ਜੋਗਿੰਦਰ ਸਿੰਘ ਓਬਰਾਏ
ਖੰਨਾ, 8 ਮਈ
ਸ਼ਹਿਰ ’ਚ ਬਣ ਰਹੀਆਂ ਗ਼ੈਰ ਕਾਨੂੰਨੀ ਕਲੋਨੀਆਂ ਸਬੰਧੀ ਪਿਛਲੇ ਦਿਨੀਂ ‘ਪੰਜਾਬੀ ਟ੍ਰਿਬਿਊਨ’ ਵਿੱਚ ਛਪੀ ਖ਼ਬਰ ਤੋਂ ਬਾਅਦ ਹੁਣ ਕੌਂਸਲ ਪੂਰੀ ਤਰ੍ਹਾਂ ਹਰਕਤ ’ਚ ਆ ਗਈ। ਜਿਸ ਦੀ ਸ਼ੁਰੂਆਤ ਕਰਦਿਆਂ ਅੱਜ ਲਲਹੇੜੀ ਰੋਡ ’ਤੇ ਪ੍ਰੋਫੈ਼ਸਰ ਕਲੋਨੀ ਦੇ ਪਿੱਛੇ ਬਣ ਰਹੀਆਂ ਦੋ ਗ਼਼ੇਰਕਾਨੂੰਨੀ ਕਲੋਨੀਆਂ ਵਾਲੀ ਜ਼ਮੀਨ ਦੇ ਮਾਲਕ ਨੂੰ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ 4 ਤੇ 3 ਏਕੜ ਦੀਆਂ ਦੋਵੇਂ ਕਲੋਨੀਆਂ ਦੀ ਜ਼ਮੀਨ ਦੀ ਮਲਕੀਅਤ ਇਕ ਹੀ ਵਿਅਕਤੀ ਦੇ ਨਾਂ ’ਤੇ ਹੈ।ਕੌਂਸਲ ਵੱਲੋਂ ਇਹ ਨੋਟਿਸ ਪਵਿੱਤਰ ਸਿੰਘ ਵਾਸੀ ਲਲਹੇੜੀ ਰੋਡ ਦੇ ਨਾਂ ਭੇਜਿਆ ਗਿਆ। ਇਸ ਨੋਟਿਸ ਮਗਰੋਂ ਕੌਂਸਲ ਦੀ ਕਾਰਵਾਈ ਅਧਿਕਾਰਿਕ ਰੂਪ ਨਾਲ ਸ਼ੁਰੂ ਹੋਈ ਹੈ। ਇਸੇ ਤਰ੍ਹਾਂ ਕੌਂਸਲ ਵੱਲੋਂ ਸਮਰਾਲਾ ਰੋਡ ਸਥਿਤ ਮਾਡਲ ਟਾਊਨ ’ਚ ਸਾਢੇ ਛੇ ਏਕੜ ’ਚ ਕੱਟੀ ਜਾ ਰਹੀ ਕਲੋਨੀ ਦੇ ਮਾਲਕ ਦਾ ਪਤਾ ਲਾਉਣ ਲਈ ਰੈਵੀਨਿਊ ਵਿਭਾਗ ਨਾਲ ਸੰਪਰਕ ਕੀਤਾ ਗਿਆ ਤੇ ਸ਼ਹਿਰ ਦੀ ਨਵੀਂ ਅਬਾਦੀ ’ਚ ਬਣਾਈ ਕਲੋਨੀ ਦੀ ਜਾਂਚ ਵੀ ਅਰੰਭ ਕੀਤੀ ਗਈ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਕੁਝ ਸਮਾਂ ਪਹਿਲਾ ਲਲਹੇੜੀ ਰੋਡ ਤੇ ਪ੍ਰੋਫੈ਼ਸਰ ਕਲੋਨੀ ਪਿੱਛੇ ਕੱਟੀ ਗਈ ਤਿੰਨ ਏਕੜ ਦੀ ਕਲੋਨੀ ’ਚ ਤਿੰਨ ਮਕਾਨ ਵੀ ਬਨਣੇ ਸ਼ੁਰੂ ਹੋ ਗਏ ਹਨ, ਜਿਨ੍ਹਾਂ ਵਿਚ ਕਲੋਨੀ ਗ਼ੈਰਕਾਨੂੰਨੀ ਹੋਣ ਦੇ ਬਾਵਜੂਦ ਨਗਰ ਕੌਂਸਲ ਨੇ ਇਕ ਮਕਾਨ ਦਾ ਨਕਸ਼ਾ ਪਾਸ ਕੀਤਾ ਸੀ, ਜਿਸ ਦੀ ਜਾਂਚ ਵੀ ਅੰਦਰ ਖਾਤੇ ਅਰੰਭ ਹੋ ਗਈ ਹੈ। ਜੇਕਰ ਅਜਿਹਾ ਹੋਇਆ ਹੈ ਤਾਂ ਸਬੰਧਤ ਅਧਿਕਾਰੀ ਵੀ ਜਾਂਚ ਦੇ ਘੇਰੇ ਵਿਚ ਆਉਣਗੇ। ਇਸ ਮੌਕੇ ਕੌਂਸਲ ਦੇ ਕਾਰਜਕਾਰੀ ਪ੍ਰਧਾਨ ਜਤਿੰਦਰ ਪਾਠਕ ਨੇ ਕਿਹਾ ਕਿ ਗ਼ੈਰਕਾਨੂੰਨੀ ਕਲੋਨੀਆਂ ਖ਼ਿਲਾਫ਼ ਕਾਰਵਾਈ ’ਚ ਢਿੱਲ ਨਹੀਂ ਵਰਤੀ ਜਾਵੇਗੀ। ਜੇਕਰ ਕੌਂਸਲ ਦਾ ਕੋਈ ਅਧਿਕਾਰੀ ਤੇ ਕਰਮਚਾਰੀ ਇਸ ’ਚ ਸ਼ਾਮਲ ਹੋਇਆ ਤਾਂ ਉਸ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਕਲੋਨਾਈਜ਼ਰ ਖ਼ਿਲਾਫ਼ ਕਾਰਵਾਈ ਸ਼ੁਰੂ: ਕਾਰਜਸਾਧਕ ਅਧਿਕਾਰੀ
ਇਸ ਮੌਕੇ ਕੌਂਸਲ ਦੇ ਕਾਰਜ ਸਾਧਕ ਅਫ਼ਸਰ ਚਰਨਜੀਤ ਸਿੰਘ ਨੇ ਕਿਹਾ ਕਿ ਗ਼ੈਰਕਾਨੂੰਨੀ ਕਲੋਨਾਈਜ਼ਰਾਂ ਖ਼ਿਲਾਫ਼ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ। ਜੇਕਰ ਕਿਸੇ ਕਲੋਨੀ ’ਚ ਗ਼ੈਰਕਾਨੂੰਨੀ ਨਿਰਮਾਣ ਹੋਇਆ ਹੈ ਤਾਂ ਜ਼ਰੂਰਤ ਪੈਣ ’ਤੇ ਬੁਲਡੋਜ਼ਰ ਚਲਾਇਆ ਜਾਵੇਗਾ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਕੋਈ ਵੀ ਸ਼ਹਿਰ ’ਚ ਗ਼ੈਰਕਾਨੂੰਨੀ ਨਿਰਮਾਣ ਨਾ ਕਰੇ, ਕਿਸੇ ਨੂੰ ਬਖਸ਼ਿਆ ਨਹੀਂ ਜਾਵੇਗਾ।