ਮਾਲਖ਼ਾਨਾ ਖੁਰਦ-ਬੁਰਦ ਕਰਨ ਵਾਲਾ ਮੁਨਸ਼ੀ ਕਾਬੂ

ਪੁਲੀਸ ਜ਼ਿਲ੍ਹਾ ਲੁਧਿਆਣਾ (ਦਿਹਾਤੀ) ਦੇ ਥਾਣਾ ਸਿੱਧਵਾਂ ਬੇਟ ਵਿੱਚ ਬਣੇ ਮਾਲਖਾਨੇ ’ਚ ਜਮ੍ਹਾ ਸਰਕਾਰੀ ਫੰਡਾਂ, ਨਸ਼ੀਲੇ ਪਦਾਰਥਾਂ ਦੇ ਕੇਸਾਂ ਨਾਲ ਸਬੰਧਤ ਰਾਸ਼ੀ ਗਾਇਬ ਹੋਣ ’ਤੇ ਮਾਲਖਾਨੇ ਦੇ ਮੁਨਸ਼ੀ ਖ਼ਿਲਾਫ਼ ਕੇਸ ਦਰਜ ਕਰਕੇ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਇਹ ਖੁਲਾਸਾ ਮੁਨਸ਼ੀ ਦੀ ਸੇਵਾਮੁਕਤੀ ਦੇ 20 ਦਿਨ ਰਹਿੰਦਿਆਂ ਹੋਇਆ। ਥਾਣਾ ਮੁਖੀ ਇੰਸਪੈਕਟਰ ਹੀਰਾ ਸਿੰਘ ਅਤੇ ਹੋਰ ਅਧਿਕਾਰੀਆਂ ਮੁਤਾਬਕ ਥਾਣੇ ਦੇ ਮਾਲਖਾਨੇ ਦਾ ਚਾਰਜ ਗੁਰਦਾਸ ਸਿੰਘ ਮੁਨਸ਼ੀ, ਜੋ ਕਿ ਪਹਿਲਾਂ ਫ਼ੌਜ ਵਿੱਚੋਂ ਸੇਵਾਮੁਕਤੀ ਸੀ, ਕੋਲ ਹੈ। ਸੀ ਆਈ ਏ ਪੁਲੀਸ ਨੇ 2023 ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਕਰਨ ਵਾਲੇ ਗਰੋਹ ਦਾ ਪਰਦਾਫਾਸ਼ ਕੀਤਾ ਸੀ, ਜੋ ਕਿ ਪੁਲੀਸ ਵਰਦੀਆਂ ਦੀ ਵਰਤੋਂ ਕਰਕੇ ਗੁਆਂਢੀ ਸੂਬਿਆਂ ਵਿੱਚੋਂ ਨਸ਼ਾ ਲਿਆਉਂਦੇ ਸਨ। ਉਨ੍ਹਾਂ ਕੋਲੋਂ ਉਸ ਵੇਲੇ ਭਾਰੀ ਮਾਤਰਾ ਵਿੱਚ ਭੁੱਕੀ ਚੂਰਾ, ਪੁਲੀਸ ਦੀਆਂ ਵਰਦੀਆਂ, ਪਿਸਤੌਲ, ਕਾਰਤੂਸ, ਗੱਡੀਆਂ ਦੀਆਂ ਜਾਅਲੀ ਨੰਬਰ ਪਲੇਟਾਂ ਅਤੇ ਕਰੋੜਾਂ ਰੁਪਏ ਨਕਦੀ ਵਗੈਰਾ ਬਰਾਮਦ ਹੋਈ ਸੀ। ਸਾਰਾ ਮਾਲ ਜ਼ਬਤ ਕਰਨ ਮਗਰੋਂ ਪੁਲੀਸ ਨੇ ਅਧਿਕਾਰ ਖੇਤਰ ਥਾਣਾ ਸਿੱਧਵਾ ਬੇਟ ਦਾ ਹੋਣ ਕਰਕੇ ਇਸੇ ਥਾਣੇ ਦੇ ਮਾਲਖਾਨੇ ਵਿੱਚ ਬਕਾਇਦਾ ਡੱਬਿਆਂ ਵਿੱਚ ਬੰਦ ਕਰਕੇ ਸੀਲਾਂ ਲਗਾ ਕੇ ਰੱਖਿਆ ਗਿਆ ਸੀ। ਕੁੱਝ ਦਿਨ ਪਹਿਲਾਂ ਜਦੋਂ ਇਸ ਕੇਸ ਨਾਲ ਸਬੰਧਤ ਜਮ੍ਹਾਂ ਮਾਲ ਅਦਾਲਤ ਵਿੱਚ ਸਮੇਤ ਰਿਕਾਰਡ ਪੇਸ਼ ਕਰਨ ਦੀ ਨੌਬਤ ਆਈ ਤਾਂ ਮੁਨਸ਼ੀ ਗੁਰਦਾਸ ਸਿੰਘ ਟਾਲ-ਮਟੋਲ ਕਰਨ ਲੱਗਾ ਅਤੇ ਸਮੇਂ ਸਿਰ ਅਦਾਲਤ ਵਿੱਚ ਰਿਕਾਰਡ ਪੇਸ਼ ਕਰਨ ਤੋਂ ਅਸਮਰੱਥ ਰਿਹਾ। ਜ਼ਿਲ੍ਹੇ ਦੇ ਉੱਚ ਅਧਿਕਾਰੀਆਂ ਨੇ ਤੁਰੰਤ ਥਾਣੇ ਦੇ ਮਾਲਖਾਨੇ ਦੀ ਜਾਂਚ ਦੇ ਹੁਕਮ ਜਾਰੀ ਕੀਤੇ। ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਮਾਲਖਾਨੇ ’ਚ ਪਿਆ ਪੈਸਾ-ਧੇਲਾ ਮੁਨਸ਼ੀ ਨੇ ਗਾਇਬ ਕਰ ਦਿੱਤਾ ਹੈ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਿਆ ਕਿ ਮੁਨਸ਼ੀ ਗੁਰਦਾਸ ਸਿੰਘ ਬੜੀ ਚਲਾਕੀ ਨਾਲ ਜਿਨ੍ਹਾਂ ਡੱਬਿਆਂ ’ਚ ਸੀਲਾਂ ਲਗਾ ਕੇ ਮਾਲ ਬੰਦ ਕੀਤਾ ਸੀ, ਉਨ੍ਹਾਂ ਦੀਆਂ ਸੀਲਾਂ ਗਰਮ ਕਰਕੇ ਖੋਲ੍ਹਦਾ, ਪੈਸੇ ਕੱਢਣ ਉਪਰੰਤ ਫਿਰ ਸੀਲ ਲਗਾ ਦਿੰਦਾ। ਇਸੇ ਤਰ੍ਹਾਂ ਉਸ ਨੇ ਖ਼ਜ਼ਾਨੇ ਵਿੱਚ ਪਿਆ ਸਾਰਾ ਮਾਲ ਹੜੱਪ ਲਿਆ। ਪੁਲੀਸ ਨੇ ਗੁਰਦਾਸ ਸਿੰਘ ਨੂੰ ਗ੍ਰਿਫਤਾਰ ਕਰਕੇ ਉਸੇ ਥਾਣੇ ਵਿੱਚ ਹੀ ਉਸ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ, ਜਿਸ ਵਿੱਚ ਉਹ ਤਾਇਨਾਤ ਸੀ। ਇਹ ਵੀ ਪਤਾ ਲੱਗਾ ਹੈ ਕਿ ਮੁਨਸ਼ੀ ਗੁਰਦਾਸ ਸਿੰਘ ਨੂੰ ਜੂਆ ਖੇਡਣ ਦੀ ਲ਼ਤ ਸੀ।