ਐੱਨ ਆਰ ਆਈ ਪਤਨੀ ਸਣੇ ਚਾਰ ਖ਼ਿਲਾਫ਼ ਕੇਸ ਦਰਜ

ਰਾਏਕੋਟ ਦੇ ਵਕੀਲ ਵੱਲੋਂ ਕਰੋਡ਼ਾਂ ਦੀ ਧੋਖਾਧਡ਼ੀ ਦਾ ਦੋਸ਼

patar prerak

ਰਾਏਕੋਟ, 05:23 AM Mar 02, 2026 IST

ਇਥੋਂ ਦੀ ਗ੍ਰੀਨ ਸਿਟੀ ਦੇ ਵਾਸੀ ਅਤੇ ਪੇਸ਼ੇ ਤੋਂ ਵਕੀਲ ਸੰਦੀਪ ਸਿੰਘ ਰਟੌਲ ਨੇ ਪਿੰਡ ਨੱਥੋਵਾਲ ਦੀ ਕੈਨੇਡਾ ਰਹਿੰਦੀ ਆਪਣੀ ਪਤਨੀ ਅਤੇ ਉਸਦੇ ਪਰਿਵਾਰ ਖ਼ਿਲਾਫ਼ ਦੋਸ਼ ਲਗਾਏ ਹਨ। ਸ਼ਿਕਾਇਤ ਅਨੁਸਾਰ ਸੰਦੀਪ ਦਾ ਵਿਆਹ ਪਿੰਡ ਨੱਥੋਵਾਲ ਦੀ ਸਮਨਪ੍ਰੀਤ ਕੌਰ ਨਾਲ 24 ਜਨਵਰੀ 2024 ਨੂੰ ਤੈਅ ਹੋਇਆ ਸੀ। ਲੜਕੀ ਦੇ ਪਰਿਵਾਰ ਨੇ ਵਿਦੇਸ਼ ਸੈਟਲ ਕਰਨ ਦੇ ਨਾਂ ’ਤੇ 60 ਲੱਖ ਰੁਪਏ ਦੀ ਮੰਗ ਕੀਤੀ। ਮੰਗਣੀ ਲਈ 10 ਲੱਖ ਰੁਪਏ ਨਕਦ ਪੇਸ਼ਗੀ ਦਿੱਤੀ ਗਈ ਅਤੇ 16 ਫਰਵਰੀ 2024 ਨੂੰ 40 ਲੱਖ ਰੁਪਏ ਹੋਰ ਦਿੱਤੇ ਗਏ। 21 ਜੁਲਾਈ 2024 ਨੂੰ ਪੈਲੇਸ ਬੁਕਿੰਗ ਅਤੇ ਸੋਨੇ ਦੇ ਗਹਿਣਿਆਂ ਲਈ ਹੋਰ 40 ਲੱਖ ਰੁਪਏ ਦਿੱਤੇ ਗਏ। 9 ਨਵੰਬਰ 2024 ਨੂੰ ਵਿਆਹ ਹੋਇਆ। 18 ਜਨਵਰੀ 2025 ਨੂੰ ਕੈਨੇਡਾ ਜਾਣ ਤੋਂ ਪਹਿਲਾਂ ਕੇਸ ਦਰਜ ਕਰਨ ਦੇ ਨਾਂ ’ਤੇ ਹੋਰ 10 ਲੱਖ ਰੁਪਏ ਲਏ ਗਏ। ਪੀੜਤ ਦਾ ਦੋਸ਼ ਹੈ ਕਿ 19 ਜਨਵਰੀ 2025 ਨੂੰ ਪਤਨੀ ਦੇ ਕੈਨੇਡਾ ਜਾਣ ਤੋਂ ਬਾਅਦ ਉਸ ਦਾ ਰਵੱਈਆ ਬਦਲ ਗਿਆ। ਪਹਿਲਾਂ ਗੱਲਬਾਤ ਘਟਾਈ ਗਈ ਅਤੇ ਫਿਰ 10 ਲੱਖ ਰੁਪਏ ਦੀ ਮੰਗ ਕੀਤੀ ਗਈ। ਪੈਸੇ ਨਾ ਦੇਣ ’ਤੇ ਦਾਜ ਦੇ ਕੇਸ ਵਿੱਚ ਫਸਾਉਣ ਦੀ ਧਮਕੀ ਦਿੱਤੀ ਗਈ। ਇਸ ਤੋਂ ਇਲਾਵਾ 30 ਤੋਲੇ ਤੋਂ ਵੱਧ ਸੋਨੇ ਦੇ ਗਹਿਣੇ ਵੀ ਆਪਣੇ ਨਾਲ ਲੈ ਜਾਣ ਦਾ ਦੋਸ਼ ਲਗਾਇਆ ਗਿਆ ਹੈ। 29 ਮਾਰਚ 2025 ਨੂੰ ਲੜਕੀ ਨੇ ਉਸ ਦੀ ਨੰਬਰ ਬਲਾਕ ਕਰ ਦਿੱਤਾ। ਪੀੜਤ ਦੀ ਸ਼ਿਕਾਇਤ ’ਚੇ ਰਾਏਕੋਟ ਦੀ ਪੁਲੀਸ ਨੇ ਪਿੰਡ ਨੱਥੋਵਾਲ ਦੀ ਸਮਨਪ੍ਰੀਤ ਕੌਰ ਹਾਲ ਵਾਸੀ ਕੈਨੇਡਾ, ਉਸ ਦੇ ਪਿਤਾ ਰਵਿੰਦਰ ਸਿੰਘ, ਮਾਤਾ ਪਰਮਜੀਤ ਕੌਰ ਅਤੇ ਭਰਾ ਖੁਸ਼ਦੀਪ ਸਿੰਘ ਸਾਰੇ ਵਾਸੀ ਨੱਥੋਵਾਲ ਖ਼ਿਲਾਫ਼ ਧੋਖਾਧੜੀ ਦਾ ਕੇਸ ਦਰਜ ਕਰ ਲਿਆ ਹੈ। ਫਿਲਹਾਲ ਸਾਰੇ ਮੁਲਜ਼ਮ ਪੁਲੀਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ।