਿੰਟ ਡੇਅਰੀ ਸਾਇੰਸ ਚੁਣੌਤੀ’, ‘ਸੁੰਘਣ ਸ਼ਕਤੀ ਨਾਲ ਡੇਅਰੀ ਉਤਪਾਦ ਦੀ ਪਛਾਣ’, ‘ਨਿਵੇਕਲੀ ਡੇਅਰੀ ਗਿਫਟ ਪੈਕਿੰਗ’, ‘ਪੋਸਟਰ ਪ੍ਰਦਰਸ਼ਨੀ’ ਦੇ ਨਾਲ ਨਾਲ ‘ਵਰਲਡ ਮਿਲਕ ਡੇਅ ਮਿਲਕ ਟੋਸਟ 2026’ ਆਦਿ ਮੁਕਾਬਲੇ ਕਰਵਾਏ ਗਏ। ਇਸ ਮੌਕੇ ਉਪ ਕੁਲਪਤੀ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ ਦੁੱਧ ਅਤੇ ਡੇਅਰੀ ਉਤਪਾਦਾਂ ਲਈ ਮਹੱਤਤਾ ਨੂੰ ਉਜਾਗਰ ਕੀਤਾ।

ਇਸ ਦਿਵਸ ਦੇ ਹਿੱਸੇ ਵਜੋਂ ਕਾਲਜ ਵੱਲੋਂ ਆਪਣੇ ਲੁਧਿਆਣਾ ਕੈਂਪਸ ਵਿੱਚ 3 ਜੁਲਾਈ ਤਕ ਦੁੱਧ ਦੀ ਮਿਲਾਵਟ ਜਾਂਚਣ ਸੰਬੰਧੀ ਕੈਂਪ ਵੀ ਲਾਏ ਜਾਣਗੇ। ਕੈਂਪ ਵਿੱਚ ਕੱਚੇ ਦੁੱਧ ਦੇ ਨਮੂਨਿਆਂ ਦੀ ਜਾਂਚ ਕਰਕੇ ਉਸ ਵਿੱਚੋਂ ਮਿਲਾਵਟੀ ਤੱਤਾਂ ਦਾ ਪਤਾ ਲਗਾਇਆ ਜਾਵੇਗਾ। ਇਸ ਕਾਰਜ ਦਾ ਉਦੇਸ਼ ਦੁੱਧ ਦੀ ਗੁਣਵੱਤਾ ਬਿਹਤਰ ਕਰਨਾ ਅਤੇ ਖਪਤਕਾਰਾਂ ਦੀ ਜਾਗਰੂਕਤਾ ਨੂੰ ਵਧਾਉਣਾ ਹੈ। ਵੱਖ-ਵੱਖ ਮੁਕਾਬਲਿਆਂ ਦੇ ਜੇਤੂਆਂ ਨੂੰ ਪ੍ਰਮਾਣ ਪੱਤਰ ਅਤੇ ਇਨਾਮ ਤਕਸੀਮ ਕੀਤੇ ਗਏ। ਇਸ ਮੌਕੇ ਡੀਨ, ਕਾਲਜ ਆਫ ਡੇਅਰੀ ਅਤੇ ਫੂਡ ਸਾਇੰਸ ਤਕਨਾਲੋਜੀ ਡਾ. ਸਰਵਪ੍ਰੀਤ ਸਿੰਘ ਘੁੰਮਣ ਨੇ ਵਿਦਿਆਰਥੀਆਂ ਦੀ ਭਰਵੀਂ ਸ਼ਮੂਲੀਅਤ ਦੀ ਸ਼ਲਾਘਾ ਕੀਤੀ ਅਤੇ ਪੌਸ਼ਟਿਕ ਸੁਰੱਖਿਆ ਅਤੇ ਪੇਂਡੂ ਵਿਕਾਸ ਵਿੱਚ ਡੇਅਰੀ ਖੇਤਰ ਦੀ ਭੂਮਿਕਾ ਨੂੰ ਹੋਰ ਅੱਗੇ ਵਧਾਉਣ ਲਈ ਜ਼ੋਰ ਦਿੱਤਾ।