ਗਗਨਦੀਪ ਅਰੋੜਾ
ਲੁਧਿਆਣਾ, 15 ਸਤੰਬਰ
ਉੱਚ ਸੁਰੱਖਿਆ ਨੰਬਰ ਪਲੇਟਾਂ ਦੇ ਮੁੱਦੇ ’ਤੇ ਅੱਜ ਰੋਡ ਸੇਫਟੀ ਸੈੱਲ ਦੇ ਮੈਂਬਰ ਡਾ. ਕਮਲਜੀਤ ਸੋਈ ਨੇ ਖੁਲਾਸਾ ਕੀਤਾ ਹੈ ਕਿ ਪੰਜਾਬ ਦੇ ਕੁੱਝ ਮੰਤਰੀਆਂ ਦੇ ਟਸ਼ਨ ਕਾਰਨ ਉੱਚ ਸੁਰੱਖਿਆ ਨੰਬਰ ਪਲੇਟਾਂ ਦਾ ਕੰਮ ਸਿਰੇ ਨਹੀਂ ਚੜ੍ਹ ਰਿਹਾ ਹੈ। ਡਾ. ਸੋਈ ਲੁਧਿਆਣਾ ’ਚ ਪੱਤਰਕਾਰੀ ਮਿਲਣੀ ਨੂੰ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਉੱਚ ਸੁਰੱਖਿਆ ਨੰਬਰ ਪਲੇਟਾਂ ਨੂੰ ਲੈ ਕੇ ਪੰਜਾਬ ਸਰਕਾਰ ਕਿੰਨੀ ਗੰਭੀਰ ਹੈ, ਇਸਦਾ ਅੰਦਾਜ਼ਾ ਇਸ ਗੱਲ ਤੋਂ ਲਾਇਆ ਜਾ ਸਕਦਾ ਹੈ ਕਿ ਪੰਜਾਬ ਦੇ ਵਿੱਤ ਮੰਤਰੀ ਮਨਪ੍ਰੀਤ ਬਾਦਲ ਖੁਦ ਦੀ ਕਾਰ ’ਤੇ ਵਿੰਟੇਜ ਨੰਬਰ ਲਾ ਕੇ ਘੁੰਮ ਰਹੇ ਹਨ, ਜਦੋਂ ਕਿ ਅਜਿਹੇ ਵਾਹਨ ਚਲਾਉਣ ’ਤੇ ਪਾਬੰਦੀ ਹੈ। ਇਸ ਯੋਜਨਾ ਨੂੰ ਸ਼ੁਰੂ ਹੋਏ 9 ਸਾਲ ਦਾ ਸਮਾਂ ਬੀਤ ਚੁੱਕਿਆ ਹੈ ਪਰ ਹਾਲੇ ਤੱਕ ਇਸਨੂੰ ਪੂਰੀ ਤਰ੍ਹਾਂ ਵਾਹਨਾਂ ’ਤੇ ਲਾਗੂ ਨਹੀਂ ਕੀਤਾ ਜਾ ਸਕਿਆ। ਸੋਈ ਦੱਸਦੇ ਹਨ ਕਿ ਪੰਜਾਬ ਸਰਕਾਰ ਵੱਲੋਂ ਸਾਲ 2012 ’ਚ ਉੱਚ ਸੁਰੱਖਿਆ ਨੰਬਰ ਪਲੇਟਾਂ ਲਾਉਣ ਦਾ ਕੰਮ ਸ਼ੁਰੂ ਕੀਤਾ ਗਿਆ ਸੀ ਪਰ ਸਾਲਾਂ ਤੱਕ ਇਸ ਦਿਸ਼ਾ ’ਚ ਕੁਝ ਖਾਸ ਨਹੀਂ ਹੋਇਆ। ਕਰੋਨਾ ਮਹਾਮਾਰੀ ਦੌਰਾਨ ਲੌਕਡਾਊਨ ਤੋਂ ਬਾਅਦ ਇਹ ਮਿਸ਼ਨ ਰੁੱਕ ਹੀ ਗਿਆ ਸੀ। ਇਸ ਪ੍ਰਕਾਰ ਲਗਭਗ 20 ਲੱਖ ਵਾਹਨ ਹਾਲੇ ਵੀ ਪੰਜਾਬ ਦੀਆਂ ਸੜਕਾਂ ’ਤੇ ਬਿਨਾ ਹਾਈ ਸੁਰੱਖਿਆ ਨੰਬਰ ਪਲੇਟਾਂ ਤੋਂ ਘੁੰਮ ਰਹੇ ਹਨ। ਪੰਜਾਬ ਸਰਕਾਰ ਦੇ ਟਰਾਂਸਪੋਰਟ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਨੇ ਇੱਕ ਨੋਟਿਸ ਰਾਹੀਂ ਪਹਿਲੀ ਵਾਰ ਅਪਰਾਧ ’ਤੇ 2 ਹਜ਼ਾਰ ਜੁਰਮਾਨਾ ਤੇ ਉਸ ਤੋਂ ਬਾਅਦ ਫੜੇ ਜਾਣ ’ਤੇ 3 ਹਜ਼ਾਰ ਰੁਪਏ ਜੁਰਮਾਨਾ ਹੋਣ ਦੀ ਗੱਲ ਕਹੀ ਸੀ। ਇਹ ਨੋਟਿਸ 27 ਜੁਲਾਈ 2020 ਨੂੰ ਜਾਰੀ ਕੀਤਾ ਗਿਆ ਸੀ ਪਿਛਲੇ 15 ਮਹੀਨਿਆਂ ’ਚ ਟਰੈਫਿਕ ਪੁਲੀਸ ਨੇ ਇਸ ਲਈ ਕੋਈ ਮੁਹਿੰਮ ਨਹੀਂ ਚਲਾਈ। ਇਸ ਕਾਰਨ ਵਾਹਨ ਮਾਲਕਾਂ ਵੱਲੋਂ ਇਸਨੂੰ ਲੈ ਕੇ ਲਾਪ੍ਰਵਾਹੀ ਦਿਖਾਈ ਗਈ। ਇਸ ਸਮੱਸਿਆ ਦੇ ਹੋਰ ਵੱਧਣ ਕਾਰਨ ਕੁਝ ਸ਼ਰਾਰਤੀ ਅਨਸਰ ਫਰਜ਼ੀ ਤਰੀਕੇ ਨਾਲ ਵਾਹਨਾਂ ’ਤੇ ਨਕਲੀ ਹਾਈ ਸੁਰੱਖਿਆ ਨੰਬਰ ਪਲੇਟਾਂ ਵੀ ਲਾ ਰਹੇ ਹਨ। ਹਾਲਾਂਕਿ ਇਨ੍ਹਾਂ ’ਚੋਂ ਕੁਝ ਵਾਹਨਾਂ ਨੂੰ ਪੁਲੀਸ ਨੇ ਜ਼ਬਤ ਵੀ ਕੀਤਾ ਹੈ। ਫਿਰ ਵੀ ਵੱਡੀ ਗਿਣਤੀ ’ਚ ਵਾਹਨ ਬਿਨਾਂ ਉੱਚ ਸੁਰੱਖਿਆ ਨੰਬਰ ਪਲੇਟਾਂ ਦੇ ਘੁੰਮ ਰਹੇ ਹਨ। ਇਸ ਖਤਰੇ ਨੂੰ ਰੋਕਣ ਲਈ ਤੁਰੰਤ ਪ੍ਰਭਾਵ ’ਚ ਪੁਲੀਸ ਨੂੰ ਕਾਰਵਾਈ ਕਰਨੀ ਚਾਹੀਦੀ ਹੈ ਕਿਉਂਕਿ ਨਹੀਂ ਤਾਂ ਇਹ ਵਾਹਨ ਵਿਸ਼ੇਸ਼ ਰੂਪ ’ਚ ਸੂਬੇ ਤੇ ਦੇਸ਼ ਦੀ ਸੁਰੱਖਿਆ ਲਈ ਖਤਰਾ ਬਣੇ ਰਹਿਣਗੇ। ਇਹ ਯੋਜਨਾ ਸਫ਼ਲ ਤਾਂ ਹੀ ਹੋਵੇਗੀ, ਜੇਕਰ ਪੁਲੀਸ ਅਜਿਹੇ ਵਾਹਨਾਂ ’ਤੇ ਸ਼ਿਕੰਜਾ ਕੱਸੇਗੀ।