35 ਡੇਅਰੀ ਮਾਲਕਾਂ ਖ਼ਿਲਾਫ਼ ਕੇਸ ਦਰਜ

ਬੁੱਢੇ ਦਰਿਆ ਵਿੱਚ ਗੋਹਾ, ਕੂੜਾ ਕਰਕਟ ਸੁੱਟਣ ਵਾਲਿਆਂ ਖ਼ਿਲਾਫ਼ ਪੁਲੀਸ ਵੱਲੋਂ ਸ਼ਿਕੰਜਾ ਕੱਸਿਆ ਗਿਆ ਹੈ, ਜਿਸ ਤਹਿਤ 35 ਡੇਅਰੀ ਮਾਲਕਾਂ ਖ਼ਿਲਾਫ਼ ਕੇਸ ਦਰਜ ਕੀਤੇ ਗਏ ਹਨ। ਥਾਣਾ ਡਵੀਜ਼ਨ ਨੰਬਰ 7 ਦੀ ਪੁਲੀਸ ਵੱਲੋਂ ਸਹਾਇਕ ਇੰਜੀਨੀਅਰ ਅਰਬਨ ਅਸਟੇਟ ਵਾਟਰ ਅਤੇ ਵੇਸਟ ਮੈਨੇਜਮੈਂਟ ਲਿਮਟਿਡ ਜ਼ੋਨ ਬੀ ਦੀ ਸ਼ਿਕਾਇਤ ’ਤੇ ਬਿੱਟੂ ਭਾਟੀਆ ਤਾਜਪੁਰ ਰੋਡ, ਸੁਰਜੀਤ ਸਿੰਘ ਬਰਨਾਲਾ, ਪ੍ਰੀਤਮ, ਹਰਪਾਲ, ਬਿੱਟੂ ਭਾਟੀਆ, ਲਾਂਭਾ, ਮਨੂੰ ਡੇਅਰੀ, ਵਾਸੂਦੇਵ ਡੇਅਰੀ, ਵੇਦ ਪ੍ਰਕਾਸ਼, ਨਿੱਕਾ ਡੇਅਰੀ, ਵਿੱਕੀ ਡੇਅਰੀ, ਰਾਜਾ ਡੇਅਰੀ, ਤਜਿੰਦਰ ਡੇਅਰੀ, ਰਾਕੇਸ਼ ਕੁਮਾਰ, ਬਿੱਟੂ ਤੇ ਸ਼ਾਲੂ ਖ਼ਿਲਾਫ਼ ਆਪਣੀਆਂ ਡੇਅਰੀਆਂ ਦੀ ਵੇਸਟੇਜ਼ ਬੁੱਢਾ ਦਰਿਆ ਵਿੱਚ ਸੁੱਟ ਕੇ ਸਰਕਾਰੀ ਹੁਕਮਾਂ ਦੀ ਉਲੰਘਣਾ ਦੇ ਦੋਸ਼ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਇਹ ਵੀ ਦੱਸਿਆ ਹੈ ਕਿ ਇਸ ਸਬੰਧੀ ਦੌਰਾਨੇ ਡਿਊਟੀ ਚਲਾਨ ਕੱਟ ਰਹੇ ਮੁਲਾਜ਼ਮਾਂ ਨਾਲ ਡੇਅਰੀ ਮਾਲਕਾਂ ਵੱਲੋਂ ਦੁਰਵਿਹਾਰ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ ਮਨੀ ਡੇਅਰੀ ਤੋਂ ਇਲਾਵਾ ਕੁਝ ਡੇਅਰੀ ਮਾਲਕਾਂ ਖ਼ਿਲਾਫ਼ ਬੁੱਢੇ ਦਰਿਆ ਵਿੱਚ ਪਾਣੀ ਸਿੱਧੇ ਤੌਰ ’ਤੇ ਗੋਹਾ ਸੁੱਟੇ ਜਾਣ ਤੋਂ ਰੋਕਣ ਲਈ ਕਈ ਵਾਰ ਡੇਅਰੀ ਮਾਲਕਾਂ ਨੂੰ ਨੋਟਿਸ ਦੇ ਕੇ ਬੁੱਢਾ ਦਰਿਆ ਵਿੱਚ ਪਾਏ ਗਏ ਪਾਈਪਾਂ ਦੇ ਕੁਨੈਕਸ਼ਨ ਵੀ ਕੱਟੇ ਗਏ ਹਨ ਅਤੇ ਇਸਦੇ ਬਾਵਜ਼ੂਦ ਨਗਰ ਨਿਗਮ ਵੱਲੋਂ ਕਾਰਵਾਈ ਕਰਦੇ ਹੋਏ ਇਨ੍ਹਾਂ ਸਾਰੇ ਆਉਟਲੈੱਟ ਪੁਆਇੰਟਾਂ ਨੂੰ ਦੋਬਾਰਾ ਬੰਦ ਕਰਵਾ ਦਿੱਤਾ ਗਿਆ ਸੀ ਪਰੰਤੂ ਡੇਅਰੀ ਮਾਲਕਾਂ ਵੱਲੋਂ ਮੇਨ ਤਾਜਪੁਰ ਰੋਡ ਵਿੱਖੇ ਧਰਨਾ ਲਗਾਇਆ ਗਿਆ ਅਤੇ ਕੁਝ ਅਣਪਛਾਤੇ ਡੇਅਰੀ ਮਾਲਕਾਂ ਵੱਲੋਂ ਇਹ ਆਉਟਲੈੱਟ ਪੁਾਆਇੰਟਾਂ ਨੂੰ ਦੋਬਾਰਾ ਖੋਲ੍ਹਿਆ ਗਿਆ, ਜਿਸ ’ਤੇ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤੇ ਗਏ ਹਨ। ਥਾਣਾ ਟਿੱਬਾ ਦੀ ਪੁਲੀਸ ਨੇ ਅੰਮ੍ਰਿਤਪਾਲ ਸਿੰਘ ਦੀ ਸ਼ਿਕਾਇਤ ’ਤੇ ਗੁਰਨਾਮ ਡੇਅਰੀ, ਮਾਤਾ ਕਰਮਸਰ ਕਲੋਨੀ, ਟਿੰਕੂ ਡੇਅਰੀ ਗੀਤਾ ਨਗਰ, ਅਜੈ ਕੁਮਾਰ ਗੀਤਾ ਨਗਰ, ਵੀਰੂ ਡੇਅਰੀ ਨੇੜੇ ਤਾਜਪੁਰ, ਜਗਦੀਸ਼ ਡੇਅਰੀ ਨੇੜੇ ਵਿਜੈ ਨਗਰ ਪੁਲੀ ਸਣੇ 19 ਡੇਅਰੀ਼ ਮਾਲਕਾਂ ਖ਼ਿਲਾਫ਼ ਕੇਸ ਦਰਜ ਕੀਤੇ ਗਏ ਹਨ।