ਡੀਪੀਐੱਸ ਬੱਤਰਾ
ਸਮਰਾਲਾ, 6 ਦਸੰਬਰ
ਪੁਲੀਸ ਨੇ ਇੱਕ ਪੰਜ ਮੈਂਬਰੀ ਅਜਿਹੇ ਗਰੋਹ ਦਾ ਪਰਦਾਫਾਸ਼ ਕੀਤਾ ਹੈ, ਜੋ ਪੰਜਾਬ ਦੇ ਵੱਖ-ਵੱਖ ਖੇਤਰਾਂ ਵਿੱਚ ਟਿੱਪਰ-ਟਰਾਲੇ ਚੋਰੀ ਕਰਨ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਰਿਹਾ ਸੀ। ਇਹ ਗਰੋਹ ਫਰਜ਼ੀ ਕਾਗਜ਼ਾਤਾਂ ਦੇ ਆਧਾਰ ’ਤੇ ਚੋਰੀ ਕੀਤੇ ਟਿੱਪਰਾਂ ਨੂੰ ਅੱਗੇ ਵੇਚਣ ਵਿੱਚ ਵੀ ਮਾਹਿਰ ਸੀ। ਪੁਲੀਸ ਨੇ ਗਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫ਼ਤਾਰ ਕਰਦੇ ਹੋਏ ਉਨ੍ਹਾਂ ਕੋਲੋ ਚੋਰੀ ਦਾ ਇੱਕ ਟਿੱਪਰ ਅਤੇ ਇੱਕ ਈਡੀਗੋ ਕਾਰ ਬਰਾਮਦ ਕੀਤੀ ਹੈ। ਬਾਕੀ ਦੋ ਹੋਰ ਮੈਂਬਰਾਂ ਦੀ ਛੇਤੀ ਹੀ ਗ੍ਰਿਫ਼ਤਾਰੀ ਹੋਣ ’ਤੇ ਉਨ੍ਹਾਂ ਦੇ ਕਬਜ਼ੇ ਵਿੱਚੋਂ ਕਈ ਹੋਰ ਵਾਹਨ ਬਰਾਮਦ ਹੋਣ ਦੀ ਸੰਭਾਵਨਾ ਹੈ। ਐੱਸ.ਐੱਸ.ਪੀ. ਖੰਨਾ ਬਲਵਿੰਦਰ ਸਿੰਘ ਅਤੇ ਡੀ.ਐੱਸ.ਪੀ. ਸਮਰਾਲਾ ਹਰਵਿੰਦਰ ਸਿੰਘ ਖਹਿਰਾ ਨੇ ਦੱਸਿਆ ਕਿ ਸਹਾਇਕ ਥਾਣੇਦਾਰ ਸਮਸ਼ੇਰ ਸਿੰਘ ਨੇ ਸ਼ਹਿਰ ਦੇ ਮੁੱਖ ਚੌਕ ਵਿੱਚ ਨਾਕਾਬੰਦੀ ਕੀਤੀ ਹੋਈ ਸੀ, ਇਸ ਦੌਰਾਨ ਇਹ ਇਤਲਾਹ ਮਿਲੀ ਕਿ ਇਲਾਕੇ ਵਿਚ ਚੋਰੀ ਦੇ ਟਿੱਪਰ ਸਮੇਤ ਇੱਕ ਗਰੋਹ ਘੁੰਮ ਰਿਹਾ ਹੈ। ਇਹ ਗਰੋਹ ਸੂਬੇ ਵਿੱਚ ਟਿੱਪਰ ਚੋਰੀ ਦੀਆਂ ਕਈ ਘਟਨਾਵਾਂ ਵਿੱਚ ਸ਼ਾਮਲ ਹੈ। ਇਸ ਮਗਰੋਂ ਪੁਲੀਸ ਨੇ ਕਾਰਵਾਈ ਕਰਦੇ ਹੋਏ ਜੱਸੀ ਵਾਸੀ ਬਲਦੇਵ ਨਗਰ ਮੋਰਿੰਡਾ, ਰਿੰਕੂ ਪਿੰਡ ਨਿੱਘੀ ਅਤੇ ਸ਼ੈਪੀ ਵਾਸੀ ਪਿੰਡ ਬਾਲੇਵਾਲ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲੀਸ ਨੇ ਉਨ੍ਹਾਂ ਪਾਸੋਂ ਚੋਰੀ ਕੀਤਾ ਟਿੱਪਰ (ਪੀਬੀ 10ਈ 6969) ਅਤੇ ਇੱਕ ਈਡੀਗੋਂ ਕਾਰ (ਪੀਬੀ 12 ਕਿਊ 0147) ਬਰਾਮਦ ਕਰਦੇ ਹੋਏ ਉਨ੍ਹਾਂ ਖਿਲਾਫ਼ ਵੱਖ-ਵੱਖ ਧਾਰਾਵਾਂ ਅਧੀਨ ਕੇਸ ਦਰਜ ਕਰ ਲਿਆ ਹੈ। ਅਧਿਕਾਰੀਆਂ ਨੇ ਅੱਗੇ ਦੱਸਿਆ ਕਿ ਗਰੋਹ ਦੇ ਦੋ ਹੋਰ ਮੈਂਬਰਾਂ ਜਿਨ੍ਹਾਂ ਵਿੱਚ ਪ੍ਰਸ਼ਾਂਤ ਵਾਸੀ ਥੋਪੀਆ (ਬਲਾਚੌਰ) ਅਤੇ ਦਰਸ਼ਨ ਉਰਫ ਲਾਡੀ ਵਾਸੀ ਭਾਦਲਾ (ਲੁਧਿਆਣਾ) ਦੀ ਗ੍ਰਿਫ਼ਤਾਰੀ ਬਾਕੀ ਹੈ। ਇਹ ਗਰੋਹ ਚੋਰੀ ਕੀਤੇ ਟਿੱਪਰਾਂ ਦੇ ਇੰਜਣ ਤੇ ਚਾਸੀ ਨੰਬਰ ਬਦਲ ਕੇ ਫਰਜ਼ੀ ਕਾਗਜ਼ਾਤ ਤਿਆਰ ਅੱਗੇ ਲੋਕਾਂ ਨੂੰ ਵੇਚਣ ਦਿੰਦੇ ਸਨ।