ਸੜਕ ਹਾਦਸਿਆਂ ਵਿੱਚ ਔਰਤ ਸਣੇ ਦੋ ਹਲਾਕ

ਇਥੇ ਵਾਪਰੇ ਸੜਕ ਹਾਦਸਿਆਂ ਵਿੱਚ ਔਰਤ ਸਣੇ ਦੋ ਜਣਿਆਂ ਦੀ ਮੌਤ ਹੋ ਗਈ ਹੈ ਜਦ ਕਿ ਇੱਕ ਵਿਅਕਤੀ ਗੰਭਰ ਜ਼ਖ਼ਮੀ ਹੋ ਗਿਆ ਹੈ, ਜਿਸ ਨੂੰ ਹਸਪਤਾਲ ਦਾਖ਼ਲ ਕਰਾਇਆ ਗਿਆ ਹੈ। ਨਵੀਂ ਦਾਣਾ ਮੰਡੀ ਕੋਹਾੜਾ ਰੋਡ ਸਾਹਨੇਵਾਲ ਨੇੜੇ ਰਾਜਿੰਦਰ ਕੁਮਾਰ ਉਰਫ਼ ਬਿੱਟੂ (51) ਆਪਣੇ ਮੋਟਰਸਾਈਕਲ ’ਤੇ ਘਰ ਵਾਪਸ ਜਾ ਰਿਹਾ ਸੀ ਤਾਂ ਸਵਿੱਫਟ ਗੱਡੀ ਦੇ ਡਰਾਈਵਰ ਨੇ ਤੇਜ਼ ਰਫ਼ਤਾਰੀ ਨਾਲ ਮੋਟਰਸਾਈਕਲ ਨੂੰ ਫੇਟ ਮਾਰੀ ਅਤੇ ਫ਼ਰਾਰ ਹੋ ਗਿਆ। ਜ਼ਿਆਦਾ ਸੱਟਾਂ ਕਾਰਨ ਰਾਜਿੰਦਰ ਕੁਮਾਰ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ‌। ਥਾਣੇਦਾਰ ਜਸਪ੍ਰੀਤ ਸਿੰਘ ਅਨੁਸਾਰ ਪੁਲੀਸ ਵੱਲੋਂ ਵਾਹਨ ਚਾਲਕ ਖ਼ਿਲਾਫ਼ ਕੇਸ ਦਰਜ ਕਰਕੇ ਲਾਸ਼ ਵਾਰਸਾਂ ਹਵਾਲੇ ਕਰ ਦਿੱਤੀ ਗਈ ਹੈ। ਇਸੇ ਤਰ੍ਹਾਂ ਕਬੀਰ ਨਗਰ ਡਾਬਾ ਰੋਡ ਵਾਸੀ ਸੁਨੀਲ ਕੁਮਾਰ ਦੀ ਮਾਤਾ ਚੰਦਰਵਤੀ (56) ਉਸਦੀ ਪਤਨੀ ਸਰੋਜ ਅਤੇ ਬੇਟੀ ਵਾਮਿਕਾ (2) ਨਾਲ ਡਾਬਾ ਰੋਡ ਲੋਹੇ ਵਾਲਾ ਪੁੱਲ ਕੋਲ ਆਟੋ ਤੋਂ ਉਤਰੇ ਤਾਂ ਉਹ ਪੁਲ ਤੋਂ ਸੜਕ ਪਾਰ ਕਰਕੇ ਡਾਬਾ ਰੋਡ ਵੱਲ ਜਾਣ ਲੱਗੇ ਤਾਂ ਦਿੱਲੀ ਵੱਲੋਂ ਤੋਂ ਆ ਰਹੀ ਕਾਰ ਦੇ ਅਣਪਛਾਤੇ ਚਾਲਕ ਨੇ ਉਨ੍ਹਾਂ ਦੀ ਮਾਤਾ ਨੂੰ ਟੱਕਰ ਮਾਰੀ ਤੇ ਫ਼ਰਾਰ ਹੋ ਗਿਆ। ਜ਼ਿਆਦਾ ਸੱਟਾਂ ਲੱਗਣ ਕਾਰਨ ਇਲਾਜ਼ ਦੌਰਾਨ ਚੰਦਰਵਤੀ ਦੀ ਮੋਹਨ ਦੇਈ ਹਸਪਤਾਲ ਵਿੱਚ ਮੌਤ ਹੋ ਗਈ। ਪੁਲੀਸ ਨੇ ਕੇਸ ਦਰਜ ਕਰ ਲਿਆ ਹੈ। ਇਸੇ ਤਰ੍ਹਾਂ ਥਾਣਾ ਡਿਵੀਜ਼ਨ ਨੰਬਰ 2 ਦੇ ਇਲਾਕੇ ਗਨੇਸ਼ ਨਗਰ ਵਾਲੀ ਵਿੱਚ ਮਨੂਵਰ ਅੰਸਾਰੀ ਗਨੇਸ਼ ਨਗਰ ਵਾਲੀ ਗਲੀ ਆ ਰਿਹਾ ਸੀ, ਤਾਂ ਇਕ ਕਾਰ ਦੇ ਡਰਾਈਵਰ ਗੁਰਚਰਨ ਸਿੰਘ ਵਾਸੀ ਜੀ ਟੀ ਬੀ ਨਗਰ ਨੇ ਉਸ ਵਿੱਚ ਟੱਕਰ ਮਾਰੀ, ਜਿਸ ਨਾਲ ਉਸ ਨੂੰ ਕਾਫ਼ੀ ਸੱਟਾਂ ਲੱਗੀਆਂ ਅਤੇ ਕਾਰ ਚਾਲਕ ਫਰਾਰ ਹੋ ਗਿਆ। ਇਲਾਜ ਲਈ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ।