ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 6 ਜੂਨ
ਲੋਕ ਮੰਚ ਪੰਜਾਬ ਵੱਲੋਂ ਪੰਜਾਬੀ ਸਾਹਿਤ ਅਕਾਦਮੀ, ਲੁਧਿਆਣਾ ਦੇ ਸਹਿਯੋਗ ਨਾਲ ਹਰਮੀਤ ਵਿਦਿਆਰਥੀ ਦੇ ਨਵ-ਪ੍ਰਕਾਸ਼ਿਤ ਕਾਵਿ-ਸੰਗ੍ਰਹਿ ‘ਜ਼ਰਦ ਰੁੱਤ ਦਾ ਹਲਫ਼ੀਆ ਬਿਆਨ’ ਦਾ ਲੋਕ ਅਰਪਣ ਅਤੇ ਵਿਚਾਰ ਚਰਚਾ ਸਮਾਗਮ ਪੰਜਾਬੀ ਭਵਨ, ਲੁਧਿਆਣਾ ਵਿੱਚ ਕਰਵਾਇਆ ਗਿਆ। ਇਸ ਦੀ ਪ੍ਰਧਾਨਗੀ ਡਾ. ਸੁਰਜੀਤ ਸਿੰਘ ਪਾਤਰ ਨੇ ਕੀਤੀ ਜਦੋਂਕਿ ਪ੍ਰੋ. ਗੁਰਭਜਨ ਸਿੰਘ ਗਿੱਲ, ਸੁਰਿੰਦਰ ਸਿੰਘ ਸੁਨੱੜ ਅਤੇ ਜਸਪਾਲ ਘਈ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਲੋਕ ਮੰਚ ਪੰਜਾਬ ਦੇ ਸਰਪ੍ਰਸਤ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਮਹਿਮਾਨਾਂ ਨੂੰ ਜੀ ਆਇਆ ਆਖੀ। ਉਨਾਂ ਕਿਹਾ ਪੁਸਤਕ ਦਾ ਲੇਖਕ ਵਿਦਿਆਰਥੀ ਨਿਰੰਤਰ ਲਿਖਣ ਵਾਲਾ ਸ਼ਾਇਰ ਹੈ।
ਡਾ. ਗੁਰਇਕਬਾਲ ਸਿੰਘ ਨੇ ਪੁਸਤਕ ਬਾਰੇ ਪੇਪਰ ਪੜ੍ਹਦਿਆਂ ਕਿਹਾ ਕਿ ਹਰਮੀਤ ਵਿਦਿਆਰਥੀ ਦੀ ਕਵਿਤਾ ਸਥਾਪਤੀ ਅਤੇ ਵਿਸਥਾਪਤੀ ਦੇ ਵਿਰੋਧ ਦੀ ਕਵਿਤਾ ਹੈ। ਉਹ ਆਪਣੇ ਵਿਚਾਰਾਂ ਨੂੰ ਤਨਜ਼, ਬੇਲਿਹਾਜ਼ੀ ਤੇ ਬੇਬਾਕੀ ਨਾਲ ਪੇਸ਼ ਕਰਦਾ ਹੈ।
ਡਾ. ਉਮਿੰਦਰ ਸਿੰਘ ਜੌਹਲ ਨੇ ਦੱਸਿਆ ਕਿ ਸਮੁੱਚੀ ਪੰਜਾਬੀ ਕਵਿਤਾ ਵਿਚ ਹਰਮੀਤ ਵਿਦਿਆਰਥੀ ਦੀ ਸ਼ਾਇਰੀ ਸਾਡੇ ਸਮਾਜ ਵਿਚ ਦੰਭ, ਪਾਖੰਡ, ਸ਼ੋਸਣ ਆਦਿ ਨੂੰ ਕਟਹਿਰੇ ਵਿੱਚ ਖੜ੍ਹਾ ਕਰਦੀ ਪ੍ਰਵਚਨੀ ਸੰਘਰਸ਼ ਤੋਂ ਅੱਗੇ ਵੱਧ ਕੇ ਸਾਹਿਤ ਨੂੰ ਕਰਮ ਨਾਲ ਜੋੜਦੀ ਹੈ।
ਡਾ. ਪਾਤਰ ਨੇ ਕਿਹਾ ਕਿ ਹਰਮੀਤ ਦੀ ਸ਼ਾਇਰੀ ਸਮਾਜਕ ਸਰੋਕਾਰਾਂ ਨਾਲ ਵਾਬਸਤਾ ਹੈ। ਪ੍ਰੋ. ਗੁਰਭਜਨ ਸਿੰਘ ਗਿੱਲ ਹੋਰਾਂ ਨੇ ਹਰਮੀਤ ਵਿਦਿਆਰਥੀ ਨੂੰ ਉਸ ਦੀ ਸਾਰਥਿਕ ਤੇ ਮੁੱਲਵਾਨ ਸ਼ਾਇਰੀ ਲਈ ਮੁਬਾਰਕਬਾਦ ਦਿੱਤੀ।
ਇਸ ਮੌਕੇ ਹੋਰਾਂ ਤੋਂ ਇਲਾਵਾ ਸਮਾਗਮ ਵਿਚ ਗੁਰਤੇਜ ਕੁਹਾਰਵਾਲਾ, ਸਵਰਨਜੀਤ ਸਵੀ, ਸੁਰਿੰਦਰ ਖੰਨਾ, ਜਸਵੰਤ ਜ਼ਫ਼ਰ, ਗੁਰਮੀਤ ਕੜਿਆਲਵੀ, ਸ਼ਬਦੀਸ਼, ਪ੍ਰੋ. ਕੁਲਦੀਪ, ਰਾਜੀਵ ਖ਼ਿਆਲ, ਮੁਕੇਸ਼ ਆਲਮ, ਪ੍ਰੋ. ਰਵਿੰਦਰ ਭੱਲਠ, ਸੁਖਜਿੰਦਰ, ਸੁਰਿੰਦਰ ਕੰਬੋਜ, ਡਾ. ਚਰਨਦੀਪ ਸਿੰਘ, ਨਿਰਮਲ ਜੌੜਾ, ਤਰਸੇਮ ਨੂਰ, ਰਾਮ ਸਿੰਘ, ਦੀਪ ਜਗਦੀਪ, ਸੁਮਿਤ ਗੁਲਾਟੀ, ਰਵੀ ਰਵਿੰਦਰ, ਸਹਿਜਪ੍ਰੀਤ ਮਾਂਗਟ, ਪ੍ਰਭਜੋਤ ਸੋਹੀ, ਪਾਲੀ ਖਾਦਿਮ, ਡਾ. ਗੁਰਚਰਨ ਕੌਰ ਕੋਚਰ ਆਦਿ ਆਦਿ ਹਾਜ਼ਰ ਸਨ। ਸਮਾਗਮ ਦੀ ਕਾਰਵਾਈ ਨੂੰ ਡਾ. ਹਰਜਿੰਦਰ ਸਿੰਘ ਅਟਵਾਲ ਨੇ ਬਾਖ਼ੂਬੀ ਨਿਭਾਇਆ। ਲੋਕ ਮੰਚ ਪੰਜਾਬ ਦੇ ਪ੍ਰਧਾਨ ਸੁਰਿੰਦਰ ਸਿੰਘ ਸੁੱਨੜ ਨੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ।
