ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 4 ਅਕਤੂਬਰ
ਬੁਰਾਈ ਤੇ ਇਛਾਈ ਦੀ ਜਿੱਤ ਦਾ ਪ੍ਰਤੀਕ ਤਿਓਹਾਰ ਦਸਹਿਰਾ 5 ਅਕਤੂਬਰ ਨੂੰ ਦੇਸ਼ ਭਰ ਵਿੱਚ ਮਨਾਇਆ ਜਾ ਰਿਹਾ ਹੈ। ਲੁਧਿਆਣਾ ਸ਼ਹਿਰ ਅਤੇ ਆਸ-ਪਾਸ ਦੇ ਇਲਾਕਿਆਂ ’ਚ ਕਰੀਬ ਡੇਢ ਦਰਜਨ ਥਾਵਾਂ ’ਤੇ ਰਾਵਣ ਦੇ ਪੁਤਲੇ ਸਾੜੇ ਜਾਣਗੇ। ਇਨ੍ਹਾਂ ਵਿੱਚੋਂ ਸਭ ਤੋਂ ਉੱਚਾ 100 ਫੁੱਟ ਰਾਵਣ ਦਾ ਪੁਤਲਾ ਸਥਾਨਕ ਦੇਰਸੀ ਮੈਦਾਨ ਵਿੱਚ ਵਿੱਚ ਸਾੜਿਆ ਜਾਵੇਗਾ। ਕੋਵਿਡ ਕਰਕੇ ਪਿਛਲੇ ਸਾਲਾਂ ਦੌਰਾਨ ਭਾਵੇਂ ਦਸਹਿਰੇ ਪ੍ਰਤੀ ਲੋਕਾਂ ਦਾ ਉਤਸ਼ਾਹ ਮੱਠਾ ਰਿਹਾ ਸੀ ਪਰ ਇਸ ਵਾਰ ਮੈਦਾਨਾਂ ਵਿੱਚ ਲੋਕਾਂ ਦੀ ਸ਼ਾਮ ਵੇਲੇ ਭੀੜ ਦਾ ਨਜ਼ਾਰਾ ਦੇਖਣ ਵਾਲਾ ਹੁੰਦਾ ਹੈ।
ਬੁੱਧਵਾਰ ਨੂੰ ਦਸਹਿਰਾ ਮਨਾਉਣ ਲਈ ਲਗਪਗ ਸਾਰੇ ਹੀ ਦਸਹਿਰਾ ਮੈਦਾਨਾਂ ਵਿੱਚ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ। ਲੁਧਿਆਣਾ ਵਿੱਚ ਜਿਨ੍ਹਾਂ ਡੇਢ ਦਰਜਨ ਦੇ ਕਰੀਬ ਥਾਵਾਂ ’ਤੇ ਰਾਵਣ ਦੇ ਪੁਤਲੇ ਜਲਾਏ ਜਾ ਰਹੇ ਹਨ ਉਨ੍ਹਾਂ ਵਿੱਚੋਂ ਮੁੱਖ ਥਾਵਾਂ ਦਰੇਸੀ ਮੈਦਾਨ ’ਤੇ ਸ਼ਹਿਰ ਦਾ ਸਭ ਤੋਂ ਉੱਚਾ 100 ਫੁੱਟ ਦਾ ਰਾਵਣ ਦਾ ਪੁਤਲਾ ਬਣਾਇਆ ਗਿਆ ਹੈ। ਇਸ ਨੂੰ ਅੱਗ ਲਗਾਉਣ ਦੀ ਰਸਮ ਰਿਮੋਟ ਕੰਟਰੋਲ ਨਾਲ ਨਿਭਾਈ ਜਾਵੇਗੀ। ਪੁਤਲੇ ਦੇ ਉਪਰ ਲੱਗੀ 12 ਫੁੱਟ ਦੀ ਛੱਤਰੀ ਘੁੰਮਦੀ ਹੋਈ ਦਿਖਾਈ ਦੇਵੇਗੀ। ਇਸ ਪੁਤਲੇ ’ਤੇ ਵਿਸ਼ੇਸ਼ ਕਿਸਮ ਦਾ ਚਮਕੀਲਾ ਕਾਗਜ਼ ਲਾਇਆ ਗਿਆ ਹੈ।
ਪੁਤਲੇ ਨੂੰ ਯੂਪੀ ਤੋਂ ਆਏ ਵਿਸ਼ੇਸ਼ ਕਾਰੀਗਰਾਂ ਵੱਲੋਂ ਤਿਆਰ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਅਗਰ ਨਗਰ ਵਿੱਚ 55 ਫੁੱਟ, ਉਪਕਾਰ ਨਗਰ ਵਿੱਚ 70 ਫੁੱਟ, ਪੱਖੋਵਾਲ ਰੋਡ 65 ਫੁੱਟ, ਮੁੱਲਾਂਪੁਰ ਵਿੱਚ 50 ਫੁੱਟ, ਧਾਂਦਰਾ ’ਚ 40 ਫੁੱਟ, ਗਲਾਡਾ ਮੈਦਾਨ 60 ਫੁੱਟ, ਵਰਧਮਾਨ ਰੋਡ 40 ਫੁੱਟ ਉੱਚੇ ਰਾਵਣ ਦੇ ਪੁਤਲੇ ਜਲਾਏ ਜਾ ਰਹੇ ਹਨ।