ਖੰਨਾ: ਇੱਥੋਂ ਵਿਧਾਨ ਸਭਾ ਚੋਣ ਲੜ ਰਹੇ ‘ਆਪ’ ਦੇ ਉਮੀਦਵਾਰ ਤਰਨਪ੍ਰੀਤ ਸਿੰਘ ਸੌਂਦ ਨੇ ਸ਼ਹਿਰ ਤੇ ਪੇਂਡੂ ਖੇਤਰ ਦੇ ਵੋਟਰਾਂ ਨੂੰ ਆਪਣਾ ਹਲਫ਼ੀਆ ਬਿਆਨ ਵੰਡਦਿਆਂ ਅਨੇਕਾਂ ਵਾਅਦੇ ਕੀਤੇ ਹਨ। ਸੌਂਦ ਨੇ ਘਰ ਘਰ ਅਤੇ ਦੁਕਾਨਾਂ ਵਿਚ ਵੰਡੇ ਇਸ ਹਲਫ਼ੀਆ ਬਿਆਨ ਵਿਚ ਦੱਸਿਆ ਕਿ ਉਨ੍ਹਾਂ ਦਾ ਪਰਿਵਾਰ ਪਿਛਲੀਆਂ ਚਾਰ ਪੁਸ਼ਤਾਂ ਤੋਂ ਖੰਨਾ ਵਿਚ ਪੱਕਾ ਵਸਨੀਕ ਹੈ। ਜੇ ਜਿੱਤ ਗਏ ਤਾਂ ਉਹ ਰਿਸ਼ਵਤ ਬੰਦ ਕਰਵਾ ਦੇਣਗੇ। ਖੰਨਾ ਸ਼ਹਿਰ ਦੀਆਂ ਮੁੱਢਲੀਆਂ ਸਹੂਲਤਾਂ ਸੀਵਰੇਜ, ਪਾਣੀ, ਵਿਕਾਸ ਕਾਰਜ ਪਹਿਲ ਦੇ ਆਧਾਰ ’ਤੇ ਹੱਲ ਕਰਵਾ ਕੇ ਸ਼ਹਿਰ ਨੂੰ ਸਾਫ਼ ਸੁਥਰਾ ਬਣਾਉਣਗੇ। ਸ਼ਹਿਰ ਵਿਚ ਮਲਟੀ ਸਪੈਸ਼ਲਿਟੀ ਹਸਪਤਾਲ ਦਾ ਨਿਰਮਾਣ, ਨਵੀਆਂ ਸੜਕਾਂ, ਗਲੀਆਂ, ਨਾਲੀਆਂ ਬਣਵਾਉਣਗੇ, ਸਾਰੇ ਵਾਰਡਾਂ ’ਚ ਮਾਡਰਨ ਸਕੂਲ ਤੇ ਸਿਹਤ ਕੇਂਦਰ, ਚੰਗੇ ਪਾਰਕ ਤੇ ਗਰੀਬਾਂ ਦੇ ਕੱਚੇ ਮਕਾਨਾਂ ਨੂੰ ਪੱਕੇ ਬਣਾਉਣਾ ਉਨ੍ਹਾਂ ਦਾ ਮੁੱਖ ਨਿਸ਼ਾਨਾ ਹੋਵੇਗਾ। ਪੇਂਡੂ ਖੇਤਰ ਵਿਚ ਸਾਰੇ 67 ਪਿੰਡਾਂ ਦੇ ਟੋਭੇ ਪੱਕੇ ਕਰਨਾ, ਸਿਹਤ ਸਹੂਲਤਾਂ ਦੇਣਾ, ਬੱਸ ਸਰਵਿਸ ਮੁਹੱਈਆ ਕਰਵਾਉਣਾ ਅਤੇ ਸ਼ਹਿਰ ਨੂੰ ਦੋ ਹਿੱਸਿਆਂ ਵਿਚ ਵੰਡਣ ਵਾਲੇ ਪੁੱਲ ਦੀ ਥਾਂ ਐਲੀਵੇਟਡ ਪੁੱਲ ਦਾ ਨਿਰਮਾਣ ਕਰਵਾਉਣਾ ਉਨ੍ਹਾਂ ਦਾ ਮੁੱਖ ਮਕਸਦ ਹੋਵੇਗਾ। -ਨਿੱਜੀ ਪੱਤਰ ਪ੍ਰੇਰਕ
