ਸਿਆਲ ਦਾ ਦੂਜਾ ਸਭ ਤੋਂ ਠੰਢਾ ਰਿਹਾ ਸਾਲ ਦਾ ਆਖ਼ਰੀ ਦਿਨ

ਪਿਛਲੇ ਕੁੱਝ ਦਿਨਾਂ ਤੋਂ ਲਗਾਤਾਰ ਸਵੇਰੇ ਅਤੇ ਸ਼ਾਮ ਧੁੰਦ ਪੈਣ ਕਰਕੇ ਮੌਸਮ ਵਿੱਚ ਠੰਢਕ ਲਗਾਤਾਰ ਵਧਦੀ ਜਾ ਰਹੀ ਹੈ। ਅੱਜ ਲੁਧਿਆਣਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਸਾਰਾ ਦਿਨ ਸੰਘਣੀ ਧੁੰਦ, ਟੁੱਟਵੀਂ ਬੱਦਲਵਾਈ ਅਤੇ ਤੇਜ਼ ਬਰਫੀਲੀ ਹਵਾ ਚੱਲਦੀ ਰਹੀ। ਇਸ ਨਾਲ ਜਿੱਥੇ ਆਮ ਜਨ-ਜੀਵਨ ਪ੍ਰਭਾਵਿਤ ਹੋਇਆ ਉੱਥੇ ਧੁੱਦ ਕਰਕੇ ਮੁੱਖ ਸੜਕਾਂ ’ਤੇ ਆਵਾਜਾਈ ਵੀ ਪ੍ਰਭਾਵਿਤ ਹੋਈ। ਲੋਕ ਇਸ ਹੱਢ-ਚੀਰਵੀਂ ਠੰਢ ਤੋਂ ਬਚਾਅ ਲਈ ਤਰ੍ਹਾਂ-ਤਰ੍ਹਾਂ ਦੇ ਉਪਾਅ ਕਰਦੇ ਦੇਖੇ ਗਏ। ਕਈ ਲੋਕਾਂ ਨੇ ਸੜਕਾਂ ਦੇ ਕਿਨਾਰਿਆਂ ’ਤੇ ਧੂਣੀਆਂ ਬਾਲੀਆਂ ਹੋਈਆਂ ਸਨ।

ਪੀ ਏ ਯੂ ਦੇ ਮੌਸਮ ਵਿਭਾਗ ਦੀ ਮੁਖੀ ਡਾ. ਪਵਨੀਤ ਕੌਰ ਕਿੰਗਰਾ ਨੇ ਦੱਸਿਆ ਕਿ ਇਸ ਸਾਲ ਦਿਨ ਸਮੇਂ ਘੱਟ ਤੋਂ ਘੱਟ ਤਾਪਮਾਨ 20 ਦਸੰਬਰ ਨੂੰ 14.2 ਡਿਗਰੀ ਸੈਲੀਅਸ ਸੀ ਅਤੇ ਉਸ ਤੋਂ ਬਾਅਦ ਹੁਣ 31 ਦਸੰਬਰ ਨੂੰ ਦਿਨ ਸਮੇਂ ਦਾ ਤਾਪਮਾਨ 15 ਡਿਗਰੀ ਸੈਲਸੀਅਸ ਰਿਹਾ ਹੈ ਜੋ ਦਸੰਬਰ ਮਹੀਨੇ ਦਾ ਦਿਨ ਸਮੇਂ ਦਾ ਦੂਜਾ ਸਭ ਤੋਂ ਘੱਟ ਤਾਪਮਾਨ ਰਿਹਾ ਹੈ। ਇਸੇ ਤਰ੍ਹਾਂ ਅੱਜ ਰਾਤ ਸਮੇਂ ਦਾ ਤਾਪਮਾਨ ਵੀ 7.2 ਡਿਗਰੀ ਸੈਲਸੀਅਸ ਰਿਹਾ ਹੈ। ਡਾ. ਕਿੰਗਰਾ ਨੇ ਦੱਸਿਆ ਕਿ ਪਿਛਲੇ ਕਈ ਸਾਲਾਂ ਤੋਂ 31 ਦਸੰਬਰ ਦਾ ਤਾਪਮਾਨ ਲਗਾਤਾਰ ਬਦਲਦਾ ਆ ਰਿਹਾ ਹੈ। 2015 ਦੀ 31 ਦਸੰਬਰ ਨੂੰ 22.2, ਸਾਲ 2022 ਦੀ 31 ਦਸੰਬਰ ਨੂੰ 11.4 ਡਿਗਰੀ ਸੈਲਸੀਅਸ ਅਤੇ ਇਸ ਵਾਰ 15 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਲੁਧਿਆਣਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਆਉਂਦੇ 24 ਘੰਟਿਆਂ ’ਚ ਟੁੱਟਵੀਂ ਬੱਦਲਵਾਈ ਰਹਿਣ, ਕਿਤੇ ਕਿਤੇ ਕਿਣਮਿਣ ਹੋਣ ਅਤੇ ਉਸ ਤੋਂ ਬਾਅਦ 2 ਜਨਵਰੀ ਨੂੰ ਦੁਬਾਰਾ ਸੰਘਣੀ ਧੁੰਦ ਪੈਣ ਦੀ ਸੰਭਾਵਨਾ ਹੈ।