ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 8 ਦਸੰਬਰ
ਕਾਲਜ ਵਿੱਚ ਆਪਣਾ ਦਬਦਬਾ ਕਾਇਮ ਰੱਖਣ ਲਈ ਕੁੱਝ ਨੌਜਵਾਨਾਂ ਨੇ ਅੱਜ ਖ਼ੁਦ ਹੀ ਸਰਕਾਰੀ ਕਾਲਜ ਫਾਰ (ਬੁਆਇਜ਼) ਵਿੱਚ ਇੱਕ ਵਿਦਿਆਰਥੀ ਨੂੰ ਆਪਣਾ ਪ੍ਰਧਾਨ ਚੁਣ ਲਿਆ। ਇੰਨਾ ਹੀ ਨਹੀਂ ਇਸ ਤੋਂ ਬਾਅਦ ਨੌਜਵਾਨਾਂ ਨੇ ਇਸ ਖ਼ੁਸ਼ੀ ਦੇ ਵਿੱਚ ਇੱਕ ਕਾਰ ਰੈਲੀ ਵੀ ਕੱਢੀ। ਇਸ ਵਿੱਚ ਵਿਦਿਆਰਥੀ ਕਾਰਾਂ ਦੀ ਛੱਤ ‘ਤੇ ਚੜ੍ਹ ਗਏ ਤੇ ਆਵਾਜਾਈ ਨਿਯਮਾਂ ਦੀ ਉਲੰਘਣਾ ਕਰਦਿਆਂ ਪੂਰੇ ਇਲਾਕੇ ਵਿੱਚ ਕਾਰ ਰੈਲੀ ਕੱਢੀ। ਇਸ ਦੌਰਾਨ ਕਈ ਜਣੇ ਕਾਰਾਂ ਵਿੱਚ ਹੂਟਰ ਵੀ ਮਾਰਦੇ ਰਹੇ। ਕਈ ਵਿਦਿਆਰਥੀ ਕਾਰ ਦੀ ਬਾਰੀ ਵਿੱਚੋਂ ਬਾਹਰ ਨਿਕਲੇ ਹੋਏ ਸਨ। ਕਾਲਜ ਦੇ ਗੇਟ ਦੇ ਬਾਹਰ ਵੀ ਵੱਡੀ ਗਿਣਤੀ ਵਿੱਚ ਨੌਜਵਾਨਾਂ ਨੇ ਨਾਅਰੇਬਾਜ਼ੀ ਕੀਤੀ। ਕਾਲਜ ਦੇ ਵਿਦਿਆਰਥੀ ਪੂਰੇ ਇਲਾਕੇ ਵਿੱਚ ਸ਼ਰ੍ਹੇਆਮ ਆਵਾਜਾਈ ਨਿਯਮਾਂ ਦੀ ਉਲੰਘਣਾ ਕਰ ਕੇ ਹੁਲੜਬਾਜ਼ੀ ਕਰਦੇ ਰਹੇ, ਉਨ੍ਹਾਂ ਨੇ ਆਪਣਾ ਕਾਲਜ ਪ੍ਰਧਾਨ ਚੁਣ ਲਿਆ ਪਰ ਕਾਲਜ ਪ੍ਰਿੰਸੀਪਲ ਨੂੰ ਇਸ ਬਾਰੇ ਕੁੱਝ ਪਤਾ ਤਕ ਨਹੀਂ ਲੱਗਿਆ ਨਹੀਂ। ਉਧਰ, ਟਰੈਫਿਕ ਪੁਲੀਸ ਦੇ ਅਧਿਕਾਰੀਆਂ ਨੇ ਕਿਹਾ ਕਿ ਉਹ ਕਾਰਾਂ ਦੇ ਨੰਬਰ ਟਰੇਸ ਕਰ ਕੇ ਉਲੰਘਣਾ ਕਰਨ ਵਾਲਿਆਂ ਦੇ ਘਰ ਚਲਾਨ ਭੇਜਣਗੇ।
ਵਿਦਿਆਰਥੀਆਂ ਤੇ ਨੌਜਵਾਨਾਂ ਦੀ ਇਹ ਕਾਰ ਰੈਲੀ ਪੁਰਾਣੀ ਕਚਹਿਰੀ ਚੌਕ ਤੋਂ ਸ਼ੁਰੂ ਹੋ ਕੇ ਕਾਲਜ ਵੱਲ ਗਈ। ਰਸਤੇ ਵਿੱਚ ਫੁਹਾਰਾ ਚੌਕ ਵਿੱਚ ਟਰੈਫਿਕ ਪੁਲੀਸ ਦੇ ਕਈ ਮੁਲਾਜ਼ਮਾਂ ਦੀ ਡਿਊਟੀ ਹੁੰਦੀ ਹੈ, ਇਸ ਦੇ ਬਾਵਜੂਦ ਵਿਦਿਆਰਥੀ ਸ਼ਰ੍ਹੇਆਮ ਹੂਟਰ ਮਾਰਦੇ ਹੋਏ ਉਥੋਂ ਲੰਘੇ। ਪੁਲੀਸ ਦੇ ਸਾਹਮਣੇ ਹੀ ਨੌਜਵਾਨ ਆਵਾਜਾਈ ਨਿਯਮਾਂ ਦੀ ਉਲੰਘਣਾ ਕਰਦੇ ਰਹੇ ਪਰ ਪੁਲੀਸ ਮੁਲਾਜ਼ਮ ਕੁੱਝ ਨਹੀਂ ਕਰ ਸਕੇ। ਵਿਦਿਆਰਥੀਆਂ ਦੀਆਂ ਕਾਰਾਂ ਕਾਰਨ ਉੱਥੇ ਜਾਮ ਵਰਗਾ ਮਾਹੌਲ ਬਣ ਗਿਆ ਸੀ।
ਕਾਲਜ ਅੰਦਰ ਕੁਝ ਨਹੀਂ ਹੋਇਆ: ਪ੍ਰਿੰਸੀਪਲ
ਕਾਲਜ ਦੀ ਪ੍ਰਿੰਸੀਪਲ ਡਾ. ਤਨਵੀਰ ਨੇ ਕਿਹਾ ਕਿ ਰੌਲਾ ਪਾਉਣ ਵਾਲੇ ਕਾਲਜ ਦੇ ਵਿਦਿਆਰਥੀ ਨਹੀਂ ਸਨ। ਉਨ੍ਹਾਂ ਕਿਹਾ ਕਿ ਅਜਿਹਾ ਕੋਈ ਮਾਮਲਾ ਕਾਲਜ ਵਿੱਚੋਂ ਨਹੀਂ ਹੈ। ਕਾਲਜ ਵਿੱਚ ਤਾਂ ਪੇਪਰ ਚੱਲ ਰਹੇ ਹਨ, ਬਾਹਰ ਕੀ ਹੋ ਰਿਹਾ ਹੈ, ਉਸ ਬਾਰੇ ਉਨ੍ਹਾਂ ਨੂੰ ਕੁੱਝ ਨਹੀਂ ਪਤਾ।
ਨੰਬਰ ਟਰੇਸ ਕਰ ਕੇ ਘਰ ਭੇਜੇ ਜਾਣਗੇ ਚਲਾਨ: ਲਾਂਬਾ
ਟਰੈਫਿਕ ਪੁਲੀਸ ਦੇ ਏਸੀਪੀ ਚਰਨਜੀਵ ਲਾਂਬਾ ਨੇ ਕਿਹਾ ਕਿ ਉਨ੍ਹਾਂ ਦੇ ਧਿਆਨ ਵਿੱਚ ਇਹ ਮਾਮਲਾ ਆਇਆ ਹੈ। ਇਸ ਲਈ ਹੁਕਮ ਜਾਰੀ ਕੀਤੇ ਗਏ ਹਨ ਕਿ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ ਵਿਦਿਆਰਥੀਆਂ ਦੇ ਕਾਰ ਨੰਬਰ ਕੱਢ ਕੇ ਘਰਾਂ ’ਚ ਚਲਾਨ ਭੇਜੇ ਜਾਣ।