ਨਿੱਜੀ ਪੱਤਰ ਪ੍ਰੇਰਕ
ਜਗਰਾਉਂ, 20 ਮਈ
ਨੇੜਲੇ ਪਿੰਡ ਗਾਲਬਿ ਕਲਾਂ ’ਚ ਪਿਛਲੇ ਦਿਨੀਂ ਬਲਾਕ ਵਿਕਾਸ ਤੇ ਪੰਚਾਇਤ ਦਫ਼ਤਰ ਵੱਲੋਂ ਸਰਕਾਰੀ ਜ਼ਮੀਨ ’ਤੇ ਬਣੇ ਘਰਾਂ ਨੂੰ ਜਿੰਦਰੇ ਮਾਰਨ ਤੋਂ ਬਾਅਦ ‘ਬੇਘਰੇ’ ਹੋਏ ਲੋਕ ਅੱਜ ਇਥੇ ਹਲਕਾ ਵਿਧਾਇਕ ਸਰਵਜੀਤ ਕੌਰ ਮਾਣੂੰਕੇ ਦੇ ਦਫ਼ਤਰ ਮੂਹਰੇ ਆ ਕੇ ਬੈਠ ਗਏ। ਕੜਕਦੀ ਧੁੱਪ ’ਚ ਬੈਠੇ ਲੋਕਾਂ ਨੂੰ ਸਮਝਾ ਕੇ ਉਠਾਉਣ ਅਤੇ ਅੰਦਰ ਬਿਠਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਸਫ਼ਲਤਾ ਨਾ ਮਿਲਣ ’ਤੇ ਵਿਧਾਇਕ ਮਾਣੂੰਕੇ ਨੇ ਇਨ੍ਹਾਂ ਵਿਚਕਾਰ ਬੈਠ ਕੇ ਉਨ੍ਹਾਂ ਦੀ ਸਮੱਸਿਆ ਸੁਣੀ। ਮਸਲਾ ਸੁਲਝਾਉਣ ’ਚ ਸਮਾਂ ਦਾ ਭਾਵੇਂ ਕਾਫੀ ਲੱਗ ਗਿਆ ਪਰ ਅਖ਼ੀਰ ’ਚ ਇਹ ਸਾਰੇ ‘ਬੇਘਰੇ’ ਲੋਕ ਹੱਥਾਂ ’ਚ ਘਰਾਂ ਦੀਆਂ ਚਾਬੀਆਂ ਲੈ ਕੇ ਖੁਸ਼ੀ-ਖੁਸ਼ੀ ਪਰਤ ਗਏ। ਪੰਚਾਇਤ ਵਿਭਾਗ ਨੇ ‘ਨਜਾਇਜ਼ ਕਬਜ਼ੇ ਹਟਾਓ’ ਮੁਹਿੰਮ ਤਹਿਤ ਦਰਜਨ ਤੋਂ ਵਧੇਰੇ ਘਰ ਖਾਲੀ ਕਰਵਾ ਕੇ ਜਿੰਦੇ ਲਾ ਦਿੱਤੇ ਸਨ ਜਿਸ ਕਾਰਨ ਲੋਕ ਗਰਮੀ ’ਚ ਘਰੋਂ ਬੇਘਰ ਹੋ ਗਏ ਸਨ। ਆਪਣੇ ਦਫ਼ਤਰ ਮੂਹਰੇ ਆ ਬੈਠੇ ਇਨ੍ਹਾਂ ਲੋਕਾਂ ਤੇ ਹਮਾਇਤੀਆਂ ਨੂੰ ਬੀਬੀ ਮਾਣੂੰਕੇ ਨੇ ਮਸਲਾ ਹੱਲ ਕਰਨ ਦਾ ਭਰੋਸਾ ਦਿੱਤਾ ਪਰ ਉਹ ਹਿੱਲੇ ਨਹੀਂ। ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਵਿਧਾਇਕ ਮਾਣੂੰਕੇ ਨੇ ਗਾਲਬਿ ਕਲਾਂ ਵਾਸੀ ਬੀਬੀ ਸੁਖਵਿੰਦਰ ਕੌਰ ਨੂੰ ਉਸ ਦੀ ਜ਼ਮੀਨ ਵਿੱਚੋਂ ਲੋੜਵੰਦ ਪਰਿਵਾਰਾਂ ਨੂੰ ਪੰਜ-ਪੰਜ ਮਰਲੇ ਦੇ ਪਲਾਟ ਦੇਣ ਲਈ ਰਾਜ਼ੀ ਕੀਤਾ ਅਤੇ ਪੰਚਾਇਤ ਵਿਭਾਗ ਨਾਲ ਰਾਬਤਾ ਕਰਕੇ ਬੇਘਰੇ ਲੋਕਾਂ ਨੂੰ ਜਦੋਂ ਤੱਕ ਉਹ ਆਪਣੇ ਘਰ ਨਹੀਂ ਬਣਾ ਲੈਂਦੇ ਉਦੋਂ ਤੱਕ ਘਰਾਂ ਦੀਆਂ ਚਾਬੀਆਂ ਦੇਣ ਲਈ ਕਿਹਾ। ਬੀਡੀਪੀਓ ਸਤਵਿੰਦਰ ਸਿੰਘ ਕੰਗ ਤੇ ਸਰਪੰਚ ਸਿਕੰਦਰ ਸਿੰਘ ਗਾਲਬਿ ਕਲਾਂ ਵੱਲੋਂ ਲੋਕਾਂ ਨੂੰ ਛੇ ਮਹੀਨੇ ਲਈ ਘਰਾਂ ਦੀਆਂ ਚਾਬੀਆਂ ਸੌਂਪਣ ਦਾ ਐਲਾਨ ਹੁੰਦੇ ਹੀ ਲੋਕਾਂ ਨੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ। ਇਸ ਮੌਕੇ ਪ੍ਰੋ. ਸੁਖਵਿੰਦਰ ਸੁੱਖੀ, ਪ੍ਰੀਤਮ ਸਿੰਘ ਅਖਾੜਾ, ਐਡਵੋਕੇਟ ਕਰਮ ਸਿੰਘ ਸਿੱਧੂ, ਗੋਪੀ ਸ਼ਰਮਾ, ਸਾਬਕਾ ਸਰਪੰਚ ਸੇਵਾ ਸਿੰਘ, ਨੰਬਰਦਾਰ ਹਰਦੀਪ ਸਿੰਘ ਸਿੱਧੂ, ਗੁਰਚਰਨ ਸਿੰਘ ਗਿਆਨੀ, ਸਾਬਕਾ ਸਰਪੰਚ ਮੇਜਰ ਸਿੰਘ, ਸਵਰਨ ਸਿੰਘ ਮੌਜੂਦ ਸਨ।
ਜਗਰਾਉਂ ਵਾਸੀਆਂ ਨੂੰ ਮਿਲੇਗਾ‘ਆਧੁਨਿਕ ਪਾਰਕ’
ਵਿਧਾਇਕ ਸਰਵਜੀਤ ਕੌਰ ਮਾਣੂੰਕੇ ਨੇ ਜਗਰਾਉਂ ਵਾਸੀਆਂ ਲਈ ਅਤਿ ਆਧੁਨਿਕ ਪਾਰਕ ਬਨਾਉਣ ਦਾ ਬੀੜਾ ਚੁੱਕਿਆ ਹੈ। ਉਹ 22 ਮਈ ਨੂੰ ਸਵੇਰੇ 8 ਵਜੇ ਰਾਣੀ ਝਾਂਸੀ ਚੌਕ ਜਗਰਾਉਂ ਨਜ਼ਦੀਕ ‘ਰੈੱਡ ਕਰਾਸ ਭਵਨ’ ਵਿੱਚ ਆਪਣੀ ਟੀਮ, ਵਾਲੰਟੀਅਰਾਂ ਅਤੇ ਸ਼ਹਿਰ ਵਾਸੀਆਂ ਦੇ ਸਹਿਯੋਗ ਨਾਲ ਪਾਰਕ ਬਣਾਉਣ ਦਾ ਕੰਮ ਸ਼ੁਰੂ ਕਰਨਗੇ। ਉਨ੍ਹਾਂ ਕਿਹਾ ਕਿ ਸ਼ਹਿਰ ’ਚ ਜਿੱਥੇ ਵੀ ਯੋਗ ਥਾਂ ਮਿਲੇਗੀ, ਉਸ ਥਾਂ ਲੋਕਾਂ ਵਾਸਤੇ ਪਾਰਕ ਬਨਾਉਣ ਲਈ ਉਹ ਯਤਨ ਕਰਨਗੇ।