ਸ਼ਾਮਲਾਤ ’ਚੋਂ ਦੋ ਦਹਾਕੇ ਪੁਰਾਣਾ ਬੋਹੜ ਪੁੱਟਿਆ

ਨੇੜਲੇ ਪਿੰਡ ਕਰੌਂਦੀਆਂ ਵਿੱਚ ਸ਼ਾਮਲਾਤ ਜਗ੍ਹਾ ਵਿੱਚ ਖੜਾ ਬੋਹੜ ਗੈਰ-ਕਾਨੂੰਨੀ ਢੰਗ ਨਾਲ ਪੁੱਟਣ ਦਾ ਮਾਮਲਾ ਆਇਆ ਹੈ। ਸ਼ਿਕਾਇਤਕਰਤਾ ਚੰਨਪ੍ਰੀਤ ਸਿੰਘ ਪੁੱਤਰ ਗੁਰਵਿੰਦਰ ਸਿੰਘ ਵਾਸੀ ਕਰੌਦੀਆਂ ਨੇ ਬੀ ਡੀ ਪੀ ਓ ਦੋਰਾਹਾ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਕਿਹਾ ਕਿ ਬੀਤੀ ਰਾਤ ਪਿੰਡ ਦੀ ਪੰਚਾਇਤੀ ਥਾਂ ਵਿੱਚ ਲੱਗਿਆ 20 ਸਾਲ ਪੁਰਾਣਾ ਬੋਹੜ ਦਾ ਦਰੱਖਤ ਗ਼ੈਰ-ਕਾਨੂੰਨੀ ਤਰੀਕੇ ਨਾਲ ਪੁੱਟਿਆ ਗਿਆ ਹੈ। ਸ਼ਿਕਾਇਤਕਰਤਾ ਨੇ ਕਿਹਾ ਕਿ ਪਿੰਡ ਦੇ ਹੀ ਇੱਕ ਵਿਅਕਤੀ ਕੁਲਦੀਪ ਸਿੰਘ ਨੇ ਸਰਪੰਚ ਦੀ ਸਹਿ ’ਤੇ ਰਾਤ 9 ਵਜੇ ਦੇ ਕਰੀਬ ਬੋਹੜ ਨੂੰ ਜੇਸੀਬੀ ਮਸ਼ੀਨ ਨਾਲ ਪੁੱਟਿਆ। ਇਹ ਦਰੱਖਤ ਪਿੰਡ ਦੀ ਸ਼ਾਮਲਾਤ ਜਗ੍ਹਾ ’ਚ ਲੱਗਾ ਹੋਇਆ ਸੀ। ਉਨ੍ਹਾਂ ਬੀ ਡੀ ਪੀ ਓ ਤੋਂ ਮੰਗ ਕੀਤੀ ਕਿ ਬੋਹੜ ਪੁੱਟਣ ਵਾਲੇ ਵਿਅਕਤੀਆਂ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ। ਇਸ ਸਬੰਧੀ ਜਦੋਂ ਮੌਜੂਦਾ ਸਰਪੰਚ ਨਰਿੰਦਰ ਕੌਰ ਦੇ ਪਤੀ ਹਰਿੰਦਰ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਪੰਚਾਇਤੀ ਥਾਂ ਵਿੱਚੋਂ ਬੋਹੜ ਪੁੱਟਣ ਬਾਰੇ ਕੋਈ ਜਾਣਕਾਰੀ ਨਹੀਂ। ਇੱਥੇ ਦੱਸਣਯੋਗ ਹੈ ਕਿ ਦਰੱਖਤ ਪੁੱਟਣ ਤੋਂ ਪਹਿਲਾਂ ਬੀ ਡੀ ਪੀ ਓ ਅਤੇ ਜੰਗਲਾਤ ਵਿਭਾਗ ਕੋਲੋਂ ਮਨਜ਼ੂਰੀ ਲੈਣੀ ਹੁੰਦੀ ਹੈ।

ਇਸ ਸਬੰਧੀ ਬੀ ਡੀ ਪੀ ਓ ਦੋਰਾਹਾ ਮੈਡਮ ਸੁਮਰਿਤਾ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਬੋਹੜ ਦਾ ਦਰੱਖਤ ਪੁੱਟਣ ਸਬੰਧੀ ਕੋਈ ਦਰਖਾਸਤ ਨਹੀਂ ਮਿਲੀ।

ਦੂਜੇ ਪਾਸੇ ਸ਼ਿਕਾਇਤਕਰਤਾ ਕੋਲ ਬੀ ਡੀ ਪੀ ਓ ਦਫ਼ਤਰ ਵਿੱਚ ਦਿੱਤੀ ਦਰਖਾਸਤ ਦੀ ਰਸੀਵਿੰਗ ਕਾਪੀ ਹੈ।