ਨਸ਼ੀਲੇ ਪਦਾਰਥਾਂ ਸਣੇ ਪੰਜ ਮੁਲਜ਼ਮ ਕਾਬੂ

ਪੱਤਰ ਪ੍ਰੇਰਕ

ਜਗਰਾਉਂ, 8 ਅਪਰੈਲ

ਲੋਕ ਸਭਾ ਚੋਣਾਂ ਨੂੰ ਲੈ ਕੇ ਪੁਲੀਸ ਨੇ ਨਸ਼ਾ ਤਸਕਰਾਂ ਅਤੇ ਸਮਾਜ ਵਿਰੋਧੀ ਗਤੀਵਿਧੀਆਂ ’ਚ ਸ਼ਾਮਲ ਲੋਕਾਂ ਖਿਲਾਫ ਆਰੰਭੀ ਕਾਰਵਾਈ ਤੇਜ਼ ਕਰਦਿਆਂ ਦੋ ਔਰਤਾਂ ਸਮੇਤ 5 ਤਸਕਰਾਂ ਨੂੰ ਹਿਰਾਸਤ ’ਚ ਲੈ ਕੇ ਸ਼ਰਾਬ, ਹੈਰੋਇਨ, ਕੈਪਸੂਲ ਆਦਿ ਬਰਾਮਦ ਕੀਤੇ ਹਨ। ਇਸ ਸਬੰਧੀ ਪੁਲੀਸ ਕਪਤਾਨ ਨਵਨੀਤ ਸਿੰਘ ਦੇ ਦਫਤਰ ਤੋਂ ਜਾਰੀ ਰਿਪੋਰਟ ਅਨੁਸਾਰ ਸਿੱਧਵਾਂ ਬੇਟ ਥਾਣਾ ਪੁਲੀਸ ਨੇ ਪਿੰਡ ਮਲਸੀਹਾਂ ਬਾਜਣ ਖੌਲਿਆ ਵਾਲਾ ਪੁਲ ਨੇੜੇ ਔਰਤ ਤਸਕਰ ਸਬਰਾ ਬਾਈ ਦੇ ਘਰ ਛਾਪਾ ਮਾਰ ਕੇ 50 ਬੋਤਲਾਂ ਨਾਜਾਇਜ਼ ਸ਼ਰਾਬ ਦੀਆਂ ਬਰਾਮਦ ਕੀਤੀਆਂ ਹਨ। ਥਾਣਾ ਸ਼ਹਿਰੀ ਦੀ ਪੁਲੀਸ ਨੇ ਜਗਰੂਪ ਸਿੰਘ ਵਾਸੀ ਇੰਦਰਾ ਕਲੋਨੀ ਨੂੰ ਕੋਠੇ ਪੋਨਾ ਰੋਡ ਸ਼ਮਸ਼ਾਨ ਘਾਟ ਕੋਲੋਂ ਹਿਰਾਸਤ ’ਚ ਲੈ ਕੇ ਉਸ ਕੋਲੋਂ 20 ਬੋਤਲਾਂ ਸ਼ਰਾਬ ਦੀਆਂ ਬਰਾਮਦ ਕੀਤੀਆਂ। ਹਠੂਰ ਪੁਲੀਸ ਨੇ ਰਾਮ ਸਿੰਘ ਵਾਸੀ ਦੇਹੜਕਾ ਦੇ ਘਰ ਛਾਪਾ ਮਾਰ ਕੇ 12 ਬੋਤਲਾਂ ਸ਼ਰਾਬ ਬਰਾਮਦ ਕੀਤੀਆਂ। ਸਿੱਧਵਾਂ ਬੇਟ ਥਾਣਾ ਪੁਲੀਸ ਨੇ ਪਿੰਡ ਕੁੱਲ ਗਹਿਣਾ ਤੋਂ ਗੁਪਤ ਸੂਚਨਾਂ ਤੇ ਛਾਪਾ ਮਾਰ ਕੇ ਔਰਤ ਤਸਕਰ ਸ਼ੀਲੋ ਬਾਈ ਵਾਸੀ ਪਿੰਡ ਕੁੱਲ ਗਹਿਣਾ ਨੂੰ ਹਿਰਾਸਤ’ਚ ਲੈ ਕੇ ਉਸ ਕੋਲੋਂ 15 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ ਹੈ।ਥਾਣਾ ਸ਼ਹਿਰੀ ਦੀ ਪੁਲੀਸ ਦੇ ਏਐੱਸਆਈ ਬਲਰਾਜ ਸਿੰਘ ਨੇ ਦੀਪਕ ਵਰਮਾ ਵਾਸੀ ਗਲੀ ਨੰਬਰ 4 ਸ਼ਾਸਤਰੀ ਨਗਰ ਕੋਠੇ ਖੰਜੂਰਾਂ-ਅਲੀਗੜ੍ਹ ਬਾਈਪਾਸ ਤੋਂ ਹਿਰਾਸਤ ’ਚ ਲੈ ਕੇ 200 ਨਸ਼ੀਲੇ ਕੈਪਸੂਲ ਬਰਾਮਦ ਕੀਤੇ। ਤਸਕਰਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।