ਮਿਲਰਗੰਜ ਇਲਾਕੇ ਵਿੱਚ ਪਿਉ-ਪੁੱਤ ’ਤੇ ਹਮਲਾ

ਘਟਨਾ ਦੀ ਇੱਕ ਸੀ ਸੀ ਟੀ ਵੀ ਫੁਟੇਜ ਵੀ ਸਾਹਮਣੇ ਆਈ ਹੈ। ਵੀਡੀਓ ਮੁਤਾਬਕ ਹਮਲਾਵਰ ਪੀੜਤ ਦੇ ਘਰ ਦੇ ਬਾਹਰ ਸ਼ਰੇਆਮ ਗਾਲੀ-ਗਲੋਚ ਕਰ ਰਹੇ ਹਨ। ਇਨ੍ਹਾਂ ਵਿੱਚੋਂ ਇੱਕ ਨੌਜਵਾਨ ਦੇ ਹੱਥ ਵਿੱਚ ਪਿਸਤੌਲ ਵੀ ਹੈ। ਗਾਲੀ-ਗਲੋਚ ਤੋਂ ਬਾਅਦ ਮੁਲਜ਼ਮ ਜ਼ਬਰਦਸਤੀ ਘਰ ਦੇ ਅੰਦਰ ਦਾਖਲ ਹੋਏ ਅਤੇ ਭੰਨਤੋੜ ਤੇ ਕੁੱਟਮਾਰ ਸ਼ੁਰੂ ਕਰ ਦਿੱਤੀ। ਪੁਲੀਸ ਹੁਣ ਇਸੇ ਫੁਟੇਜ ਦੇ ਆਧਾਰ ’ਤੇ ਫ਼ਰਾਰ ਮੁਲਜ਼ਮਾਂ ਦੀ ਸ਼ਨਾਖਤ ਕਰਨ ਵਿੱਚ ਜੁੱਟੀ ਹੋਈ ਹੈ।

ਪੀੜਤ ਸਿਮਰਨਜੋਤ ਸਿੰਘ ਨੇ ਪੁਲੀਸ ਨੂੰ ਦਿੱਤੇ ਬਿਆਨਾਂ ਵਿੱਚ ਦੱਸਿਆ ਕਿ 26 ਫਰਵਰੀ ਦੀ ਸਵੇਰ ਕਰੀਬ 11 ਵਜੇ ਉਹ ਆਪਣੀ ਆਈ-20 ਕਾਰ ਘਰੋਂ ਬਾਹਰ ਕੱਢ ਰਿਹਾ ਸੀ। ਇਸ ਦੌਰਾਨ ਸਾਹਿਲ ਅਤੇ ਉਦਿਤ ਕਪੂਰ ਨੇ ਆਪਣੀ ਸਕੂਟੀ ਉਸ ਦੀ ਕਾਰ ਵਿੱਚ ਮਾਰ ਦਿੱਤੀ। ਜਦੋਂ ਸਿਮਰਨਜੋਤ ਨੇ ਇਸ ਦਾ ਵਿਰੋਧ ਕੀਤਾ ਤਾਂ ਮੁਲਜ਼ਮ ਬਹਿਸ ਕਰਨ ਲੱਗੇ। ਵਿਵਾਦ ਦੇ 15-20 ਮਿੰਟ ਬਾਅਦ ਹੀ ਮੁਲਜ਼ਮ ਇੱਕ ਗੱਡੀ ਵਿੱਚ ਆਪਣੇ 5-6 ਹੋਰ ਸਾਥੀਆਂ ਸਣੇ ਹਥਿਆਰਾਂ ਨਾਲ ਲੈਸ ਹੋ ਕੇ ਪਰਤੇ ਅਤੇ ਹਮਲਾ ਕਰ ਦਿੱਤਾ। ਹਮਲਾਵਰਾਂ ਨੇ ਸਿਮਰਨਜੋਤ ਦੇ ਨੱਕ ’ਤੇ ਪਿਸਤੌਲ ਦੇ ਬੱਟ ਨਾਲ ਜ਼ੋਰਦਾਰ ਵਾਰ ਕੀਤਾ, ਜਿਸ ਨਾਲ ਉਹ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਗਿਆ। ਬਚਾਅ ਕਰਨ ਆਏ ਉਸ ਦੇ ਪਿਤਾ ਨੂੰ ਵੀ ਨਹੀਂ ਬਖ਼ਸ਼ਿਆ ਗਿਆ। ਰੌਲਾ ਸੁਣ ਕੇ ਜਦੋਂ ਆਸ-ਪਾਸ ਦੇ ਲੋਕ ਇਕੱਠੇ ਹੋਣ ਲੱਗੇ, ਤਾਂ ਮੁਲਜ਼ਮ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੰਦੇ ਹੋਏ ਫ਼ਰਾਰ ਹੋ ਗਏ। ਇਸ ਖਿੱਚ-ਧੂਹ ਦੌਰਾਨ ਪੀੜਤ ਦੀ ਦੋ ਤੋਲੇ ਦੀ ਸੋਨੇ ਦੀ ਚੇਨ ਵੀ ਗਾਇਬ ਹੋ ਗਈ ਹੈ। ਪੁਲੀਸ ਮੁਤਾਬਕ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇ ਮਾਰੇ ਜਾ ਰਹੇ ਹਨ।