Bank Strike: ਐਤਵਾਰ ਨੂੰ ਵੀ ਖੁੱਲ੍ਹੇ ਰਹੇ ਬੈਂਕ
ਬੈਂਕ ਮੁਲਾਜ਼ਮਾਂ ਦੀ ਹਡ਼ਤਾਲ ਦੇ ਮੱਦੇਨਜ਼ਰ ਖੋਲ੍ਹੇ ਬੈਂਕ
ਬੈਂਕ ਮੁਲਾਜ਼ਮਾਂ ਵੱਲੋਂ 28 ਤੋਂ 30 ਸਤੰਬਰ ਤੱਕ ਕੀਤੀ ਜਾਣ ਵਾਲੀ ਹੜਤਾਲ ਦੌਰਾਨ ਖਪਤਕਾਰਾਂ ਦੀ ਖੱਜਲਖੁਆਰੀ ਨੂੰ ਘੱਟ ਕਰਨ ਲਈ ਅੱਜ ਐਤਵਾਰ ਵੀ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਬੈਂਕ ਆਮ ਦਿਨਾਂ ਦੀ ਤਰ੍ਹਾਂ ਖੁੱਲ੍ਹੇ ਰਹੇ। ਸੁਣਨ ਵਿੱਚ ਆਇਆ ਹੈ ਕਿ ਕਰੀਬ 10 ਸਾਲਾਂ ਬਾਅਦ ਐਤਵਾਰ ਨੂੰ ਬੈਂਕ ਖੁੱਲ੍ਹੇ ਦੇਖੇ ਗਏ ਹਨ। ਬੈਂਕ ਮੁਲਾਜ਼ਮਾਂ ਵੱਲੋਂ ਆਪਣੀਆਂ ਮੰਗਾਂ ਮਨਵਾਉਣ ਲਈ ਕਈ ਦਿਨ ਪਹਿਲਾਂ ਹੀ ਤਿੰਨ ਰੋਜ਼ਾ ਹੜਤਾਲ ਕਰਨ ਦਾ ਐਲਾਨ ਕੀਤਾ ਹੋਇਆ ਹੈ। ਇਸ ਦੌਰਾਨ ਬੈਂਕਾਂ ਦੇ ਗਾਹਕਾਂ ਨੂੰ ਕੋਈ ਪ੍ਰੇਸ਼ਾਨੀ ਨਾ ਹੋਵੇ, ਉਨ੍ਹਾਂ ਨੂੰ ਆਪਣੇ ਬੈਂਕ ਦੇ ਕੰਮ ਨਿਪਟਾਉਣ ਦੀ ਸਹੂਲਤ ਲਈ ਅੱਜ ਐਤਵਾਰ 27 ਸਤੰਬਰ ਨੂੰ ਵੀ ਸ਼ਹਿਰ ਦੇ ਵੱਖ ਵੱਖ ਇਲਾਕਿਆਂ ਵਿੱਚ ਬੈਂਕਾਂ ਦਾ ਕੰਮ ਆਮ ਦਿਨਾਂ ਦੀ ਤਰ੍ਹਾਂ ਚੱਲਦਾ ਰਿਹਾ। ਬੈਂਕਾਂ ਵਿੱਚ ਲੋਕ ਆਮ ਦਿਨਾਂ ਦੀ ਤਰ੍ਹਾਂ ਆਪਣੇ ਕੰਮ ਨਿਪਟਾਉਣ ਲਈ ਪਹੁੰਚੇ ਹੋਏ ਸਨ। ਇਸ ਸਹੂਲਤ ਦਾ ਪ੍ਰਾਈਵੇਟ ਫੈਕਟਰੀਆਂ ਵਿੱਚ ਕੰਮ ਕਰਨ ਵਾਲਿਆਂ ਨੂੰ ਬੜਾ ਲਾਭ ਹੋਇਆ ਹੈ। ਆਮ ਦਿਨਾਂ ਵਿੱਚ ਉਨ੍ਹਾਂ ਨੂੰ ਫੈਕਟਰੀਆਂ ਵਿੱਚੋਂ ਛੁੱਟੀ ਲੈ ਕੇ ਬੈਂਕ ਦਾ ਕੰਮ ਨਿਪਟਾਉਣਾ ਪੈਂਦਾ ਸੀ ਪਰ ਅੱਜ ਐਤਵਾਰ ਕਰ ਕੇ ਫੈਕਟਰੀਆਂ ਵਿੱਚ ਵੀ ਛੁੱਟੀ ਸੀ। ਆਮ ਦਿਨਾਂ ਨਾਲੋਂ ਅੱਜ ਬੈਂਕਾਂ ਵਿੱਚ ਆਉਣਾ ਜਾਣ ਘੱਟ ਸੀ।
