ਸ਼ੇਰਗੜ੍ਹ ਦੰਗਲ: ਝੰਡੀ ਦੀ ਕੁਸ਼ਤੀ ਤਾਲਿਬ ਬਾਬਾ ਫਲਾਹੀ ਨੇ ਜਿੱਤੀ

ਪਿੰਡ ਸ਼ੇਰਗੜ੍ਹ ਵਿੱਚ ਸਥਿਤ ਡੇਰਾ ਬਾਬਾ ਪੀਰ ਫਲਾਹੀ ਵਿਖੇ ਦੂਜੇ ਦਿਨ ਦੰਗਲ ਮੇਲਾ ਕਰਵਾਇਆ ਗਿਆ। ਡੇਰੇ ਦੇ ਮੁੱਖ ਪ੍ਰਬੰਧਕ ਅਤੇ ਗੱਦੀ ਨਸ਼ੀਨ ਬਾਬਾ ਦੀਪਾ ਫਲਾਹੀ ਨੇ ਦੱਸਿਆ ਕਿ ਸਵਰਗੀ ਬਾਬਾ ਸੰਤੋਖ ਸਿੰਘ ਦੀ ਯਾਦ ਨੂੰ ਸਮਰਪਿਤ 12ਵੇਂ ਦੰਗਲ ਮੇਲੇ ’ਚ ਪੰਜਾਬ, ਜੰਮੂ, ਹਰਿਆਣਾ ਅਤੇ ਹਿਮਾਚਲ ਦੇ 400 ਤੋਂ ਵੱਧ ਪਹਿਲਵਾਨਾਂ ਨੇ ਹਿੱਸਾ ਲਿਆ। ਝੰਡੀ ਦੀ ਕੁਸ਼ਤੀ ਵਿੱਚ ਤਾਲਿਬ ਬਾਬਾ ਫਲਾਹੀ ਨੇ ਸਤਪਾਲ ਮਹਾਰਾਸ਼ਟਰ ਨੂੂੰ ਚਿੱਤ ਕੀਤਾ। ਇਸ ਉਪਰੰਤ ਗੌਰਵ ਮਾਛੀਵਾੜਾ ਨੇ ਜਲਾਲ ਇਰਾਨ ਦੀ ਪਿੱਠ ਧਰਤੀ ਨਾਲ ਲਗਾ ਦਿੱਤੀ। ਭੁਪਿੰਦਰ ਅਜਨਾਲਾ ਨੇ ਪ੍ਰਸ਼ਾਤ ਮਹਾਰਾਸ਼ਟਰ ਨੂੰ ਹਰਾਇਆ। ਸਿੰਕਦਰ ਸ਼ੇਖ਼ ਨੇ ਕਾਲੂ ਬਾਹੜੂਵਾਲ ਨੂੰ ਚਿੱਤ ਕੀਤਾ। ਦੰਗਲ ਮੇਲੇ ’ਚ ਪਹਿਲਵਾਨ ਜਗਦੀਸ਼ ਭੋਲਾ ਹਿੰਦ ਕੇਸਰੀ, ਪਰਮਿੰਦਰ ਡੂਮਛੇੜੀ ਹਿੰਦ ਕੇਸਰੀ, ਸੁਭਾਸ਼ ਮਲਿਕ ਇੰਟਰਨੈਸ਼ਨਲ ਕੁਸ਼ਤੀ ਕੋਚ, ਪਹਿਲਵਾਨ ਜਗਦੇਵ ਸਿੰਘ ਢਿੱਲਵਾਂ, ਪਦਾਰਥ ਪਹਿਲਵਾਨ ਦੇ ਮਾਤਾ-ਪਿਤਾ ਪਲਵਿੰਦਰ ਸਿੰਘ ਤੇ ਰਾਜ ਕੌਰ ਦਾ ਵਿਸ਼ੇਸ਼ ਤੌਰ ’ਤੇ ਸਨਮਾਨ ਕੀਤਾ ਗਿਆ। ਪ੍ਰੇਮ ਸਿੰਘ ਨੰਬਰਦਾਰ ਵੱਲੋਂ ਝੰਡੀ ਦੇ ਜੇਤੂ ਪਹਿਲਵਾਨਾਂ ਨੂੰ ਅਲਟੋ ਕਾਰ ਦਿੱਤੀ ਗਈ। ਦੰਗਲ ਮੇਲੇ ’ਚ ਵਿਸ਼ੇਸ਼ ਤੌਰ ’ਤੇ ਪੁੱਜੇ ਮੁੱਖ ਮਹਿਮਾਨ ਆਬਜ਼ਰਵਰ ਹਲਕਾ ਸਾਹਨੇਵਾਲ ਤੇ ਬੱਸੀ ਪਠਾਣਾਂ ਕਸਤੂਰੀ ਲਾਲ ਮਿੰਟੂ, ਸਾਬਕਾ ਚੇਅਰਮੈਨ ਸੋਹਣ ਲਾਲ ਸ਼ੇਰਪੁਰੀ, ਸਾਬਕਾ ਬਲਾਕ ਸੰਮਤੀ ਮੈਂਬਰ ਹੁਸਨ ਲਾਲ ਮੜਕਨ, ਆੜ੍ਹਤੀ ਕ੍ਰਿਸ਼ਨ ਲਾਲ ਕਾਲੜਾ, ਬਾਬਾ ਕਰਮ ਸਿੰਘ ਨਥਲਪੁਰ ਵਾਲੇ, ਸ਼ੇਰ ਸਿੰਘ ਯੂ ਐੱਸ ਏ, ਕਾਕਾ ਢਿੱਲੋਂ, ਸੁੱਖਾ ਇਟਲੀ, ਨਰਿੰਦਰ ਸਿੰਘ ਸਾਬਕਾ ਸਰਪੰਚ ਕਾਈਨੌਰ, ਪਾਲ ਯੂ ਕੇ , ਸਰਪੰਚ ਜੋਗਿੰਦਰ ਸਿੰਘ ਪੋਲਾ, ਪੰਚ ਰਾਜਵੀਰ ਖੁਰਾਣਾ, ਪ੍ਰਿਤਪਾਲ ਸਿੰਘ ਪੋਲਾ ਨੇ ਸ਼ਿਰਕਤ ਕੀਤੀ। ਦੰਗਲ ਮੇਲੇ ਦੇ ਪੁੱਜੇ ਪਹਿਲਵਾਨਾਂ ਅਤੇ ਆਏ ਮੁੱਖ ਮਹਿਮਾਨਾਂ ਨੂੰ ਸਨਮਾਨ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਦੰਗਲ ਦੇ ਮੁੱਖ ਪ੍ਰਬੰਧਕ ਗੱਦੀ ਨਸ਼ੀਨ ਬਾਬਾ ਦੀਪਾ ਬਾਬਾ ਪੀਰ ਫਲਾਹੀ ਨੇ ਆਏ ਮੁੱਖ ਮਹਿਮਾਨਾਂ, ਪਹਿਲਵਾਨਾਂ, ਪ੍ਰਵਾਸੀ ਪੰਜਾਬੀਆਂ ਅਤੇ ਸੰਗਤਾਂ ਦਾ ਧੰਨਵਾਦ ਕੀਤਾ।