ਗਗਨਦੀਪ ਅਰੋੜਾ
ਲੁਧਿਆਣਾ, 25 ਜੂਨ
ਰੇਲਵੇ ਸਟੇਸ਼ਨ ਲੁਧਿਆਣਾ ’ਚ ਪਿਛਲੇ ਦਿਨੀਂ ਅਗਨੀਪਥ ਸਕੀਮ ਦੇ ਵਿਰੁੱਧ ਲੋਕਾਂ ਵੱਲੋਂ ਕੀਤੀ ਗਈ ਭੰਨਤੋੜ ਦੀ ਜਾਂਚ ਕਰਨ ਲਈ ਅੱਜ ਇਥੇ ਯਾਤਰੀ ਸੇਵਾ ਕਮੇਟੀ ਦੀ ਟੀਮ ਪੁੱਜੀ। ਕਮੇਟੀ ਦੇ ਚੇਅਰਮੈਨ ਪੀਕੇ ਕ੍ਰਿਸ਼ਨਾ ਦਾਸ ਨੇ ਸਟੇਸ਼ਨ ਦਾ ਦੌਰਾ ਕੀਤਾ ਤੇ ਸਟੇਸ਼ਨ ਡਾਇਰੈਕਟਰ ਅਭਿਨਵ ਸਿੰਗਲਾ ਤੋਂ ਭੰਨ੍ਹਤੋੜ ਸਬੰਧੀ ਜਾਣਕਾਰੀ ਲਈ ਤੇ ਅਧਿਕਾਰੀਆਂ ਨੂੰ ਇਸ ਮਾਮਲੇ ਦੀ ਰਿਪੋਰਟ ਬਣਾਉਣ ਲਈ ਦੇ ਨਿਰਦੇਸ਼ ਦਿੱਤੇ। ਚੇਅਰਮੈਨ ਨੇ ਕਈ ਯਾਤਰੀਆਂ ਨੂੰ ਸਟੇਸ਼ਨ ਤੋਂ ਮਿਲਣ ਵਾਲੀਆਂ ਸਹੂਲਤਾਂ ਬਾਰੇ ਪੁੱਛਿਆ। ਪਾਣੀ ਦੇ ਸੈਂਪਲ ਦੀ ਜਾਂਚ ਕਰਨ ਲਈ ਵੀ ਸਿਹਤ ਵਿਭਾਗ ਨੂੰ ਹੁਕਮ ਜਾਰੀ ਕੀਤੇ। ਚੇਅਰਮੈਨ ਕ੍ਰਿਸ਼ਨਾ ਦਾਸ ਨੇ ਕਿਹਾ ਕਿ ਸਟੇਸ਼ਨ ’ਤੇ ਕੁਝ ਖਾਮੀਆਂ ਮਿਲੀਆਂ ਹਨ, ਜਿਨ੍ਹਾਂ ਨੂੰ ਦੂਰ ਕਰਨ ਲਈ ਅਧਿਕਾਰੀਆਂ ਨੂੰ ਕਿਹਾ ਗਿਆ ਹੈ। ਰੇਲਵੇ ਸਟੇਸ਼ਨ ’ਤੇ ਬਾਥਰੂਮ ਦੇ ਫਲੱਸ਼ ਟੈਂਕ ਚੱਲ ਨਹੀਂ ਰਹੇ ਸਨ। ਠੇਕੇਦਾਰ ਦੇ ਕਰਿੰਦੇ ਨੂੰ ਬਾਥਰੂਮਾਂ ਦਾ ਪ੍ਰਬੰਧ ਸਹੀ ਰੱਖਣ ਦੇ ਹੁਕਮ ਦਿੱਤੇ। ਟੀਮ ਦੇ ਮੈਂਬਰਾਂ ਨੇ ਜੀਆਰਪੀ ਦੇ ਸੀਸੀਟੀਵੀ ਰੂਮ ਦੀ ਵੀ ਜਾਂਚ ਕੀਤੀ। ਸਟੇਸ਼ਨ ’ਤੇ ਪਾਣੀ ਦਾ ਪ੍ਰਬੰਧ ਨਾ ਹੋਣ ਕਾਰਨ ਟੀਮ ਦੇ ਮੈਂਬਰਾਂ ਨੇ ਰੇਲਵੇ ਸਟੇਸ਼ਨ ਦੇ ਅਫ਼ਸਰਾਂ ਦੀ ਝਾੜਝੰਬ ਵੀ ਕੀਤੀ। ਟੀਮ ਦੇ ਚੇਅਰਮੈਨ ਨੇ ਕਿਹਾ ਕਿ ਜਿਨ੍ਹਾਂ ਲੋਕਾਂ ਨੇ ਸਟੇਸ਼ਨ ’ਤੇ ਭੰਨਤੋੜ ਕੀਤੀ ਹੈ, ਰੇਲਵੇ ਉਨ੍ਹਾਂ ਖਿਲ਼ਾਫ਼ ਸਖ਼ਤ ਐਕਸ਼ਨ ਲਵੇਗਾ।