ਅੱਜ ਪੇਸ਼ ਹੋਵੇੇਗਾ ਲੁਧਿਆਣਾ ਨਗਰ ਨਿਗਮ ਦਾ ਬਜਟ

ਗਗਨਦੀਪ ਅਰੋੜਾ
ਲੁਧਿਆਣਾ, 23 ਮਾਰਚ

ਸੂਬੇ ਦੀ ਸਭ ਤੋਂ ਵੱਡੀ ਨਗਰ ਨਿਗਮ ਲੁਧਿਆਣਾ ਵੱਲੋਂ ਸ਼ੁੱਕਰਵਾਰ ਨੂੰ 1043.66 ਕਰੋੜ ਰੁਪਏ ਦਾ ਸਲਾਨਾ ਬਜਟ ਪੇਸ਼ ਕੀਤਾ ਜਾਏਗਾ। ਜਿਸਦੇ ਲਈ ਮੇਅਰ ਬਲਕਾਰ ਸਿੰਘ ਸੰਧੂ ਦੀ ਅਗਵਾਈ ਵਿੱਚ ਜਨਰਲ ਹਾਊਸ ਦੀ ਮੀਟਿੰਗ ਕੀਤੀ ਜਾਏਗੀ। ਇਸ ਮੀਟਿੰਗ ਤੋਂ ਪਹਿਲਾਂ ਅੱਜ ਮੇਅਰ ਸੰਧੂ ਨੇ ਆਲ ਪਾਰਟੀ ਦੇ ਸੀਨੀਅਰ ਮੈਂਬਰਾਂ ਨੂੰ ਬੁਲਾ ਕੇ ਬਜਟ ’ਤੇ ਪਹਿਲਾਂ ਹੀ ਕੌਂਸਲਰਾਂ ਦੀ ਆਮ ਸਹਮਿਤੀ ਬਣਾਉਣ ਦੀ ਕੋਸ਼ਿਸ਼ ਕੀਤੀ।

ਇਸ ਦੌਰਾਨ ਨਿਗਮ ਵਿੱਚ ਵਿਰੋਧ ਦਲ ਦੇ ਆਗੂ ਕੌਂਸਲਰ ਜਸਪਾਲ ਸਿੰਘ ਗਿਆਸਪੁਰਾ ਨੇ ਇਹ ਸਵਾਲ ਚੁੱਕੇ ਕਿ ਨਗਰ ਨਿਗਮ ਨੇ ਕਾਗਜ਼ੀ ਬਜਟ ਤਾਂ ਤਿਆਰ ਕਰ ਲਿਆ ਹੈ, ਪਰ ਪਹਿਲਾਂ ਇਹ ਦੱਸਿਆ ਜਾਵੇ ਕਿ ਨਗਰ ਨਿਗਮ ਨੇ ਵਿਕਾਸ ਕਾਰਜਾਂ ਦੇ ਠੇਕੇਦਾਰਾਂ ਨੂੰ ਹਾਲੇ ਕਿੰਨੇ ਪੈਸੇ ਦੇਣੇ ਹਨ। ਜਵਾਬ ’ਚ ਦੱਸਿਆ ਗਿਆ ਕਿਨਗਰ ਨਿਗਮ ਨੇ ਪਹਿਲਾਂ ਹੀ ਠੇਕੇਦਾਰਾਂ ਦੇ 150 ਕਰੋੜ ਰੁਪਏ ਦੇਣੇ ਹਨ। ਇਹ ਸਵਾਲ ਵੀ ਪੁੱਛੇ ਗਏ ਕਿ ਪਿਛਲੇ ਇੱਕ ਸਾਲ ਦੌਰਾਨ ‘ਆਪ’ ਦੀ ਸਰਕਾਰ ਨੇ ਕਿੰਨੇ ਪੈਸੇ ਲੁਧਿਆਣਾ ਨਗਰ ਨਿਗਮ ਨੂੰ ਭੇਜੇ ਹਨ। ਜਿਸ ’ਤੇ ਜਵਾਬ ਮਿਲਿਆ ਕਿ ਸਰਕਾਰ ਵੱਲੋਂ ਕੋਈ ਵੀ ਫੰਡ ਜਾਰੀ ਨਹੀਂ ਕੀਤਾ ਗਿਆ। ਇਸ ਦੌਰਾਨ ਇਹ ਵੀ ਚਰਚਾ ਰਹੀ ਕਿ ਇਸ ਵਾਰ ਜਨਰਲ ਹਾਊਸ ਵਿੱਚ ਹੰਗਾਮਾ ਹੋਣ ਦੇ ਆਸਾਰ ਹੈ। ਫੰਡਾਂ ਦਾ ਮੁੱਦਾ ਅਹਿਮ ਰਹੇਗਾ। ਇਸ ਦੌਰਾਨ ਨਗਰ ਨਿਗਮ ਕਮਿਸ਼ਨਰ ਡਾ. ਸ਼ੇਨਾ ਅਗਰਵਾਲ, ਕੌਂਸਲਰ ਹਰਭਜਨ ਸਿੰਘ ਡੰਗ, ਪਾਲ ਸਿੰਘ ਗਰੇਵਾਲ, ਕੁਲਦੀਪ ਜੰਡਾ, ਸਵਰਨਦੀਪ ਸਿੰਘ ਚਾਹਲ ਮੌਜੂਦ ਸਨ।

ਨਿਗਮ ਨੇ ਲਿਆ ਹੋਇਆ ਹੈ 100 ਕਰੋੜ ਰੁਪਏ ਕਰਜ਼ਾ

ਆਲ ਪਾਰਟੀ ਮੀਟਿੰਗ ਵਿੱਚ ਇਹ ਵੀ ਚਰਚਾ ਹੋਈ ਕਿ ਨਗਰ ਨਿਗਮ ਨੇ 100 ਕਰੋੜ ਰੁਪਏ ਕਰਜ਼ਾ ਲਿਆ ਹੋਇਆ। ਜਦਕਿ ਨਵੇਂ ਵਿਕਾਸ ਕਾਰਜ਼ਾਂ ਲਈ ਦਾਅਵੇ ਕੀਤੇ ਜਾ ਰਹੇ ਹਨ। ਪਰ ਪੈਸੇ ਕਿੱਥੋਂ ਆਉਣਗੇ?